Dalgħodu, saret protesta minn grupp ta’ persuni f’San Ġiljan kontra l-ilbies tal-maskra għaliex skont huma għandu jkollhom dritt li joħorġu bla maskra. Uħud minnhom anki saħqu li t-tilqim m’għandux ikun bil-fors.
Waqt dan kollu, numru ta’ pulizija kienu preżenti biex iżommu l-ordni u jaraw li dawk li kienu preżenti josservaw il-liġi nkluż l-ilbies tal-maskri.
Il-ġurnalist tant maħbub Keith Demicoli temm il-karriera ġurnalistika tiegħu b’messaġġ emozzjonanti li ċertament nissel demgħa lil bosta.
Filwaqt li rringrazzja lill-ġenituri tiegħu u lil familja tiegħu li dejjem kienu warajh, huwa ta ħajr ukoll lill-kollegi tiegħu u lit-telespettaturi ta’ TVM għall-fiduċja, ir-rispett u l-imħabba li dejjem urewh.
It-tim ta’ skoperta.net jawgura lil Keith kull suċċess għall-futur.
Il-pandemija tal-Covid-19 affettwat lil kulħadd u kull qasam b’xi mod jew ieħor, inkluża l-industrija tal-arti. F’dawn l-aħħar jiem bosta artisti qed jesprimu t-tħassib serju tagħhom fuq il-midja soċjali dwar il-fatt li skont huma, din l-industrija mhux biss ġiet affettwata iżda mhijiex tingħata l-importanza u prijorità daqs kull industrija oħra. Dan ġej anki mill-fatt li filwaqt li qed jitnaqqsu ċerti miżuri, jidher li l-qasam tal-arti għadu ftit ‘il bogħod biex jikseb lura ftit normalità.
This Is A Call For Arts hija inizjattiva li bdiet minn Jeremy Grech, artist ta’ 24 sena, u qed titkompla minn diversi artisti li huma determinati li jservu ta’ vuċi għal din l-industrija u jagħtu s-sehem tagħhom fit-tibdil ta’ ċerta mentalità, li huma jsostnu li hija parti mill-problema.
Huma jisħqu li l-arti hija professjoni bħal kwalunkwe oħra u li għal uħud hija mezz ta’ kif jaqilgħu l-għixien tagħhom, għaldaqstant mhuwiex ġust li ma tittiħidx bis-serjetà. Diskors li qal il-Ministru José Herrera ilbieraħ qanqal ukoll diversi reazzjonijiet ta’ rabja, u ħafna sostnew li din hija prova ta’ dak li qiegħdin isemmgħu leħinhom għalih.
Għaddejja wkoll petizzjoni fejn qed jintalab pjan mill-Gvern dwar il-ftuħ mill-ġdid għall-arti performattiva. Il-petizzjoni tenfasizza dwar l-importanza tal-arti u li jrid jkun hemm pjan ta’ direzzjoni ċara għall-futur.
F’konferenza tal-aħbarijiet li saret ftit tal-ħin ilu, il-Prim Ministru Robert Abela ħabbar li mill-10 ta’ Mejju se jkomplu jitnaqqsu aktar miżuri, fosthom li r-ristoranti u l-isnack bars se jkunu jistgħu jerġgħu jiftħu imma sal-5pm, u wara jkunu jistgħu jkomplu s-servizz tagħhom permezz tat-take away. Ma’ kull mejda jista’ jkun hemm sa massimu ta’ 4 persuni.
Mill-10 ta’ Mejju wkoll se titneħħa r-restrizzjoni dwar sport professjonali fejn hemm kuntatt, u se jkun jista’ jerġa’ jibda t-taħriġ filwaqt li sport fejn m’hemmx kuntatt se jkompli kollu mingħajr spettaturi.
L-istess jgħodd għall-edukazzjoni tal-arti u attivitajiet ekstrakurrikulari, kif ukoll il-lezzjonijiet tad-duttrina. Is-swieq ukoll se jkunu jistgħu jerġgħu jibdew.
Se jitneħħew ukoll ir-restrizzjonijiet tal-ivvjaġġar bejn Malta u Għawdex.
Il-Prim MInistru qal li dan kollu qed isir wara diskussjonijiet mal-Awtoritajiet tas-Saħħa li jħarsu s-saħħa tal-Maltin u l-Għawdxin, u s-sagrifiċċji li kellhom jagħmlu f’dawn l-aħħar xhur in-negozji u l-ħaddiema.
Ir-Reġina Eliżabetta II qed timmarka għeluq il-95 sena tagħha, ftit jiem biss wara l-funeral tal-Prinċep Philip, ir-raġel tagħha għal 73 sena.
Imwielda f’Londra fil-21 t’April, 1926, ir-Reġina ġeneralment tiċċelebra għeluq sninha b’mod privat, iżda l-okkażjoni tkun immarkata pubblikament b’salut permezz ta’ sparar ċerimonjali f’Hyde Park, Windsor Great Park u Tower of London. Din it-tradizzjoni kellha titwaqqaf is-sena oħra, u anki din is-sena, mhux biss minħabba l-pandemija iżda wkoll minħabba li l-Familja Rjali tinsab uffiċjalment f’luttu sal-Ġimgħa.
Fi stqarrija maħruġa biex tikkonċidi ma’ għeluq sninha, ir-Reġina rringrazzjat lill-pubbliku għax-xewqat tajba tagħhom u qalet li kkomwoviet ruħha ħafna bil-ġieħ li qed jingħata d-Duka ta’ Edinburgu.
Ir-Reġina qalet li tapprezza ħafna l-bosta messaġġi ta’ xewqat sbieħ li rċeviet fl-okkażjoni tal-95 sena tagħha, u żiedet tgħid li filwaqt li bħala familja jinsabu f’perjodu ta’ dwejjaq kbar, huwa ta’ konsolazzjoni għalihom li jaraw u jisimgħu l-ġieħ li qed jingħata r-raġel tagħha l-Prinċep Philip, minn dawk fir-Renju Unit, il-Commonwealth u madwar id-dinja.
“Jien u l-familja tiegħi nixtiequ nirringrazzjawkom ilkoll għas-sapport u s-simpatija li wrejtuna f’dawn l-aħħar jiem”, filwaqt li żiedet tgħid li dan ifakkar l-impatt straordinarju li l-Prinċep Philip ħalla fuq għadd ta’ nies matul ħajtu kollha.
Minkejja li riċentament tnaqqsu xi restrizzjonijiet marbuta mal-Covid-19, ir-regoli ta’ distanza soċjali għadhom fis-seħħ fil-Gran Brittanja. Għaldaqstant, numru żgħir biss ta’ staff qed ikun ta’ servizz għar-Reġina fil-Kastell ta’ Windsor, fejn qattgħet aktar minn sena f’bubble, mal-Prinċep Philip.
Għalkemm mhux il-membri kollha tal-Familja Rjali jistgħu jqattgħu ħin flimkien, il-midja Ingliża rrapurtat li xi wħud mill-familja mistennija jingħaqdu mar-Reġina f’Windsor biex jimmarkaw għeluq sninha b’mod privat.
Minbarra l-jum attwali tagħha ta’ għeluq sninha f’April, Il-monarka għandha wkoll jum uffiċjali fejn tiċċelebra għeluq sninha, ġeneralment ikun it-tieni Sibt ta’ Ġunju.
Iċ-ċelebrazzjonijiet normalment jinkludu purċissjoni militari fuq skala kbira, magħrufa bħala Trooping the Colour. Ir-Reġina normalment tidher fil-gallarija tal-palazz Buckingham mal-familja tagħha għall-okkażjoni.
Kemm iċ-ċerimonji ta’ din is-sena kif ukoll tas-sena li għaddiet kellhom jiħassru minħabba l-pandemija.
L-eks uffiċjal tal-pulizija Derek Chauvin instab ħati li qatel lil George Floyd is-sena li għaddiet.
Derek Chauvin, ta’ 45 sena kien iffilmjat għarkupptejh fuq għonq Floyd għal aktar minn disa’ minuti.
Il-filmat qajjem ħafna reazzjonijiet u protesti mad-dinja kollha kontra r-razziżmu u l-użu eċċessiv tal-forza mill-pulizija.
Chauvin instab ħati fuq tliet akkużi: qtil fit-tieni grad, qtil fit-tielet grad u omiċidju.
Huwa se jibqa’ arrestat sakemm jiġi kkundannat u jista’ jqatta’ għexieren ta’ snin ħabs.
