Ir-Renju Unit huwa l-ewwel pajjiż fid-dinja li approva l-użu ta’ pillola li hu maħsub li tnaqqas is-sintomi ta’ persuni li jkunu ġew pożittivi għall-Covid-19.
Il-pillola Molnupiravir, żviluppata mill-kumpaniji Amerikani Merck, Sharp and Dohme (MSD) u Ridgeback Biotherapeutics, hija l-ewwwl medikazzjoni antiviral għall-Covid-19 li tista’ tittieħed bħala pillola aktar milli tiġi injettata jew mogħtija ġol-vina.
Ir-Renju Unit qabel li jixtri 480,000 kors bl-ewwel kunsinni mistennija f’Novembru.
Inizjalment se tingħata kemm lil pazjenti mlaqqma kif ukoll mhux imlaqqma biex tiġi studjata sew l-effettività tagħha.
Il-mediċina trid tingħata fi żmien ħamest ijiem minn meta s-sintomi jiżviluppaw biex tkun aktar effettiva.
Il-pillola se tibda tingħata lill-persuni vulnerabbli darbtejn kuljum, u taħdem billi tattakka enzymes tal-ġisem li l-virus juża biex jimmultiplika ruħu, u jsir tibdil fil-kodiċi ġenetiċi tiegħu. Dan għandu jipprevjeni milli jimmultiplika, u għalhekk iżżomm il-livelli tal-virus baxxi fil-ġisem u tnaqqas is-severità tal-marda.
Il-kumpanija Merck qalet li dan għandu jagħmel it-trattament ugwalment effettiv kontra varjanti ġodda tal-virus li jista’ jkun hemm fil-futur.
Studju xjentifiku li sar mill-kumpanija juri li l-pillola, li oriġinarjament ġiet żviluppata għall-influwenza, għandha tnaqqas ir-riskju ta’ dħul fl-isptar u mewt bil-Covid-19 b’50% għall-pazjenti li jkunu għadhom kemm ġew pożittivi għall-virus.
