L-istilel ta’ Harry Potter, Daniel Radcliffe, Emma Watson u Rupert Grint se jkunu qed jerġgħu jingħaqdu ma’ membri oħra tal-kast għal programm televiżiv speċjali li se jsir għall-20 sena anniversarju mill-ewwel film.
L-aħbar ħarġet eżattament 20 sena wara li ħareġ l-ewwel film fl-Istati Uniti, Harry Potter And The Sorcerer’s Stone, fis-16 ta’ Novembru tal-2001.
It-trio se jingħaqad mad-direttur tal-films Amerikan Chris Columbus biex jiddiskuti l-films u jesplora fil-fond il-ħolqien tagħhom.
Se jingħaqdu wkoll Helena Bonham Carter, Robbie Coltrane, Ralph Fiennes, Jason Isaacs, Gary Oldman, Imelda Staunton u Tom Felton, li lkoll interpretaw karattri ewlenin fis-sensiela.
Madanakollu, il-kreatriċi ta’ Harry Potter, l-awtriċi JK Rowling, ma jidhirx li se tkun qed tingħaqad magħhom għal dan l-anniversarju. Dan wara li s-sena li għaddiet għamlet xi kummenti kontroversjali dwar il-komunità trans, b’uħud fil-komunità LGBTIQ jakkużawha bi transfobija.
Għall-ewwel darba, il-kast leġġendarju se jerġa’ lura fejn bdiet il-maġija. Harry Potter 20th Anniversary: Return To Hogwarts se jkun qed jixxandar għall-ewwel darba fl-1 ta’ Jannar 2022 fuq il-pjattaforma ta’ streaming HBO Max.
Se nkunu qed naraw il-kast jirritorna għas-settijiet oriġinali tal-boarding school ta’ Hogwarts li dehru fl-ewwel film ta’ Harry Potter.
Din l-edizzjoni televiżiva speċjali hija waħda minn diversi avvenimenti tal-20 anniversarju ppjanati minn Warner Bros.
Intant, Emma Watson qasmet il-memorji tagħha ta’ Hogwarts u l-film fuq il-midja soċjali. Hija qalet li Harry Potter kien id-dar tagħha, il-familja tagħha u d-dinja tagħha, u li Hermoine tibqa’ l-karattru fittizju favorit tagħha ta’ kull żmien.
Daniel Radcliffe qal li Harry Potter għandu post importanti fit-tfulija ta’ ħafna nies, u għadhom iħossuhom protettivi ħafna fuqu.
