Britney Spears ħabbret li sofriet korriment, xahar wara li żvelat it-tqala tagħha.
Il-kantanta qalet lis-segwaċi tagħha ta’ Instagram li hi u s-sieħeb Sam Asghari tilfu t-tarbija tagħhom, li rreferiet għaliha bħala “miracle baby”.
Dan kollu seħħ xhur wara li nħallet minn arranġament legali li ta lil missierha kontroll fuq bosta aspetti ta’ ħajjitha, inkluż is-saħħa riproduttiva tagħha.
Spears, ta’ 40 sena, u li għandha żewġ subien adolexxenti, kienet esprimiet ix-xewqa tagħha li tibni familja ma’ Asghari.
Hija qalet li żmien bħal dan huwa devastanti għal kull ġenitur.
“L-imħabba tagħna għal xulxin hija s-saħħa tagħna. Se nkomplu nippruvaw inkabbru l-familja sabiħa tagħna.”
Britney Spears
Fl-2008 missier Spears waqqaf forma ta’ kustodja legali, magħrufa bħala conservatorship, wara li esperjenzat pubblikament kriżi tas-saħħa mentali.
Waqt li tkellmet kontra l-konservatorship fil-qorti s-sena l-oħra, qalet lil imħallef li l-arranġament żammha milli tiżżewweġ jew li jkollha aktar tfal.
Waqt li ħabbret it-tqala tagħha f’April, qalet li x’aktarx tkun “iebsa” peress li qabel kienet esperjenzat dipressjoni perinatali – it-terminu mediku għal dipressjoni li jseħħ f’kull żmien bejn meta ssir taf li tqila sa madwar sena wara li tkun wellidt.
Il-kantanta, li għandha żewġt itfal miż-żwieġ tagħha ma’ Kevin Federline, qalet li din kienet “assolutament orribbli” u rari kienet titkellem dwarha fil-passat.
