Ghislaine Maxwell ġiet ikkundannata 20 sena ħabs fl-Istati Uniti talli għenet lill-eks finanzier Jeffrey Epstein jabbuża minn tfajliet taħt l-età.
Maxwell, li għandha 60 sena, f’Diċembru nstabet ħatja ta’ reklutaġġ u traffikar ta’ erba’ tfajliet adolexxenti għal abbuż sesswali minn Epstein, l-għarus tagħha dak iż-żmien.
Waħda mill-akkużati tagħha qalet barra l-qorti fi New York li għandha tibqa’ l-ħabs għall-kumplament ta’ ħajjitha.
Epstein qatel lilu nnifsu f’ċella tal-ħabs ta’ Manhattan fl-2019.
Huwa kien qed jistenna l-ġuri tiegħu dwar it-traffikar.
Ir-reati ta’ Ghislaine Maxwell seħħew fuq medda ta’ għaxar snin, bejn l-1994 u l-2004.
Meta ppronunzjat is-sentenza, l-Imħallef Alison J Nathan qalet li l-imġiba ta’ Maxwell kienet “faħxija u predatorja”.
Hija qalet li Maxwell ħadmet ma’ Epstein biex tagħżel vittmi żgħażagħ li kienu vulnerabbli u kellhom rwol ċentrali biex jiffaċilitaw l-abbuż sesswali.
Qalet ukoll li l-każ sejjaħ għal “sentenza sinifikanti ħafna” u li riedet tibgħat messaġġ li reati bħal dawn jiġu kkastigati.
Minbarra l-ħabs, l-imħallef imponiet multa ta’ $750,000 (£610,000).
Maxwell, li l-avukati tagħha kienu argumentaw għal terminu ta’ inqas minn ħames snin, ħarset dritt ’il quddiem u ma wriet l-ebda emozzjoni hekk kif ingħatat is-sentenza.
Aktar kmieni, hija indirizzat lill-vittmi tagħha. Qalet li tempatizza magħhom, u żiedet li tittama li s-sentenza tagħha ta’ ħabs tippermetti lill-vittmi “paċi u finalità”.
Maxwell ilha arrestata mil-Lulju tal-2020, miżmuma l-aktar fiċ-Ċentru ta’ Detenzjoni Metropolitana ta’ Brooklyn.
Il-każ kontra kien wieħed mill-ogħla profil minn mindu tfaċċat il-moviment #MeToo, li ħeġġeġ lin-nisa biex jitkellmu dwar l-abbuż sesswali.
