Huma ħafna li jgħidu li dan iż-żmien tas-sena jġiegħlhom jidħlu f’qoxorthom.
Dan għaliex dan iż-żmien huwa sinonimu mat-tbatija, u allura kemm jekk tkun reliġjuż, kif ukoll jekk ma tkunx, dak li l-midja twassal f’dan iż-żmien jista’ jġiegħel lil xi wħud “jidħlu f’qoxorthom”.
Imma din hi biss frażi?
Għall-Knisja Kattolika, dan iż-żmien jirrappreżenta t-tbatija li għaddew minnha Marija, omm Ġesù, u Ġesù Kristu nnifsu.
Tbatija li tiġi deskritta u interpretata f’diversi modi, iżda fuq kollox riflessa fuq bosta individwi.
Li wieħed jirrifletti dwar ħajtu u dak li qed iseħħ madwaru hija xi ħaġa li wieħed għandu jagħmel kuljum, jew spiss, fl-opinjoni tiegħi. Ir-riflessjoni ġġibek aktar konxju tar-realtà, u tista’ wkoll tbiddillek ċerti perspettivi.
Id-domanda però hija din, jekk l-ispirtu ta’ dan iż-żmien iġegħlek tidħol f’qoxortok, u sirt aktar konxju ta’ dak li qed jiġri, x’se tagħmel dwar dan?
Se jisbaħ għada u terġa’ lura għal li kont? Se tibqa’ tistkenn f’dik il-qoxra? Jew se tieħu azzjoni?
Se tagħmel xi ħaġa biex tipprova tagħmel differenza fil-ħajja tiegħek u ta’ madwarek?
Li tirrifletti huwa tajjeb, iżda li tirrifletti biss mhuwiex biżżejjed. Huma l-imġiba u l-azzjoni li jiddefinixxu d-direzzjoni tat-triq li se tagħżel li timxi fil-vjaġġ ta’ ħajtek.
Int x’taħseb dwar dan?
Direttriċi u Editriċi
