Select Page
Roberta Metsola tirbaħ it-tellieqa għall-kandidatura Presidenzjali tal-PE

Roberta Metsola tirbaħ it-tellieqa għall-kandidatura Presidenzjali tal-PE

Ilbieraħ, l-MEP tal-Partit Nazzjonalista Roberta Metsola rebħet it-tellieqa biex tkun kandidata għall-elezzjoni Presidenzjali tal-Parlament Ewropew f’isem il-Partit Popolari Ewropew, fis-17 ta’ Jannar.

Iż-żewġ kandidati MPEs l-oħra kienu l-Awstrijak Othmar Karas u l-Olandiża Esther de Lange.

Hija kisbet 112-il vot minn 174 membru li vvutaw.

Il-Kap tal-Partit Nazzjonalista Bernard Grech feraħ lil Roberta Metsola tar-riżultat prestiġjuż u qal li Roberta għamlet isem għaliha u għal pajjiżna billi ddefendiet il-valuri Ewropej tal-libertà, il-verità u l-ġustizzja.

Bosta oħrajn esprimew fuq il-midja soċjali l-awguri tagħhom għal Roberta, fosthom Dr Lawrence Gonzi, Dr Simon Busuttil u David Casa.

F’intervista li saret fuq TVAM, li jixxandar fuq TVMNews+, Roberta Metsola qalet li jekk tkun eletta f’Jannar hija se tkun l-ewwel President mara fl-aħħar 20 sena u l-ewwel waħda minn pajjiż żgħir.

Hija qalet li se tkun kawta imma tinsab ottimista li tista’ tagħmel dak li ilha tagħmel minn meta kienet eletta, tibni l-pontijiet ma’ kull min hu lest li jaħdem għall-ġid tal-Maltin u l-Għawdxin kif ukoll għaċ-ċittadini tal-Unjoni Ewropea kollha.

Appell lill-pubbliku biex joqgħod ġewwa – Il-maltemp mistenni jippersisti sal-lejla

Appell lill-pubbliku biex joqgħod ġewwa – Il-maltemp mistenni jippersisti sal-lejla

Maltemp qawwi li qed jaħkem lill-gżejjer tagħna minn kmieni dalgħodu qed jikkawża għarar u diversi diffikultajiet fit-toroq.

Ċerti żoni f’Malta, intlaqtu aktar minn oħrajn, fosthom Burmarrad u l-Marsa.

Id-Dipartiment tal-Protezzjoni Ċivili u l-pulizija, li bħalissa għaddejjin ukoll b’ħidma ta’ salvataġġ, qed jappellaw lill-pubbliku biex joqgħod ġewwa kemm jista’ jkun u jevita żoni l-aktar maħkuma mill-maltemp.

Skont rapporti meteoroloġiċi, il-maltemp mistenni jibqa’ jippersisti sa tard illejla, b’possibilitajiet ta’ aktar xita qawwija, ragħad u silġ.

Il-futboler Karim Benzema jinstab ħati ta’ kompliċità fuq rikatt ta’ vidjow sesswali

Il-futboler Karim Benzema jinstab ħati ta’ kompliċità fuq rikatt ta’ vidjow sesswali

L-attakkant ta’ Franza u Real Madrid Karim Benzema instab ħati għall-involviment tiegħu fir-rikatt ta’ eks plejer internazzjonali fuq vidjow sesswali.

Il-futboler kien ikkundannat sena ħabs sospiża u mmultat €75,000.

L-avukati tiegħu saħqu li se jappellaw il-verdett.

Il-plejer ta’ 33 sena kien wieħed minn ħames persuni li tressqu ġuri x-xahar li għadda fuq attentat ta’ rikatt fuq Mathieu Valbuena.

Dan wassal liż-żewġ plejers jitilfu posthom fit-tim nazzjonali.

Il-każ imur lura għal Ġunju tal-2015, meta ż-żewġ futbolers kienu f’kamp ta’ taħriġ Franċiż.

Skont il-prosekuturi, Benzema għamel pressjoni fuq Valbuena biex iħallas lir-rikattaturi, li hu stess kien ikkonfoffa magħhom.

Benzema dejjem ċaħad l-allegazzjonijiet u saħaq li kien qed jipprova biss jgħin lil Valbuena jeħles mill-filmat kompromess.

Minn dakinhar il-plejer irritorna mat-tim ta’ Franza u mistenni jibda ma’ Real Madrid l-Erbgħa filgħaxija meta jilagħbu kontra FC Sheriff Traspol fiċ-Champions League. Il-verdett mhuwiex se jaffettwa xejn minn dan.

Benzema ma kienx preżenti fil-qorti f’Versailles għall-vetdett, u lanqas Valbuena li jilgħab mal-klabb Grieg Olympiakos.

Mara tallega li ġiet stuprata minn Diego Maradona meta kellha 16-il sena

Mara tallega li ġiet stuprata minn Diego Maradona meta kellha 16-il sena

Mavys Alvarez, Kubana ta’ 37 sena, li kellha relazzjoni mal-istilla tal-futbol Diego Maradona madwar 20 sena, qed tallega li l-eks plejer tal-Arġentina kien stupraha meta kellha 16-il sena u tgħid li serqilha t-tfulija.

Hija xehdet il-ġimgħa l-oħra quddiem il-qorti tal-Ministeru tal-Ġustizzja Arġentin li qed tinvestiga l-allegazzjonijiet tagħha.

Maradona, meqjus bħala wieħed mill-akbar stilel tal-futbol li qatt kien hawn, miet sena ilu fil-25 ta’ Novembru.

L-allegazzjoni tirrigwarda vjaġġ li Alvarez għamlet lejn l-Arġentina ma’ Maradona fl-2001 meta hu kellu madwar 40 sena u hi kellha 16-il sena.

Alvarez qalet li ltaqgħet mal-istilla tal-futbol għall-ewwel darba ftit qabel il-vjaġġ, meta kien Kuba biex jieħu trattament għall-vizzju tad-droga.

F’konferenza tal-aħbarijiet f’Buenos Aires, Alvarez qalet li Maradona kien stupraha fil-klinika ta’ fejn kien qed joqgħod, filwaqt li ommha kienet tinsab fil-kamra ta’ ħdejhom..

Hija qalet li Maradona għattielha ħalqha u abbużaha, u li dak il-mument serqilha t-tfulija tagħha.

Filwaqt li f’diversi drabi hija ddeskriviet ir-relazzjoni tagħhom bħala kunsenswali, iżda qalet ukoll li Maradona tal-inqas f’okkażjoni waħda sforza lilu nnifsu fuqha.

Alvarez qalet li l-familja tagħha ppermettiet biss ir-relazzjoni tagħha ma’ Maradona, minkejja d-differenza kbira fl-età, minħabba l-ħbiberija ta’ Maradona mal-eks President Kuban Fidel Castro.

Filwaqt li stqarret li ma kinitx faċli għaliha li tiżvela dak li ġara lilha f’pajjiż fejn Maradona hu meqjus bħala idolu, hija ssostni li ddeċidiet li tagħmel dan sabiex tgħin lil vittmi oħrajn b’kull mod li tista’.

“Il-pandemija qed isservi ta’ skuża biex tiġi kkontrollata l-prattika reliġjuża?” – Arċipriet

“Il-pandemija qed isservi ta’ skuża biex tiġi kkontrollata l-prattika reliġjuża?” – Arċipriet

Il-Fun Run tal-President li saret nhar il-Ħadd li għadda b’risq il-Community Chest Fund, u li għaliha n-nies attendew bi ħġarhom, qanqlet reazzjonijiet u mistoqsijiet.

Ħafna qiegħdin jiddubitaw mid-deċiżjoni tal-awtoritajiet tas-saħħa dwar l-attivitajiet tal-massa li qed jagħżlu li jagħtu permess li jsiru u dawk li qed jipprojbixxu.

Wara kontroversji li qamu dwar attivitajiet oħrajn, anki minħabba ż-żieda ta’ każijiet ġodda tal-Covid-19 li kellna matul dawn l-aħħar ġimgħat, kompliet tqajjem kontroversja l-Fun Run li saret f’24 lokalità, u li għaliha attendew madwar 7,000 persuna.

Fost dawk li kkummentaw fuq il-midja soċjali kien hemm l-Arċipriet tal-parroċċa ta’ San Ġorġ, f’Ħal Qormi, Mario Mangion.

Fuq il-paġna ta’ Facebook tiegħu staqsa x’inhi d-differenza bejn 100 ruħ mexjin biex jiġbru l-flus għall-karità u 100 ruħ mexjin wara xbieha ta’ Ġesù Bambin fil-Milied.

“Il-pandemija qed isservi ta’ skuża biex tiġi kkontrollata l-prattika reliġjuża?”

Huwa żied jgħid li filwaqt li jifhem li qiegħdin f’sitwazzjoni mhix normali, u li nixtiequ nkunu aħjar iżda jippretendi li kulħadd ikun trattat l-istess.

Jispikkaw kummenti xokkanti għal raġel li kien beħsiebu jwettaq suwiċidju

Jispikkaw kummenti xokkanti għal raġel li kien beħsiebu jwettaq suwiċidju

Intervent mill-pulizija dalgħodu salva l-ħajja ta’ raġel li kien beħsiebu jwettaq suwiċidju minn fuq is-sur tal-Belt Valletta.

Wara aktar minn sagħtejn, il-pulizija rnexxielhom jikkonvinċu lir-raġel biex jinżel minn fuq is-sur.

Filwaqt li spikka l-pulizija li għannaq lir-raġel hekk kif niżel minn fuq is-sur, spikkaw il-kummenti xokkanti ta’ ċerti nies li nġabru jsegwu u saħansitra jħeġġu lir-raġel iwettaq is-suwiċidju.

F’filmati li ttellgħu fuq il-midja, jinstemgħu persuni jiżżufjettaw bix-xena li kienu qed jaraw u jħeġġuh jagħmel li kien beħsiebu jagħmel.

Bosta esprimew fuq il-midja soċjali, ir-rabja u d-dispjaċir tagħhom għal dawn ir-reazzjonijiet xokkanti kif ukoll gratitudni lejn il-pulizija li bis-saħħa tagħhom ġiet salvata ħajja.

Inħeġġu dejjem lil kull min għaddej minn żmien diffiċli biex ifittex l-għajnuna li għandu bżonn.

Il-helpline ta’ Richmond Foundation huwa 1770

Enable Notifications    OK No thanks