Select Page
Bil-filmat: Beltin! Ulied il-Kapitali tal-Maltin!

Bil-filmat: Beltin! Ulied il-Kapitali tal-Maltin!

“Għadhom il-passi jidwu tal-istorja” – Dan huwa l-ewwel vers tal-kanzunetta, Beltin, li ġiet imnedija jumejn ilu, b’dedika lill-Beltin kollha, u l-Belt Kapitali ta’ Malta, Valletta, li fiha nnifisha hija STORJA.

Din il-kanzunetta li hi ferm profonda u patrijottika, hija miktuba mill-pinna ta’ George Peresso, filwaqt li l-mużika hija ta’ Ludwig Galea, li wkoll ikanta din il-kanzunetta flimkien mar-reġina tal-Mużika Maltija, Mary Spiteri, b’arranġament mużikali ta’ Sean Vella.

Kanzunetta li tiġbor fiha dak kollu li l-Belt Kapitali tagħna għaddiet minnu fl-istorja, li ħarġet rebbieħa minn fuq l-għeddewa qerrieda.

Fil-fatt, Beltin hija riflessjoni tal-pjan u l-ħajja storika tal-Belt Valletta għaliex din il-kanzunetta titkellem dwar il-kobor ta’ din il-belt unika, li ġiet imfassla mill-Gran Mastru Jean Parisot De Valette u hija sit ta’ wirt dinji tal-UNESCO u nbniet taħt l-Ordni tal-Kavallieri ta’ San Ġwann. Beltin titkellem fost l-oħrajn dwar l-aspetti ewlenin li jsawruha u anki dwar it-tiġrif tal-Belt Valletta fit-Tieni Gwerra Dinjija u r-reżistenza u l-perseveranza tagħha.

Il-Belt Valletta li hija teżor għal Malta mimlija binjiet uniċi, b’palazzi, teatri u Katidral maestuż, li d-dinja qatt ma rat bħalu. U ma nistgħux ma nsemmux il-briju tan-nies Beltin li jimlew lejl u nhar, b’ferħ kbir il-Belt Kapitali tal-Maltin.

X’qed tistenna mur u ismagħha din il-kapulavur! U kif tkun fiż-żifna idħol u ara il-vidjow mużikali, li f’inqas minn 24 siegħa diġà rawh 15,000 persuna!

Prosit kbira tmur lejn dawk kollha li ħadmu biex aħna stajna nisimgħu u naraw din il-ġawhra ta’ kanzunetta.

24 sena mill-mewt tal-kantant Lucio Battisti

24 sena mill-mewt tal-kantant Lucio Battisti

24 sena ilu, fl-1998 il-mużika Taljana kienet tilfet wieħed mill-aktar esponenti sinifikanti tagħha. Dan mhu ħadd ħlief Lucio Battisti. Huwa kellu 55 sena u miet fl-isptar San Paolo ta’ Milan fejn kien ilu rikoverat mill-aħħar ta’ Awwissu.

Battisti huwa meqjus bħala wieħed mill-aktar kantawturi u kompożituri magħrufa u influwenti fl-istorja tal-mużika pop/rock Taljana. Huwa beda l-karriera tiegħu fl-1966 u mill-1969 sal-1994 ħareġ 18-il album f’pajjiżu.

Fost il-kanzunetti popolari tiegħu nsibu: ‘I Giardini di Marzo’, ‘Il Mio Canto Libero’, ‘Emozioni’, ‘Un’Avventura’ u ‘Acqua Azzurra, Acqua Chiara’.

Huwa kien segwit immens kemm f’art twelidu, kif ukoll fuq din iċ-ċkejkna gzira tagħna. Fil-fatt, il-kanzunetti tiegħu għadhom jindaqqu ta’ sikwit fuq l-istazzjonijiet tar-radju lokali.

Li kieku għadu magħna, illum Freddie Mercury kien jagħlaq 76 sena

Li kieku għadu magħna, illum Freddie Mercury kien jagħlaq 76 sena

Bħal-lum 76 sena ilu twieled wieħed mill-iktar kantanti fenomenali li qatt rat din id-dinja. Dan mhu ħadd ħlief Freddie Mercury. Fil-fatt huwa twieled nhar il-5 ta’ Settembru tal-1946, ġewwa Zanzibar, it-Tanżanija.

Apparti li kien kantant li jifforma parti mill-‘Queen’ u kittieb Ingliz tar-rock, Freddie Mercury jibqa’ mfakkar għall-ispettaklu li kien jagħmel u l-vokali b’aġilità qawwija tiegħu. Għal dan huwa jibqa’ wieħed mill-aktar ‘frontmen’ dinamiċi.

Waħda mill-iktar kanzunetti popolari tal-band u li hija wkoll miktuba minnu stess hija “Bohemian Rhapsody”. Fil-fatt din il-kanzunetta qattgħet disa’ ġimgħat fil-quċċata tal-klassifika tas-singles Brittaniċi.

Suċċess spettakolari segwa fl-1977 b’ “We Are the Champions” u “We Will Rock You”, li saru innijiet li jindaqqu kullimkien f’avvenimenti sportivi madwar id-dinja.

Fl-1991 Mercury ħabbar li kien marad bl-AIDS. Fil-fatt huwa miet jum wara, fl-24 ta’ Novembru, fl-eta ta’ 45 sena minn kumplikazzjonijiet relatati mal-marda.

Tina Turner: Bħal-lum 38 sena ilu ‘What’s Love Got To Do With It’ telgħet fil-quċċata tal-klassifika

Tina Turner: Bħal-lum 38 sena ilu ‘What’s Love Got To Do With It’ telgħet fil-quċċata tal-klassifika

Bħal-lum 38 sena ilu, fl-1 ta’ Settembru 1984, id-diska “What’s Love Got To Do With It” telgħet fil-quċċata tal-klassifika. Din il-kisba fl-ewwel post kienet tal-ewwel għal Tina Turner bħala artista solista.

Kontu tafu li din il-kanzunetta nkitbet minn Terry Britten u Graham Lyle, u li oriġinarjament offrewha lil Cliff Richard, iżda din ġiet irrifjutata?

Għal min għex f’dawn iż-żminijiet żgur mhux forsi li semgħuha kemm fuq ir-radju, fuq xi cassette player jew fuq xi LP player, però ż-żgħażagħ tal-lum qatt semgħuha?

Lyndsay se tkun qed tniedi l-album il-ġdid tagħha Dopamine – Meta u fejn?!

Lyndsay se tkun qed tniedi l-album il-ġdid tagħha Dopamine – Meta u fejn?!

Lyndsay Pace se tkun qiegħda tniedi l-album uffiċjali tagħha “Dopamine”, fuq stil pop b’kollaborazzjoni ma’ Highkey Music fl-20 ta’ Settembru ġewwa Ivy House, Pembroke b’wirja verament speċjali!

Fil-fatt, Lyndsay se tkun qiegħda tagħmel sessjoni unplugged mal-band tagħha u se tkun qiegħda tniedi wkoll ħames kanzunetti ġodda li għadhom ma nstemgħux.

Waqt dan il-kunċert, is-segwaċi tagħha se jkollhom l-opportunità li jixtru kopji limitati ta’ dan l-album bi prezz raġonevoli.

L-album “Dopamine” jinkludi 12-il kanzunetta b’kollox, li minnhom diġà smajna fuq ir-radjijiet lokali matul din is-sena u se jkunu wkoll disponibbli fuq il-pjattaformi diġitali kollha.

Għal aktar tagħrif tistgħu ssegwu l-aġġornamenti minn hawnhekk.

45 sena mill-mewt ta’ Elvis

45 sena mill-mewt ta’ Elvis

Diġà għaddew 45 sena mill-mewt ta’ Elvis Aaron Presley jew kif inhu magħruf aħjar bħala Elvis. Kellu biss 42 sena.

L-interpretazzjonijiet uniċi tal-kanzunetti tiegħu u l-istil tal-prestazzjoni għamluh bħala l-“King tar-Rock and Roll”. Huwa wkoll meqjus bħala wieħed mill-aktar figuri kulturali sinifikanti tas-seklu 20.

Id-dinja kollha kienet imnikket ħafna bil-mewt tiegħu, u nuqqas tiegħu għadu jinħass sal-lum. Fil-fatt il-President ta’ dak iż-żmien, Jimmy Carter kien ħareġ stqarrija li akkredita lil Presley li “biddel b’mod permanenti l-wiċċ tal-kultura popolari Amerikana”.

Is-suċċess tiegħu kien inkredibbli. Biss biss kellu 18-il diska li għamlitha fl-ewwel pożizzjoni fiċ-‘charts’. Fost id-diski popolari u li għadhom jindaqqew sal-lum insibu: Heartbreak Hotel, Suspicious Minds, Love Me Tender, fost ħafna oħrajn.

Għal dawk kollha li kienu u għadhom iħobbu lil dan l-ikona tal-mużika din is-sena ħareġ film bijografiku mużikali dwar il-ħajja ta’ Presley, bl-isem ta’ ‘Elvis’. Austin Butler huwa l-attur li qed jinterpreta lil Presley, filwaqt il-Kurunell Tom Parker qed jiġi interpretat minn Tom Hanks.

Enable Notifications    OK No thanks