Select Page
Tagħlaq il-fabbrika taċ-ċikkulata Kinder fil-Belġju minħabba l-każijiet tas-salmonella

Tagħlaq il-fabbrika taċ-ċikkulata Kinder fil-Belġju minħabba l-każijiet tas-salmonella

Il-fabbrika taċ-ċikkulata Kinder fil-Belġju ġiet ordnata tagħlaq wara li kienet marbuta ma’ għexieren ta’ każijiet ta’ salmonella.

L-awtorità tal-Belġju dwar is-sigurtà tal-ikel ordnat ukoll biex jiġu ritornati l-prodotti kollha tal-Kinder magħmula fil-fabbrika f’Arlon, li hija propjetà tal-Ferrero.

Każijiet suspettati ta’ salmonella marbuta maċ-ċikkulata tal-kinder ġew irrappurtati f’pajjiżi fosthom ir-Renju Unit, il-Ġermanja, Franza u l-Belġju.

L-awtorità tal-Belġju għas-sigurtà tal-ikel, l-AFSCA, qalet li l-fabbrika kienet ordnata tagħlaq wara li l-Ferrero ma setgħetx tipprovdi informazzjoni sħiħa għall-investigazzjoni tagħha.

L-AFSCA qalet li l-investigazzjoni għadha għaddejja u li l-fabbrika titħalla terġa’ tiftaħ biss jekk il-Ferrero tkun tista’ tipprovdi l-garanziji meħtieġa li hija konformi mar-regolamenti tas-sigurtà tal-ikel.

Il-prodotti li ntalbu jiġu ritornati huma Kinder Surprise, Kinder Surprise Maxi, Kinder Mini Eggs u Kinder Schokobons.

L-AFSCA talbet ukoll lill-kumpaniji biex ineħħu l-prodotti mill-ixkafef tagħhom u tat parir lin-nies biex ma jikluhomx.

Nhar il-Ħamis, Ferreri talbet lura wħud miċ-ċikkulati tal-Kinder minn ħwienet fl-Istati Uniti minħabba tħassib dwar kontaminazzjoni potenzjali tas-salmonella.

Aktar kmieni din il-ġimgħa, għadd ta’ prodotti tal-bajd taċ-ċikkulata Kinder Surprise ġew mitluba jiġu ritornati wkoll fir-Renju Unit.

Il-ħelu kollu affettwat kien sar fl-istess fabbrika Belġjana.

Ġew mitluba wkoll jiġu ritornati xi ċikkulati f’partijiet tal-Asja, inklużi Hong Kong u Singapor.

Dan kollu seħħ wara li aktar minn 60 persuna fir-Renju Unit, l-aktar tfal żgħar, ġew infettati bis-salmonella f’tifqigħa marbuta mal-band tal-Kinder Surprise.

Nhar l-Erbgħa, l-aġenzija tas-saħħa tal-Ewropa qalet li qed teżamina wkoll għexieren ta’ każijiet suspettati ta’ salmonella marbuta maċ-ċikkulata f’mill-inqas disa’ pajjiżi inklużi r-Renju Unit, il-Ġermanja, Franza u l-Belġju.

Il-batterji tas-salmonella jistgħu jikkawżaw infezzjonijiet serji u severi, speċjalment fi tfal jew anzjani u oħrajn b’sistema immuni dgħajfa.

Il-WHO tgħid li fix-xahrejn li ġejjin aktar minn nofs l-Ewropej se jkunu infettati bl-Omicron

Il-WHO tgħid li fix-xahrejn li ġejjin aktar minn nofs l-Ewropej se jkunu infettati bl-Omicron

L-Organizzazzjoni Dinjija tas-Saħħa qed tbassar li aktar minn nofs in-nies fl-Ewropa se jkunu infettati bil-varjant Omicron fix-xahrejn li ġejjin jekk l-infezzjonijiet ikomplu bir-rata attwali.

Waqt konferenza stampa, id-direttur reġjonali Hans Kluge wissa li l-varjant Omicron qed jirrappreżenta mewġa oħra mill-punent għal-lvant madwar ir-reġjun Ewropew.

Huwa qal li b’din ir-rata, qed jiġi mbassar li aktar minn 50 fil-mija tal-popolazzjoni fir-reġjun se tkun infettata bl-Omicron fis-6 sa 8 ġimgħat li ġejjin.

Ir-reġjun Ewropew tal-WHO jinkludi 53 pajjiż u territorju inklużi diversi fl-Asja Ċentrali. Kluge qal li 50 minnhom irrappurtaw każijiet tal-varjant Omicron.

Skont il-WHO, 26 minn dawk il-pajjiżi irrappurtaw li aktar minn wieħed fil-mija tal-popolazzjoni tagħhom kienu qed jirriżultaw pożittivi għall-Covid-19 kull ġimgħa, u li aktar minn seba’ miljun każ ġdid ġew irrappurtati fl-ewwel ġimgħa tal-2022 fir-reġjun.

B’referenza għad-dejta miġbura matul l-aħħar ftit ġimgħat, Kluge qal li l-varjant ġie kkonfermat li huwa aktar trażmissibbli u l-mutazzjonijiet li għandu jippermettulu jaderixxi maċ-ċelloli umani b’mod aktar faċli, u jista’ jinfettaw anke lil dawk li jkunu ġew infettati jew imlaqqma qabel.

Madankollu, Kluge saħaq ukoll li l-vaċċini approvati jkomplu jipprovdu protezzjoni tajba kontra mard sever u mewt, inkluż għall-Omicron.

Minkejja rapporti ta’ numru kbir ta’ każijiet mingħajr sintomi u proporzjon aktar baxx ta’ dħul fl-isptarijiet għal każijiet tal-Omicron, il-WHO qalet li għadu kmieni wisq biex il-virus jitqies bħala wieħed endemiku, jiġifieri virus ħafif li jaqbdek regolarment bħall-influwenza.

Kevin Borg jirrispondi d-domandi tagħkom

Kevin Borg jirrispondi d-domandi tagħkom

Kif forsi ħafna minnkom drajtu issa, Staqsini u Skoprini hija r-rokna li qed tagħti ċ-ċans lilkom is-segwaċi tagħna li tistaqsu dak kollu li tridu lill-personalità favorita tagħkom! Wara, jintgħażlu l-aqwa 10 mistoqsijiet u jiġu mwieġba mill-personalità.

Tistgħu wkoll tgħidulna liema personalità tixtiequ li tkun parti minn din ir-rokna.

Kevin Borg huwa s-sitt personalità ta’ Staqsini u Skoprini, u dawn huma r-risposti tiegħu għad-domandi tagħkom:

X’differenza tagħmel il-mużika f’ħajtek? – Maria Gatt

Insellimlek Maria. Il-mużika hija parti importanti ħafna minn ħajti. Il-mużika hija għodda sabiex inti tferraħ lin-nies u dik hija xi ħaġa li jien ngħix biex nagħmel. Nuża t-talent tiegħi sabiex indawwal ftit il-ġurnata ta’ ħaddieħor. Il-mużika tagħtini wkoll sodisfazzjon kbir għaliex parti prinċipali minn dak li nagħmel internazzjonalment huwa li nipproduċi u nikteb kanzunetti għall-artisti barranin, speċjalment ġewwa l-Asja. Is-sodisfazzjon li inti toħloq xi ħaġa u mbagħad tismagħha kantanta minn xi ħadd li għandu eluf kbar ta’ nies quddiemu hija inkredibbli.

Liem huma l-ħames affarijiet li ma tgħaddix mingħajrhom kuljum? – Christine Sammut

Insellimlek Christine. Il-ħames affarijiet li ma ngħaddix mingħajrhom huma: It-tfajla tiegħi Maria Francesca, li nsib support inkredibbli mingħandha u li hija persuna li jiena verament ixxurtjat li qegħda f’ħajti u ngħidilha li nħobbha ħafna ħafna, Il-qtates tagħna, li għandna erbgħa b’kollox, il-mużika ovvjament għax minn xħin inqum sakemm norqod dejjem għaddej inkanta u niżfen, Il-kuntatt man-nies u s-sapporters tiegħi fuq il-paġni tiegħi ta’ Facebook u Instagram, li ta’ kuljum ikun ta’ pjaċir kbir għalija li nara x’se ntella’ għaliex ir-rispons huwa inkredibbli u li dejjem inqum b’mentalità li noħloq proġetti ġodda u għandi mhux ħażin!

Kif tiddeskrivi l-esperjenza tiegħek fl-Iżvezja? – Sylvia Sultana

Insellimlek Sylvia. L-esperjenza tiegħi ġewwa l-Iżvezja hija waħda kontinwa nista’ ngħid, għaliex minn meta rbaħt Swedish Idol il-bibien dejjem baqgħu jinfetħu u rnexxieli li sal-ġurnata tal-lum ma niqafx bi proġetti differenti kemm fl-Iżvezja u kemm f’Malta. Minn wara dik l-esperjenza rnexxieli ndur l-Iżvezja kollha b’iktar minn 600 kunċert madwar l-Iskandinavja, naħseb issa ġew 602 għax ftit ilu kont hemm erġajt! Ġewwa l-Iżvezja ppremjawni wkoll bħala l-persuna tan-north of Sweden tas-Sena, li hija xi ħaġa inkredibbli, speċjalment jekk inti ma tkunx mill-pajjiż.

Darba minnhom, ma ninsiha qatt, kelli 82 kunċert fi tliet xhur! Kont nagħmel 2 kuljum ġieli u f’kull kunċert dejjem ikollok iktar minn tlett elef ruħ jistennewk. Xi ħaġa sabiħa ħafna. Apparti minn hekk l-eseprjenza tal-Iżvezja se nkun qed nabbinaha ma’ Malta fuq proġett li jekk Alla jrid isir realtà fi ftit xhur oħra.

Kemm huma importanti għalik il-fans lokali? Nixtieq ngħidlek li jien minn dejjem kont leali lejk, mill-bidu tal-karriera tiegħek, għadni u nibqa’. Inselli għalik ħafna. – Roberta Abela

Insellimlek Roberta. Grazzi ħafna tal-mistoqsija tiegħek u napprezza dejjem li mill-bidu dejjem kont hemm tagħtini s-sapport. Mingħajr il-fans, kemm lokali u kemm internazzjonali, dak li nagħmlu aħna jkun għalxejn. Jien peress li bdejt verament mill-ewwel tarġa u tlajt waħda waħda verament napprezza kull persuna li tgħidli prosit, għaliex naf li l-fans li għandi huma ġenwinament interessati li jarawni nagħmel suċċess u ħafna mis-suċċess tiegħi huwa grazzi għas-sapport tal-fans lokali tiegħi u b’hekk ikolli ħafna iktar enerġija u entużjażmu li nagħmel ħafna iktar proġetti ġodda ‘l quddiem. Grazzi verament mill-qalb.

Li kieku kellek tmur toqgħod barra minn Malta, terġa’ tmur? – Francesca Farrugia

Insellimlek Francesca. Ngħidlek il-verità, kien hemm żmien fejn proġett kbir li kont qed nagħmel ġewwa Los Angeles, Kalifornja, kien se jżommni noqgħod hemm. Iżda mbagħad erġajt inżilt nagħmel iktar kunċerti ġewwa l-Iżvezja u Malta. Dort xi 35 pajjiż fuq xogħol imma naħseb li kieku kelli noqgħod xi mkien nagħżel l-Amerika. Però jien għandi wkoll post li verament jogħġobni u kelli hsieb ieħor li meta niġi lura Malta mmur noqgħod hemm, dan il-post jismu Għawdex!! Nispera li ‘l quddiem din il-ħolma ssir realtà. L-aqwa li dejjem immorru bħala familja.

Kieku jkollok titgħallem sengħa, xi tkun? – Marica Hili

Insellimlek Marica. Naħseb li kieku kelli nitgħallem sengħa ġdida, tkun dik ta’ bniedem li jaf jibni kollox waħdu ġod-dar tiegħu stess. Hawn nies li jafu jgħaddu l-elettriku, ikaħħlu u jagħmlu huma u kull proġett li jkollhom ġewwa d-dar jibnuh huma. Jien nibqa’ impressjonat u nipprova dejjem nitgħallem imma fl-istess ħin frankajtha wkoll li ma nafx għax hekk ma jistgħux iqabbduni peress li jafu li mgħawġin jiġu l-affarijiet jekk nagħmilhom jien!!

Però hemm sengħa ġdida li se nkun qed naħdem fuqha. Għandha ħafna x’taqsam ma’ dak li nagħmel, però din id-darba minflok se nkun fiż-żarbun ta’ kantant, se nkun qed nilbes iż-żarbun ta’ dak li jmexxi kantant biex isir artist komplut.

Fil-pjanijiet għandna f’moħħna li niftħu Academy of Vocal Music and Performance. Sibt ħafna għajnuna minn persuni ta’ fama mondjali li huma stess jagħmlu dan u b’dak kollu li jien tgħallimt mill-Iżvezja speċjalment, se nkun qed ngħaddih lill-istudenti futuri tiegħi, sabiex mhux isiru kantanti tajbin ħafna biss, iżda importanti ħafna li fuq il-palk jieħdu pjaċir u l-mod kif tiċċaqlaq, hija importanti ħafna, allura jien se nkun kemm l-għalliem fuq kant iżda wkoll nara li jkunu artisti kompluti bħala movimenti. Niftakar li wara li kantajt minflok Chris Brown, kienet ġiet tkellimni Jordin Sparks li kienet rebħet American Idol u qaltli, “Int artist komplut”. Dan kien qaluli wkoll Desmond Child, li kiteb uħud mid-diski li biddlu x-xena tal-mużika fid-dinja kollha. Kien qalli li diska ta’ ħaddieħor nagħmilha tiegħi u dak huwa wieħed mil-ikbar punti li se nkun qed nenfasizza dwaru mal-istudenti tiegħi f’Malta fix-xhur li ġejjin.

Kif jirnexxilek tibqa’ umli daqshekk, minkejja s-suċċessi kbar li ksibt? – Irene Magri

Insellimlek Irene. Din hija mistoqsija li diffiċli nweġibha jien, però nemmen li qatt m’għandek tinsa minn fejn bdejt u lanqas lin-nies li kienu hemm meta bdejt. Jista’ jkun li tiġi mill-karattru wkoll ma nafx imma dejjem nibqa’ grat lejn it-trobbija li tawna missieri u ommi, li sfortunament m’għadhiex magħna llum, għaliex rabbewna napprezzaw kollox u naraw u nifhmu dak li huwa tajjeb u ħażin fil-ħajja.

Kemm huma importanti l-annimali f’ħajtek? – Doreen Zammit

Insellimlek Doreen, L-annimali huma parti importanti ħafna ħafna f’ħajti. Meta konna zgħar kellna amorin jismu Billy. Missieri kien għallmu, mhux biċ-ċajt din, li filgħodu jiftaħ il-gaġġa u joqgħod itir sakemm jinżel fuq biċċa injama mwaħħla ma’ mera fil-kċina u joqgħod jitkellem miegħu nnifsu, u meta jismagħna deħlin mill-iskola jiġġennen kien. Imbagħad filgħaxija kien jidħol fil-gaġġa u jagħlaq il-bieba bil-munqar jerġa’. Inkredibbli. Kelli wkoll kelb ġewwa l-Iżvezja li sfortunatament kien marad u ħalliena. Iżda llum għandna erbat iqtates. Jien qatt ma kont daqsekk close tagħhom meta kont żgħir imma llum inqishom qishom it-tfal. M’ilux marditilna Misty li kienet il-ħames waħda. Għamilna minn kollox biex nippruvaw insalvawha però sfortunatament ma rnexxilniex u dejjem se tibqa’ f’qalbna. L-annimali m’għandhomx mibgħeda, jagħtu mħabba biss u bihom f’ħajjitna ħafna iktar kuntenti.

Liema memorji mal-mamà tiegħek tgħożż l-aktar? – Janet Grech

Insellimlek Janet. Jien għalkemm tlift lill-ommi ta’ 16-il sena, xorta nħossni xxurtjat li kelli ċans inqatta’ ħin magħha, ngħaddi minn esperjenzi li kelli tat-tfulija biha fihom u ngħannaqha. Jien qatt ma kont xi kwiet, dejjem niġri ma’ saqajn ommi u missieri u kull fejn imorru huma dejjem irrid immur magħhom jiġifieri għandi ħafna memorji. Tant għandi rikordji li nista’ nikteb ktieb fuqhom.

Dawn huma affarijiet li sfortunatament it-tfajla tiegħi Maria Francesca ma rnexxilhiex tagħmel minħabba li tilfet lil ommha meta kellha biss 5 snin. Però nara fiha l-omm inkredibbli li jekk Alla jrid għad trid tkun, la nippjanaw li nibnu familja, u nerġa’ ngħidilha li nħobbha mmens.

Kevin, uħud mis-segwaċi ta’ skoperta.net, semmewlek il-Eurovision, u li jixtiquk li tirrappreżenta lil Malta f’dan il-festival. Oħrajn esprimew ix-xewqa li tikteb innu ġdid tal-Furjana. X’inhuma r-reazzjonijiet u l-kummenti tiegħek dwar dawn iż-żewġ xewqat?

Nixtieq verament nirringrazzja lil kulħadd ta’ dawn id-domandi kollha. Verament qatt ma stennejt li se nara rispons sabiħ bħal dan. Għal dawk li staqsewni għall-Eurovision, qatt ma tista’ tgħid x’se jiġri ‘l quddiem!

Bħal ma kulħadd jaf, jiena mill-Furjana u nirringrazzja verament lill-Furjanizi li dejjem issapportjawni f’kull m’għamilt. Madanakollu nixtieq nirringrazzja lill-Maltin u lill-Għawdxin kollha talli meta għamilt xi ħaġa dejjem sibt lil kulħadd warajja. Xi ħaġa inkredibbli. Bħalissa qed naħdmu fuq proġett bis-sens, jiena flimkien ma’ wieħed mill-aqwa mużiċisti Żvediżi u se nkunu qegħdin inħabbru kollox fil-gimgħat li ġejjin ukoll.

Nixtieq nagħlaq billi nirringrazzja lilek Roberta, tal-ħin u d-dedikazzjoni tiegħek sabiex tkompli tmexxi dan il-portal SKOPERTA li tant qed jagħmel suċċess. Sakemm nerġgħu nagħmlu intervista oħra, nixtieq nawgura lilkom u lill-familji kollha tagħkom is-saħħa u s-sliem. GRAZZI!

Dalwaqt inħabbru min se tkun il-personalità li jmiss li twieġeb il-mistoqsijiet tagħkom!

Il-Pjanta Alocasia Polly – Roxanne Gauci Taliana

Il-Pjanta Alocasia Polly – Roxanne Gauci Taliana

Il-pjanta Alocasia Polly, magħrufa wkoll bħala African Mask, hija nattiva għall-Asja subtropikali u l-Awstralja.

Din il-pjanta tippreferi ambjent imdawwal u umdu fid-dar jew ġo xi uffiċċju. Il-weraq aħdar skur tagħha għandhom forma ta’ arrowhead.

Għalkemm hija pjanta li tħobb dawl qawwi, il-weraq jistgħu jkunu sensittivi għall-ħruq tax-xemx. Qatt tħalliha f’xemx diretta, għalhekk l-aħjar li żżommha ftit ‘il bogħod minn tieqa jew wara purtiera ħafifa. Importanti wkoll li tevita milli tpoġġiha f’postijiet mudlama.

Saqqiha regolari, kull ġimgħa u żomm il-ħamrija niedja, iżda mhux imxarrba ħafna jew saturata għaliex dan jista’ jikkawża ħsara lill-għeruq. Mhix pjanta ta’ ġewwa li tittollera n-nixfa, iżda kapaċi tgħix jekk tinsa ssaqqiha f’xi drabi minn żmien għal żmien. Perjodi estiżi ta’ nixfa jistgħu jirriżultaw li l-ponot tal-weraq isiru kannella. Fix-xitwa teħtieġ inqas ilma peress li mhuwiex l-istaġun tagħha.

Il-pjanti tal-Alocasias huma kemmxejn tossiċi għall-annimali domestiċi u l-bnedmin. Tipikament, inġestjoni tikkawża irritazzjoni tal-ħalq u l-istonku u possibilità ta’ rimettar.

Uża fertilizzant ġenerali għall-pjanti tad-dar bil-ħadid kull erba’ ġimgħat matul ir-rebbiegħa u s-sajf. L-ebda fertilizzant mhu meħtieġ matul ix-xhur tax-xitwa meta t-tkabbir tal-pjanti jonqos b’mod naturali. Applika fertilizzant biss fuq ħamrija niedja, qatt niexfa, għax taħraq l-għeruq.

Dettalji li ma kontx taf dwar il-gallarija tal-Palazz Presidenzjali…

Dettalji li ma kontx taf dwar il-gallarija tal-Palazz Presidenzjali…

Il-gallarija tal-Palazz Presidenzjali jew aħjar tal-Palazz tal-Gran Mastru hija waħda mill-ikbar gallariji li nsibu fil-Mediterran. Din insibuha fuq il-ġnub u tkompli fil-faċċata tal-palazz fuq iż-żewġ naħat tiegħu. Is-saljaturi tagħha huma magħmulin minn injam u stukko u oħrajn huma skolpiti fil-ġebel. Fihom naraw l-istremma tal-Ordni ta’ San Ġwann u oħrajn l-istemma ta’ xi Gran Mastri. L-oħrajn għandhom disinn verament interessanti.

L-iktar waħda li tispikka hija dik li naraw fil-kantuniera bejn Triq l-Arċisqof u Pjazza San Ġorġ. Din is-saljatura partikolari tiġbed l-attenzjoni għall-forma kurjuża li fiha. Hawn naraw żewġ figuri li jinsabu wieħed fuq spallejn l-ieħor b’idejhom miftuħin. Taħthom naraw wiċċ grottesk li huwa influwenzat mill-maskli drammatiċi tal-Greċja l-antika. Dawn il-maskli kienu u għadhom jissimbolizzaw it-Teatru. Dawn kienu jsiru l-iktar biex ibiegħdu l-għajn u kull saram mir-residenti li kienu joqogħdu f’dak il-bini fejn ikunu. Il-figura ta’ fuq qiegħda tgħajjeb b’ilsienha lil min iħares lejn il-gallarija.  

Din is-saljatura kienet interpretata kemm-il darba li setgħet saret biex tissimbolizza l-bluha tal-Karnival li fi żmien il-Kavallieri kien jilħaq il-qofol tiegħu f’din il-pjazza. Iżda l-aktar teorija plawsibbli hija li din saret hekk biex tkun tista’ tbiegħed l-għajn ħażina mill-istess bini. Din il-ħaġa hija preżenti ħafna fil-kultura antika speċjalment fl-Amerika t’Isfel u fl-Asja Ċentrali li meta bniedem jgħajjeb b’ilsienu jkun qiegħed ibiegħed l-għajn ħażina. 

Enable Notifications OK No thanks