Select Page
Ed Sheeran jgħid li kważi qatel lil Elton John waqt il-ġbid tal-vidjow mużikali tal-Milied

Ed Sheeran jgħid li kważi qatel lil Elton John waqt il-ġbid tal-vidjow mużikali tal-Milied

F’intervista, Ed Sheeran żvela storja li minkejja taf tnissel tbissima wkoll setgħet spiċċat ħażin!

Sheeran qal li f’mument waqt il-ġbid tal-vidjow mużikali tal-kanzunetta li niedew ftit ġranet ilu, Merry Christmas, kważi qatel lil Elton John.

Huwa qal li fix-xena fejn hu jidher liebes ta’ “sexy santa”, ta’ daqqa ta’ sieq lil rigal li fuqu kellu qanpiena kbira tal-metall, li taret u għaddiet bl-eżatt minn ħdejn ras Elton John.

Kurżità oħra interessanti hija li attriċi u żeffiena Maltija ħadet sehem fil-vidjow mużikali!

Giulia Rose, li tgħix Londra, ġiet infurmata ġurnata biss qabel il-ġbid li kienet ġiet magħżula biex tkun parti minn dan il-vidjow mużikali.

L-artista Maltija qalet li kien biss meta rathom li bdiet temmen li kellha opportunità bħal dik ma’ żewġ stilel tal-mużika. Hija tiddeskrivi l-esperjenza bħala waħda li ma tinsa qatt.

L-istilla ta’ Bad Habits, ta’ 30 sena u l-leġġenda tal-mużika Sir Elton John, ta’ 74 sena, niedew il-kollaborazzjoni tagħhom il-ġimgħa li għaddiet.

Il-kanzunetta bħalissa riesqa lejn in-numru 1 fil-klassifika tas-singles tar-Renju Unit u hija waħda mit-tliet kanzunetti tal-festi li John u Sheeran kitbu flimkien.

Din il-kanzunetta hija l-ewwel diska tal-Milied ta’ Sheeran, filwaqt li John huwa magħruf għall-kanzunetta tiegħu tal-Milied tal-1990 Step Into Christmas.

Huwa mifhum li l-Vidjow mużikali huwa maħdum biex jagħti ġieħ lil xi kanzunetti klassiċi tal-Milied u joħloq mill-ġdid xeni emblematiċi minn Last Christmas ta’ Wham, Merry Christmas Everyone ta’ Shakin’ Stevens, Walking in the Air ta’ The Snowman u Stay Another Day ta’ East 17.

L-istilla ta’ Gladiator Russell Crowe jinsab Malta għal film ġdid!

L-istilla ta’ Gladiator Russell Crowe jinsab Malta għal film ġdid!

L-istilla ta’ Gladiator, Russell Crowe jinsab Malta! Din id-darba intlemaħ ma’ crew ta’ produzzjoni li qed jiffilmjaw f’diversi postijiet f’Malta.

Skont sorsi fl-industrija, l-istilla Awstraljana x’aktarx se jqatta’ l-ġimgħa f’Malta jiffilmja Prizefighter, film biopic dwar il-puġilist tas-seklu 19 bl-isem ta’ Jem Belcher.

Huwa qed itella’ ritratti ta’ postijiet f’Malta fuq Twitter u jistaqsi lis-segwaċi tiegħu jekk jafux fejn qiegħed.

L-attur ħadem f’Gladiator, taħt id-direzzjoni ta’ Ridley Scott fl-1999, li għalih Crowe u t-tim tal-produzzjoni qattgħu 19-il ġimgħa f’Malta b’Forti Rikażli bħala sostitut ta’ Ruma l-Antika. Ċertament li huwa mill-films favoriti tal-Maltin ta’ kull żmien.

Madwar ġimagħtejn ilu, Crowe kien qed jiffilmja fit-Tajlandja mal-attur Zac Efron. Iż-żewġ atturi għandhom jidhru f’film ibbażat fuq il-ktieb bl-isem ta’ The Greatest Beer Run Ever.

Xi jfissru l-kuluri tal-bandiera tal-Pride?

Xi jfissru l-kuluri tal-bandiera tal-Pride?

F’dawn l-aħħar ftit snin, il-bandiera tal-komunità LGBTQIA+ inbidlet għal waħda kemxejn differenti minn dik ta’ qabel, li kienet qawsalla sempliċi bil-kuluri mill-aħmar sal-vjola.

Il-bandiera l-ġdida tissejjaħ Progress Pride Flag, ġiet maħluqa mid-disinjatur diġitali Daniel Quasar fl-2018.

Xi jfissru l-kuluri tal-bandiera tal-Pride? Għaliex id-disinn il-ġdid għandu wħud mill-kuluri mqiegħda f’forma differenti milli f’linja bħal qabel?

Il-bandiera tal-Pride preċedenti, li kienet is-simbolu distintiv tal-Pride LGBTQIA+ mill-aħħar tas-sebgħinijiet sal-bidu tas-snin 2000, u li għadha popolari, kienet magħmula minn sitt linji kkuluriti orizzontali: aħmar, oranġjo, isfar, aħdar, blu u vjola.

Din Il-bandiera kienet pedament għal bosta għexieren ta’ snin qabel id-disinn il-ġdid. Madanakollu, inħolqu varjazzjonijiet differenti matul iż-żmien.

Kull kulur tal-bandiera tal-Pride għandu tifsira differenti, u kull kulur jirrappreżenta valur importanti tal-komunità LGBTQIA+.

L-aħmar:

L-aħmar fil-bandiera jirrappreżenta l-ħajja. Dan jagħmel sens jekk taħseb dwar kif id-demm huwa aħmar u kemm-il darba d-demm huwa meqjus bħala forza vitali tal-ħajja tal-ġisem. L-aħmar jirrappreżenta wkoll il-passjoni fost ħafna kulturi.

L-oranġjo:

L-oranġjo jirrappreżenta l-fejqan. Bħala kulur, l-oranġjo huwa maħsub li huwa kulur divertenti u ċelebrattiv. Il-gost u ċ-ċelebrazzjoni huma t-tnejn attivitajiet ta’ fejqan.

L-isfar:

Jekk qtajt li l-isfar jirrappreżenta d-dawl tax-xemx, tkun korrett. Il-kulur isfar jiffunzjona bħala ċ-ċentru radjanti u qawwi tal-bandiera. Jingħad ukoll li l-kulur isfar jistimula ideat u ħsibijiet ġodda.

L-aħdar:

Hemm ħafna aħdar fin-natura, li huwa dak li l-kulur fuq il-bandiera oriġinali tal-Pride huwa maħsub li jwassal. In-natura hija post ta’ fejqan, u l-kulur aħdar huwa assoċjat mal-prosperità u t-tkabbir.

Il-blu:

Il-blu fil-bandiera oriġinali tal-Pride kien għas-serenità. Ftit huwa aktar importanti milli tħossok kalm u trankwill. Il-blu huwa magħruf bħala kulur rilassanti. Spiss jintuża wkoll għal prodotti li jintużaw filgħaxija biex jirrappreżenta l-irqad u l-kalma.

Il-vjola:

L-aħħar kulur, il-vjola, jirrappreżenta l-ispirtu. Il-vjola spiss jitqies bħala kulur regali u rjali li, minnu nnifsu jindika l-kunċett tal-Pride. Bħall-blu, il-vjola huwa meqjus bħala kulur paċifiku, iżda aktar milli hu assoċjat biss mal-kalma, jingħad li l-kulur vjola jgħaqqadna mal-qasam spiritwali.

Xi jfissru l-kuluri ġodda miżjuda fil-bandiera l-ġdida?

Il-bandiera tal-Progress Pride inħolqot bl-ispirazzjoni ta’ bnadar tal-Pride oħra. Speċifikament, il-bandiera tal-Philadelphia Pride mill-2017 u l-bandiera tat-trans.

Il-bandiera tal-Philadelphia Pride kellha strixxi vertikali suwed u kannella miżjuda. Il-bandiera tat-trans, maħluqa fl-1999, hija roża, blu ċar (baby blue), u bajda. Dawn iż-żewġ bnadar ispiraw id-disinn tal-bandiera l-ġdida tal-pride.

L-iswed u l-kannella jirrappreżentaw lin-nies ta’ karnaġġjon skur.

Il-bandiera tal-Philadelphia Pride ġiet iddisinjata mill-Uffiċju tal-Affarijiet LGBT ta’ Philadelphia u saret bi sħubija mal-aġenzija tar-reklamar Tierney. Ġiet introdotta f’ċerimonja tas-City Hall f’Ġunju tal-2017. Il-bandiera wriet is-sitt kuluri tradizzjonali tal-qawsalla fi strixxi orizzontali, bi strixxa sewda u kannella fuqhom.

Il-kuluri iswed u kannella ġew miżjuda mal-bandiera tal-Progress Pride biex jirrappreżentaw lin-nies ta’ karnaġġjon skur. Din kienet żieda importanti għaliex in-nies ta’ karnaġġjon spiss tħallew barra min-narrattiva tal-queer minkejja li huma l-forza li tmexxi l-moviment.

Kien biss fis-snin riċenti li s-soċjetà rrikonoxxiet li l-moviment tal-pride oriġina bis-saħħa ta’ attivisti transġeneri ta’ karnaġġjon skur bħal Marsha P. Johnson, li b’mod notorju ġġieldu kontra l-pulizija f’Stonewall Inn f’Ġunju tal-1969. Il-maġġoranza tal-membri tal-irvellijiet ta’ Stonewall kienu ta’ karnaġġjon skur, u ħafna minnhom kienu transġeneri.

Permezz tal-moviment Black Lives Matter, il-kultura b’mod ġenerali bdiet tinbidel b’mod tant meħtieġ lejn ir-rikonoxximent tar-rwolo vitali li n-nies ta’ karnaġġjon skur kellhom fis-soċjetà.

Barra minn hekk, l-istrixxi suwed u kannella huma maħsuba biex jirrappreżentaw ukoll lin-nies li jgħixu bl-HIV/AIDS, dawk li mietu biha, u l-istima dwar dan il-virus li għadha preżenti fis-soċjetà.

Ir-roża, il-baby blue u l-abjad jirrappreżentaw lin-nies transġeneri.

Monica Helms, li hija persuna trans, ħolqot il-bandiera tal-pride tat-transġeneri, li ġiet introdotta għall-ewwel darba f’parats tal-pride f’Fenix, Arizona lura fl-2000. Monica Helms hija attivista transġeneru, awtriċi, u veterana tan-Navy tal-Istati Uniti.

Tradizzjonalment, il-kuluri roża u blu kienu jintużaw biex jirrappreżentaw jekk tarbija hix tifel jew tifla. Hawnhekk, il-kuluri juru dawk is-sessi. Il-kulur abjad jirrapreżenta lin-nies li qed jagħmlu transizzjoni, intersesswali, jew jidentifikaw barra mill-binarju tal-ġeneru.

Il-kelma “progress” fil-bandiera l-ġdida mhix biss dwar ż-żieda fil-kuluri l-ġodda magħha. Huwa wkoll minħabba l-forma, li hija differenti mid-disinn oriġinali ta’ strixxi orizzontali biss. Il-bandiera tal-Progress Pride turi l-istrixxi bojod, roża, blu, suwed u kannella f’forma ta’ trijangolu, bil-qawsalla tradizzjonali ta’ sitt kuluri mqiegħda ħdejhom.

Dan sar intenzjonalment biex tispikka u titwassal l-importanza tal-kwistjonijiet rappreżentati fuq ix-xellug.

It-tqegħid tal-kuluri l-ġodda f’forma ta’ vleġġa huwa maħsub biex iwassal il-progress dwar id-drittijiet li għadu meħtieġ.

Għalkemm s’issa din il-bandiera għadha mhix tidher kullimkien, iżda qed tkompli tevolvi, b’bandiera differenti li ġiet introdotta din is-sena, li hija spin-off tal-bandiera Progress. Tinkludi trijangolu isfar b’ċirku vjola ġewwa fih għal persuni intersesswali u kien iddisinjat minn Valentino Vecchietti.

Bħal-lum 103 snin ilu twieled Nelson Mandela

Bħal-lum 103 snin ilu twieled Nelson Mandela

Nelson Mandela kien l-ewwel President Afrikan ta’ karnaġġjon skur, tal-Afrika t’isfel mill-1994 sal l-1999. Huwa serva biss bħala president għal mandat wieħed.

Huwa magħruf partikolarment għas-sehem tiegħu fil-moviment li ġġieled biex itemm l-apartheid fl-Afrika t’Isfel.

Nelson Mandela kien determinat li jagħti l-kontribuzzjoni tiegħu stess fil-ġlieda għal-libertà tal-poplu tiegħu minn meta kien għadu tifel żgħir.

Bħala politiku u attivist tad-drittijiet soċjali, Mandela nvolva ruħu f’attiviżmu tad-drittijiet tal-bniedem waqt li kien fil-Kulleġġ tal-Università ta’ Fort Hare u ġie mkeċċi talli ħa sehem fi protesta.

Ħafna minna familjari mal-priġunerija ta’ Nelson Mandela u x-xogħol tiegħu kontra l-apartheid, imma skoprejna ftit affarijiet li forsi ma tafx dwar dan il-mexxej dinji ta’ ispirazzjoni, li twieled proprju fit-18 ta’ Lulju tal-1918.

  • Nelson Mandela għamel 18-il sena ħabs solitarju.

Huwa kien il-ħabs mill-1962 sal-1990 għal tradiment u konspirazzjoni kontra l-gvern. Ġie kkundannat għall-għomor il-ħabs, iżda ġie meħlus kmieni meta l-ANC reġgħet saret legali. Huwa qatta’ 18-il sena fil-ħabs ta’ Robben Island, u 9 snin il-ħabs ta’ Pollsmoor f’Tokai, Cape Town. Il-kundizzjonijiet kienu aħjar f’Cape Town.

  • In-numru tal-ħabs ta’ Nelson Mandela kien 46664.

In-numru jindika li kien il-466 priġunier tal-1964. Huwa kien jgħożż dan in-numru tant li għamlu l-isem tal-kampanja tiegħu ta’ għarfien dwar l-HIV/AIDS u l-isem ta’ sensiela ta’ kunċerti tal-karità.

  • Nelson Mandela pparteċipa fil-ġlieda kontra l-HIV/AIDS fl-Afrika t’Isfel.

L-imwiet u l-infezzjonijiet tal-HIV/AIDS kienu qed jiżdiedu fl-Afrika t’Isfel fil-bidu tad-disgħinijiet meta Mandela ħa t-tmexxija tal-pajjiż.

Fl-1998, 2,0 miljun Sud Afrikani kienu ġew infettati bil-virus.

Il-mewt tal-uniku tifel tiegħu, Makgatho, b’din il-kawża ħeġġeġ aktar lil Mandela biex jaghti s-sehem tiegħu f’kampanji ta’ saħħa pubblika mmirati biex jaħdmu għall-prevenzjoni tal-virus.

  • Nelson Mandela kien ħarab mid-dar!

Huwa u l-kuġin tiegħu Justice kienu ħarbu mid-dar fl-1941 biex jevitaw żwieġ irranġat.

  • Kellu jikkumbatti ma’ ħafna traġedji personali.

Fl-aħħar huwa rnexxielu jiżżewweġ għall-imħabba fl-1944, ma’ Evelyn Mase, iżda r-relazzjoni tagħhom ma damitx ma kellha tiffaċċja traġedja. It-tieni tifel tagħhom, Makaziwe, miet ta’ 9 xhur biss. Huma kellhom żewġt itfal oħra: Madiba Thembekile (Thembi), li mietet f’ħabta ta’ karozza waqt li Mandela kien il-ħabs fl-1969, u Makgatho Lewanika, li miet bl-AIDS fl-2005. Mandela kellu żewġt itfal oħra mat-tieni mara tiegħu Winnie u bosta neputijiet.

  • Nelson Mandela għandu din il-ġurnata ddedikata għalih.

F’Novembru tal-2009, l-Asaemblea Ġenerali tan-Nazzjonijiet Uniti ddikjarat it-18 ta’ Lulju, il-jum t’għeluq sninu bħala l-“Jum Mandela’. Hija ċelebrazzjoni nazzjonali u rikonoxximent tal-kontribuzzjoniijiet ta’ Mandela għal-libertà.

  • L-elezzjoni ta’ Mandela bħala l-President tal-Afrika t’Isfel kisret diversi rekords.

L-inawgurazzjoni ta’ Mandela bħala president fl-1994 kienet storika għal mill-inqas erba’ raġunijiet (u probabilment ħafna aktar). Huwa kien l-ewwel President elett demokratikament tal-Afrika t’Isfel. Huwa kien ukoll l-ewwel president ta’ karnaġġjon skur tal-pajjiż, u l-akbar persuna eletta għall-kariga. L-inawgurazzjoni tiegħu għaqqdet l-akbar numru ta’ kapijiet ta’ stat mill-funeral tal-President tal-Istati Uniti John F. Kennedy fl-1963.

  • L-ewwel isem ta’ Nelson Mandela ma kienx fil-fatt Nelson.

L-isem mogħti ta’ Mandela kien Rolihlahla, li l-għalliema tiegħu ma setgħux jippronunzjaw. Wieħed minnhom beda jsejjaħlu Nelson wara l-ammirall Ingliż Horatio Nelson, u l-isem ovvjament baqa’.

  • Aktar tard kien ingħata l-laqam ta’ “mkhulu”.

L-Afrikani t’Isfel ġeneralment kienu jsejħu lil Mandela “mkhulu” li tfisser “nannu”, jew Madiba, l-isem tal-familja Mandela għal anzjan rispettat

  • Kien jinteressah sport partikolari.

Minbarra l-politika, il-passjoni l-oħra ta’ Mandela kienet il-boxing. “Ma kienx jogħġobni l-vjolenza tal-boxing. Jien kont aktar interessat fix-xjenza tiegħu, kif tmexxi ġismek biex tipproteġi lilek innifsek, kif tuża pjan biex tattakka u ċċedi, u kif tmexxi lilek innifsek fil-ġlieda,” huwa jgħid fil-bijografija tiegħu.

Kont taf?

Li minkejja li Mandela dejjem ċaħad, għal raġunijiet politiċi, li qatt kien membru tal-Partit Komunista, riċerka storika ppubblikata fl-2011 evidentament turi li huwa kien ingħaqad fl-aħħar tas-snin 50 jew fil-bidu tas-sittinijiet. Dan ġie kkonfermat kemm mis-SACP kif ukoll mill-ANC wara l-mewt tiegħu.

  • Nelson Mandela kien fuq il-lista ta’ sorveljanza tat-terroriżmu tal-Istati Uniti għal 47 sena.

Il-President tal-Istati Uniti Ronald Reagan qies lil Nelson Mandela bħala terrorist u poġġih fuq il-lista ta’ sorveljanza tat-terroriżmu.

Il-President Reagan ma kienx waħdu, l-eks Prim Ministru tar-Renju Unit Margaret Thatcher kienet tqisu bħala persuna b’moħħ magħluq u li l-ANC kienet magħmula minn terroristi u komunisti.

Fl-1986, il-President Reagan ġie kkwotat jgħid li l-gvern tal-Afrika t’Isfel ma kienx obbligat li jinnegozja futur tal-pajjiż ma’ organizzazzjonijiet komunisti li użaw it-terroriżmu u l-vjolenza

Ismu tneħħa millista fl-2008.

  • Ivvota għalll-ewwel darba ta’ 76 sena.

Qabel l-1994, il-biċċa l-kbira tal-Afrikani t’Isfel ta’ karnaġġjon skur ma kinux jipparteċipaw fl-elezzjoni demokratika tal-mexxejja tagħhom.

Fl-elezzjoni tal-1994 fl-Afrika t’Isfel kien hemm ammont kbir ta’ votanti ta’ karnaġġjon skur li ħarġu biex jitfgħu l-vot tagħhom għall-ewwel darba.

Iktar minn 17-il miljun votant ta’ karnaġġjon skur minn 18-il sena ‘l fuq ħadu sehem fl-elezzjoni demokratika.

Kienet dik is-sena li Nelson Mandela wkoll ivvota għall-ewwel darba. Huwa ġie wkoll elett b’mod demokratiku bħala l-ewwel president ta’ karnaġġjon skur tal-Afrika t’Isfel.

Ix-xogħol ta’ Nelson Mandela ġie rikonoxxut madwar id-dinja.

Matul ħajtu, Mandela rċieva aktar minn 695 premju, inkluż il-Premju Nobel għall-Paċi fl-1993.

  • Isem Nelson Mandela jibqa’ mfakkar sal-lum.

In-nies kienu jħobbu jonoraw ix-xogħol ta’ Mandela għal-libertà u d-drittijiet tal-bniedem. Bħallikieku dawk is-695 premju ma kinux biżżejjed, aktar minn 25 skola, università, u istituzzjonijiet edukattivi ġew imsemmija għalih. Mill-inqas 19-il scholarship u fondazzjonijiet għandhom l-isem Nelson Mandela, u saru iktar minn 95 skultura, statwi, jew biċċiet tal-arti tiegħu jew ġew iddedikati lilu.

Mandela miet fil-5 ta’ Diċembru tal-2013, fl-età ta’ 95 sena fid-dar tiegħu f’Johannesburg, l-Afrika t’Isfel. Huwa ngħata funeral statali li għalih attendew mexxejja globali. Huwa ġie midfun fid-dar rurali tiegħu f’Qunu, l-Afrika t’Isfel.

Min huma t-Tfal li jidhru fl-Istatwa tal-Prinċipessa Diana?

Min huma t-Tfal li jidhru fl-Istatwa tal-Prinċipessa Diana?

L-1 ta’ Lulju, jimmarka għeluq is-60 sena tal-Prinċipessa Diana, u proprju f’dan il-jum, il-familja rjali mmarkat l-okkażjoni bl-inawgurazzjoni tant mistennija tal-istatwa tagħha fil-palazz ta’ Kensington.

L-istatwa turi lil Diana b’dirgħajha madwar żewġt itfal, j bit-tieled wieħed jidher fl-isfond. Ċertament li dawn it-tfal qanqlu kurżità lil xi wħud dwar l-identità tagħhom.

Fi stqarrija, il-Palazz qal li d-deċiżjoni li jiġu inklużi t-tfal fl-istatwa kienet mod kif tonora l-abilità speċjali ta’ Diana li tibni rabta ma’ tfal u żgħażagħ.

“L-istatwa għandha l-għan li tirrifletti l-affezzjoni, l-eleganza u l-enerġija ta’ Diana, il-Prinċipessa ta’ Wales, minbarra x-xogħol tagħha u l-impatt li kellha fuq tant nies,” tgħid l-istqarrija. “Il-figura tal-Prinċipessa Diana hija mdawra minn tlett itfal li jirrapreżentaw l-universalità u l-impatt ġenerazzjonali tax-xogħol tagħha. Il-figura u l-istil tal-libsa tagħha kienu bbażati fuq l-aħħar perjodu ta’ ħajjitha hekk kif kisbet il-fiduċja fir-rwol tagħha bħala ambaxxatriċi għal kawżi umanitarji u timmira li twassal il-karattru u l-kompassjoni tagħha.”

Diana ħadmet mill-qrib ma’ nista’ karitajiet orjentati lejn iż-żgħażagħ, u kienet patruna tal-isptar tat-tfal Great Ormond Street f’Londra. Il-premju Diana, li ġie stabbilit fl-1999, jonora speċifikament liż-żgħażagħ li jaħdmu biex itejbu l-ħajja ta’ ħaddieħor. Din il-karità twaqqfet biex tonora t-twemmin ta’ Diana li ż-żgħażagħ għandhom il-poter li jibdlu d-dinja.

Enable Notifications    OK No thanks