“Ma jinteressanix x’għandu ibnek” – Raġel lill-omm ta’ tifel li jgħix bl-awtiżmu

Omm ta’ tifel li jgħix bl-awtiżmu qasmet fuq il-midja soċjali esperjenza xejn sabiħa li kellhom hi u r-raġel tagħha waqt li kienu f’kafetterija, Tigne Point.

Hija spjegat kif minkejja li kienu barra, fuq l-aħħar mejda u kien hemm diversi imwejjed vojta, raġel li kien madwar 5 imwejjed ‘il bogħod minnhom, beda jilmenta u jgħajjat minħabba ħsejjes li sema’ u jgħidilha biex issikket lit-tifel.

L-omm qalet li meta marret tgħidlu li t-tifel għandu l-awtiżmu u staqsietu jekk jafx x’jiġifieri, ir-raġel weġibha li ma jinteressahx x’għandu binha u reġa’ qalilha biex issiktu.

Hija rrimarkat dwar il-fatt li hawn ġenituri li ma joħorġux ma’ uliedhom li jgħixu bl-awtiżmu minħabba li forsi jiddejqu li n-nies iħarsu lejhom. Filwaqt li qalet li nies bħal dawn lilha ma’ jaffettwawhiex, persuni bħal dan ir-raġel jistgħu jaffettwaw lil dawn il-ġenituri.