Select Page
Il-ħidma ta’ salvataġġ għal tifel ta’ 5 snin li waqa’ fil-bir fil-Marokk waslet fl-aħħar stadji tagħha

Il-ħidma ta’ salvataġġ għal tifel ta’ 5 snin li waqa’ fil-bir fil-Marokk waslet fl-aħħar stadji tagħha

Bħalissa, għaddejja ħidma intensiva ta’ salvataġġ għal tifel ta’ 5 snin li ilu dawn l-aħħar erbat iljieli maqbud ġo bir.

Il-ħaddiema tas-salvataġġ fit-Tramuntana tal-Marokk ilhom iħaffru biex jippruvaw jilħqu lit-tifel li nqabad fil-qiegħ ta’ bir b’fond ta’ 32 metru wara li waqa’ għal isfel it-Tlieta billejl.

Fl-aħħar sigħat ġie rrappurtat li l-ħidma ta’ salvataġġ waslet fl-aħħar stadji tagħha u resqin aktar lejn il-possibilità li t-tifel, bl-isem ta’ Rayan, jiġi salvat. Fil-fatt, il-midja lokali llum irrappurtat li l-ħaddiema ta’ salvataġġ issa jinsabu 1.8m ‘il bogħod mit-tifel.

L-operazzjoni ta’ salvataġġ ilha għaddejja jiem sħaħ, u eluf inġabru fuq il-post.

Missier Rayan kien qed isewwi xi ħsarat fil-bir fil-ħin tal-inċident, u qal li hu u omm Rayan jinsabu inkwetati ħafna. Huwa qal li dik is-sekonda li neħħa għajnejh minn fuqu, it-tifel waqa’ fil-bir, u stqarr li għadu ma raqadx sekonda.

Waqt li tkellmet mal-midja, bid-dmugħ f’għajnejha omm Rayan qalet li l-familja kollha ħarġet tfittex lit-tifel sakemm imbagħad indunaw li kien waqa’ fil-bir. Hija qalet li għadha tittama li t-tifel joħroġ mill-bir ħaj

Filmati minn kamera mniżżla fil-bir, nhar il-Ħamis urew li t-tifel kien ħaj u f’sensih, għalkemm jidher li qed isofri minn xi ġrieħi ħfief f’rasu.

Il-ħaddiema tas-salvataġġ niżżlu maskra tal-ossiġnu, ikel u ilma fil-bir u tim mediku jinsab ukoll fuq il-post, lest biex jikkura lit-tifel.

Il-Kreatura tal-Bir – L-ewwel ktieb minn sensiela ġdida ta’ Simon Bartolo

Il-Kreatura tal-Bir – L-ewwel ktieb minn sensiela ġdida ta’ Simon Bartolo

Il-Kreatura tal-Bir  huwa l-ewwel ktieb minn sensiela ġdida ta’ Simon Bartolo. Hija storja li tgħaqqad fiha kemm elementi makabri kif ukoll umoristiċi. Tinvolvi l-familja Borg, li jibdew bħala erbgħa – omm, missier u żewġt itfal – u jispiċċaw tmienja meta jaslu z-zijiet u n-nanna. Nies kemmxejn strambi jkunu dawn. Hemm ritratt ta’ kull waħda u wieħed minnhom impinġijin fuq in-naħa ta’ ġewwa tal-qoxra tal-ktieb. Din il-familja tiġi attakkata vjolentament mill-Imħalla, kreatura li normalment tgħix fl-ilma frisk tal-bjar imma li għal xi raġuni li niskopru aħna u naqraw il-ktieb, tagħmel eċċezzjoni għax toħroġ mill-bir biex tħebb għall-din il-familja. Apparti l-Imħalla, tant hemm kreaturi oħra li għad irridu niskopru f’dawn il-kotba, li s-sensiela jisimha “Ruxxmata Kreaturi”.

Lil Simon Bartolo niftakruh minn sensiela oħra ta’ kotba għat-tfal – It-Triloġija tal-Fiddien – li huwa kiteb flimkien ma’ Loranne Vella. F’dik it-Triloġija kien hemm kreaturi oħrajn, differenti minn dawn. Hu jistqarr li għalkemm jibża’, xorta jħobb ħafna jikteb dwar il-kreaturi. L-istejjer tiegħu jagħtihom ukoll laqta ċajtiera għax inkella jiġu wisq tal-biża’ u ma jkunx jista’ jorqod billejl! Ippubblika kotba oħra bħal, Kważi Kważi lil Tamara Nżommuha, Kliem ir-Riħ, Deformity, u Il-Leġġenda ta’ Robin Hood u Marian. Jikteb ukoll id-drammi tat-teatru, kemm għat-tfal kif ukoll għall-adulti. Fil-fatt lil Simon dejjem jikteb issibu, jew inkella jkun qed jaħseb dwar xiex se jikteb.

Enable Notifications OK No thanks