by Jackie Busuttil | 20/Sep/21 | Riċetti, Varjetà
Għandek bżonn (kemm toħroġ porzjonijiet jiddependi mir-reċipjent li se sservi fihom):
Bott (410g) ħalib magħqud (condensed)
250g irkotta
Fergħa waħda taż-żafran, jew kuċċarina trab taż-żafran
Mgħarfa ħalib sħun
Għat-tiżjin:
Lewż imfarrak
Biċċiet taċ-ċikkulata
Metodu:
- Ġo kikkra ħallat iż-żafran mal-ħalib sħun sakemm idub. Ħallih jibred sew.
- Ġo skutella kbira ħawwad flimkien, il-ħalib magħqud, l-irkotta u it-taħlita tal-ħalib u ż-żafran.
- Għatti l-iskutella fil-clingfilm u poġġiha fil-friġġ għal bejn siegħa u sagħtejn.
- Meta tkun lesta biex isservi id-deżerta, aqsam it-taħlita fr-reċipjenti żgħar u żejjen bil-lewż u biċċiet taċ-cikkulata.
Varjazzjoni: Biex tagħmel Rabdi taċ-ċikkulata, ħallat mgħarfa kawkaw mal-ħalib magħqud.
L-ikla t-tajba!
Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net
by Jackie Busuttil | 13/Sep/21 | Riċetti, Varjetà
Għandek bżonn:
Brungiela kbira
12-il slajs kbira tadam
12-il slajs mozzarella
Bżar u melħ
Kuċċarina żejt taż-żebbuġa
Kuċċarina riegnu
Metodu:
- Laħlaħ il brunġiela taħt l-ilma u nixxifha sew b’karti tal-kċina.
- Poġġiha fuq platt ċatt u bil-mod aqta’ 6 flieli mit-tul, mingħajr ma tasal sa ħdejn iz-zokk bis-sikkina biex il-brunġiela tibqalek sħiħa.
- Roxx ftit melħ bejn kull felli. M’hemmx għalfejn ħafna melħ.
- Issa poġġi xi oġġett żgħir taħt naħa waħda tal-platt biex joqgħod ftit immejjel. Ħallih hekk għal 5 minuti ħalli jinżel il-likwidu li jkollha l-brunġiela.
- Sadanittant ixgħel il-forn fuq nar medju, u lesti pjanċa tal-forn u iksiha b’karta tal-forn.
- Poġġi l-brunġiela fuq il-pjanċa tal-forn, u bil-mod ibda imla bejn il-flieli. Poġġi żewġ slajsis tadam u żewg slajsis mozzarella bejn kull felli.
- Roxx iż-żejt u r-riegnu fil-wiċċ tal-brungiela u aħmiha fil-forn għal bejn 30 u 40 minuta, sakemm tara f’sikkina li l-brunġiela saret.
- Għal varjazzjoni oħra, tista’ żżid slajs perżut u ftit weraq frisk tal-ħabaq bejn kull felli tal-brunġiela.
L-ikla t-tajba!
Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net
by Jackie Busuttil | 06/Sep/21 | Riċetti, Varjetà
Għandek bżonn (għal dixx ta 9”):
Għall-mili:
Sitt tuffiħat imqaxxrin u imqattgħin fi flieli rqaq
10 imgħaref ilma
Nofs kuċċarina nocemuskata
Nofs kuċċarina cinnamon
Mgħarfa zokkor. (Jekk tipreferi li ma tiġikx ħelwa ħafna, għalli t-tuffieħ mingħajr ma żżid iz-zokkor)
Għall-crumble:
300g dqiq plain
Niskata melħ
175g zokkor ismar
200g butir imqatta’ dadi
Ftit butir biex idellek id-dixx
Metodu:
- Poġġi l-ingredjenti kollha tal-mili ġo kazzola u sajjar fuq nar baxx għal 10 minuti.
- Ixgħel il-forn u ħallih jisħon fuq 180.
- Idlek id-dixx li se tuża bil-butir.
- Sadanittant ġo skutella ħallat id-dqiq, iz-zokkor l-ismar u l-melħ.
- Ħawwadhom sew u mbagħad ibda żid il-butir ftit ftit u ħawwad b’idejk sakemm tkun żidt il-butir kollu u jkollok taħlita tixbaħ lill-frak tal-ħobż.
- Issa saffi it-tuffieħ mill-ilma u rranġa l-biċċiet tat-tuffieħ fil-qiegħ tad-dixx.
- Ferrex it-taħlita tal-crumble fil-wiċċ. Kemm jista’ jkun għatti it-tuffieħ kollu.
- Daħħal id-dixx fil-forn u aħmi għal 45 minuta sakemm il-wiċċ jieħu kulur dehebi.
- Serviha sħuna ma’ ġelat jew custard.
L-ikla t-tajba!
Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net
by Jackie Busuttil | 30/Aug/21 | Riċetti, Varjetà
Għandek bżonn (għal 4 porzjonijiet):
250g ross tat-tip Arborio
Mgħarfa żejt taż-żebbuġa
200g koxox tat-tiġieġ mingħajr ġilda u mingħajr għadam, imqattgħin f’biċċiet ‘bitesized’
200g Chorizo imqatta’
500ml stokk tat-tiġieġ
50ml inbid abjad
Kuccarina trab taż-żafran
Basla kbira mqatta’ rqiqa
Żewġ sinniet tewm imqattgħin irqaq
Żewġ tadamiet kbar imqaxxrin u imqattgħin f’biċċiet żgħar
Bżaru aħmar minn li jaħraq, imqatta’ rqiq ħafna
Bżaru ħelu tal kulur, imqatta’ rqiq
Nofs kuċċarina ‘sweet paprika’
Kuċċarina meraq tal-lumi
50g piżelli tal-friża
Metodu:
- F’kazzola fonda, ferra l-istokk, l-inbid, u ż-żafran.
- Sajjar fuq nar medju sakemm jiftaħ jagħli. Neħħi minn fuq in-nar, għattih u warbu għal aktar tard.
- F’taġen fond li ma jweħħilx (preferibbilment 9”), Aqli l-chorizo fuq nar baxx għal żewġ minuti.
- Neħħiha mit-taġen u warrabha.
- Fl-istess taġen żid il-biċċiet tat-tiġieġ u aqlihom fuq nar baxx għal madwar 6 minuti jew sakemm jibdew jieħdu ftit kulur. Neħħi mit-taġen u warrabha.
- Issa żid iż-żejt fit-taġen u kif jisħon, żid il-basla u it-tewm. Aqli għal 5 minuti u ħawwad spiss.
- Żid it-tadam, il-bżaru li jaħraq, il-bżaru il-ħelu, il-paprika, u l-meraq tal-lumi.
- Ħawwad u sajjar fuq nar baxx għal 5 minuti.
- Żid it-tiġieġ u l-chorizo u ħawwad.
- Żid ir-ross u ħawwwad. Żid it-taħlita tal-istokk, għolli n-nar u erġa’ ħawwad sewwa. Ħawwad darba biss u terġax tħawwad darb’oħra sakemm it-tisjira kollha tkun lesta.
- Kif taraħ ħa jiftaħ jagħli, baxxi n-nar u ħallih itektek mikxuf għal 20 minuta.
- Terġax tħawwdu fl-ebda ħin!
- Wara 20 minuta, ferrex il-pizelli fil-wiċċ. Għatti t-taġen u ħallih itektek għal 5 minuti.
- Neħħih min fuq in-nar, ikxfu u ħallih joqgħod għal 5 minuti qabel isservi.
L-ikla t-tajba!
Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net
by Jackie Busuttil | 23/Aug/21 | Riċetti, Varjetà
Għandek bżonn (għal 4 porzjonijiet):
4 bananiet
150g dqiq plain
Kuċċarina baking powder
Nofs kuċċarina melħ
150ml ilma
Żejt biex taqli
Metodu:
- Poġġi 50g mid-dqiq fuq platt ċatt.
- Fi platt fond ħallat il-100g dqiq, il-baking powder u l-melħ.
- Żid l-ilma ftit ftit u ħawwad kontinwament b’whisk tal-ħadid sakemm ikollok taħlita lixxa.
- Sadanittant ibda saħħan iż-żejt f’kazzola jew taġen fond. Irid ikollok biżejjed żejt biex tagħmel ‘deep fry’.
- Ipprepara l-banana billi tqaxxarha u taqsam kull banana fi tlett biċċiet.
- Rembel kull biċċa banana fid-dqiq li għandek fil-platt iċ-ċatt, u eżatt wara niżżilha fit-taħlita tad-dqiq u l-ilma. Ara li tkun inksiet kollha sew bit-taħlita.
- Kompli sakemm tkun ksejt il-biċċiet kollha tal-banana.
- Kif tara li ż-żejt qed jagħli niżżel bil-mod il-biċċiet tal-banana fih u aqlihom sakemm tara li l-panura intefħet xi ftit u ħadet kulur dehebi.
- Tella’ l-biċċiet tal-banana miż-żejt u poġġihom fuq karta tal-kċina u għattihom b’karta oħra biex jixorbu kemm jista’ jkun miż-żejt.
- Servi mill-ewwel mal-ġelat preferut tiegħek.
L-ikla t-tajba!
Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net
by Jackie Busuttil | 16/Aug/21 | Riċetti, Varjetà
Għandek bżonn (għal 4 porzjonijiet):
500g għaġin cellentani – mgħolli al dente
200g pancetta, imqatta’ dadi
Żewġ tadamiet kbar, imqatta’ dadi
200ml krema friska
Vażett ta’ 190ml pesto tal-ħabaq
Mgħarfa butir
100ml inbid abjad
100ml ħalib
Basla kbira mqatta’ rqiqa
Żewġ sinniet tewm imqatta’ rqiq
Kuċċarina hot paprika
Kuċċarina ħwawar imħallta
Kuċċarina tursin
Bott żgħir faqqiegħ imqatta’, jew 4 faqqiegħ kbar friski
Niskata melħ u bżar
50g ġobon maħkuk
Metodu:
- Ara li tkun lestejt u warrabt l-għagin mgħolli u mlaħlaħ taħt ilma kiesaħ.
- Dewweb il-butir ġo taġen fond. Żid il-basla u t-tewm u qalli għal madwar 5 minuti sakemm il-basla tirtab.
- Żid il-faqqiegħ, il-pancetta, l-ilma, l-inbid, il-ħwawar imħallta, il-hot paprika, il-melħ u l-bżar.
- Ħawwad sew u ħallih itektek fuq nar baxx għal 10 minuti, ħawwad spiss.
- Issa żid il-ħalib, il-pesto u l-krema friska. Ħawwad sew fuq nar baxx, sakemm tara li ma baqalekx biċċiet u z-zalza tieħu konsistenza ta’ krema ftit magħquda.
- Ħallih itektek għal 5 minuti, u mbagħad żid l-għaġin, il-ġobon maħkuk u t-tursin.
- Ibqa’ ħawwad sew fuq nar baxx għal ftit minuti sakemm tara li l-għaġin saħan u nkesa biz zalza.
- Neħħih minn fuq in-nar u servi mill-ewwel.
L-ikla t-tajba!
Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net
