Select Page

Mill-inqas 18 mejta, oħrajn midruba u għexieren neqsin wara li l-armata Russa attakkat stabbiliment tax-xiri fi Kremenchuk, l-Ukrajna.

Il-President Volodymyr Zelenskyy qal li hu maħsub li fl-istabbiliment kien hemm mill-inqas elf ruħ.

Bosta mexxejja kkundannaw dan l-attakk, b’Emmanuel Macron fost oħrajn, isejjaħ l-attak bħala “reat kriminali tal-gwerra”.

L-Ukrajna qalet li r-Russja kellha l-intenzjoni li toqtol nies ċivili. Min-naħa l-oħra, ir-Russja qalet li mmirat lejn maħżen tal-armi li hemm fil-qrib u sploda, u dan ikkawża n-nirien li nfirxu mal-istabbiliment.

Filwaqt li l-Ukrajna qalet li ma kien hemm l-ebda mira militari fiż-żona, ir-Russja qalet ukoll li l-istabbiliment ma jintużax u kien vojt. Madankollu, dan kien kontradett mill-qraba tal-mejtin u neqsin, u l-għexieren midruba, fosthom mara ta’ 43 sena li kienet hemmhekk tixtri ma’ żewġha meta l-isplużjoni tefgħetha fl-arja.

F’summit fil-Ġermanja, il-mexxejja tad-demokraziji industrijalizzati tal-G7 ħabbru pjanijiet għal limitu tal-prezz taż-żejt Russu, imfassal biex inaqqsu r-riżorsi tal-gwerra tar-Russja mingħajr ma taggrava kriżi ekonomika globali.

Li jmiss se jkun summit tan-NATO fi Spanja, li fih l-alleanza militari tal-Punent mistennija tħabbar mijiet ta’ eluf ta’ truppi li qed jinbidlu għal stat ta’ allert ogħla u reviżjoni tal-qafas strateġiku tagħha biex tiddeskrivi lil Moska bħala avversarju.

Ikkumenta

Enable Notifications OK No thanks