Permezz ta’ kitba fuq il-paġna ta’ Facebook tagħha, il-kantanta Celine Agius tkellmet dwar sitwazzjoni li għaddejja minnha bħalissa hi u kantanti oħrajn.
Flimkien ma’ screenshot li tellgħet, li juri risposta ta’ xi ħadd li staqsietu jekk għandux spazju disponibbli għal gig, Celine qalet li llum il-ġurnata l-mużika tużaha biex tieħu gost u tirrilassa u fuq kollox biex tipprova taqla’ “lira” għaliha u għall-familja tagħha.
Il-kantanta qalet li qabel kienet toħroġ ħafna flus għall-mużika għall-apparat u biex toħroġ xi kanzunetta. “Ma ħadt xejn minn dan kollu. Illum il-prijoritajiet tiegħi huma differenti u l-ewwel prijorità hi li jien u dawk li nħobb ngħixu kemm jista’ jkun komdi meta u jekk ikun possibbli,” żiedet tgħid.
Immorru nsaqqfu wiċċna biex indoqqu ġo diversi bars u nagħmlu gigs…però tal-mistħija kif il-kantant/mużiċist huwa stmat hawn Malta…hija umiljanti kif iġiegħluk tħossok li qishom qed jagħmlulek pjaċir.
Celine qajmet ukoll il-punt dwar li skont il-fehma tagħha, xi sidien ta’ bars, restoranti u oħrajn jagħżlu dejjem l-istess nies u ma jagħtux ċans lil uċuħ differenti. Filwaqt li għamlitha ċara li mhijiex kontra li min hu kapaċi jibqa’ jingħata d-dawl li jixraqlu, saħqet li hemm nies oħrajn li għandhom il-kapaċitajiet tagħhom u għandhom x’joffru wkoll.
Ftakru li kulħadd għandu familja x’jitma. Imbilli tagħtu ċans lil nies oħra mhux se tagħmlu ħsara.. hawn diversi nies kapaċi. M’hemmx għalfejn noqogħdu nitkarrbu qisna tallaba.
