Riċetta: Churros

Riċetta: Churros

by | 08/Nov/21 | Riċetti, Varjetà

Ingredjenti (għal madwar 10 Churros):

200g dqiq plain

Kwart ta’ kuċċarina baking powder

Kwart ta’ kuċċarina melħ

Mgħarfa żejt ta’ żebbuġa

250ml misħun jagħli

50g castor sugar

Kuċċarina cinnamon

Żejt għall-qali (Irid ikollok tal-anqas żewġ pulżieri żejt ġo kazzola jew taġen fond)

Metodu:

  • L-ewwel ibda billi tipprepara kollox.
  • Fi platt fond ħawwad il-castor sugar mas-cinnamon.
  • Ġo skutella kbira itfa d-dqiq, il-baking powder u l-melħ. Ħawwadhom sew.
  • F’buqar ħawwad sewwa l-misħun jagħli u ż-żejt taż-żebbuġa.
  • Issa ferra’ t-taħlita tal-misħun u ż-żejt ġol-iskutella li fiha t-taħlita tad-dqiq.
  • Ħawwad sew sakemm ikollok taħlita qisha pejst.
  • Imla ‘piping bag’ bit-taħlita tal-pejst. Preferibilment il-piping bag ikollu nozzle forma ta’ stilla.
  • Saħħan iż-żejt fir-reċipjent li se tuża biex taqli. U kif jibda jagħli sew, itfa’ t-taħlita ftit ftit direttament minn ġol-piping bag għal ġoż-żejt ibaqbaq.
  • Aqli sakemm jiħmaru minn kull naħa.
  • Imbagħad tellagħhom bil-mod b’imgħarfa mtaqqba.
  • Poġġihom fuq karti tal-kċina għal ftit sekondi u għaddihom mit-taħlita taz-zokkor u s-cinnamon sakemm jinksew sew.
  • Servihom sħan ma’ ċikkulata mdewba jew ġelat.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibagħtilna fuq info@skoperta.net

Riċetta: Spagetti fil-Forn

Riċetta: Spagetti fil-Forn

by | 21/Jun/21 | Riċetti, Varjetà

Għandek bżonn (għal dixx kbir):

Kilo spagetti

Kuċċarina żejt

400g kapuljat taċ-ċanga

400g corned beef, imqatta’ fi cubes żgħar ħafna

400g kunserva (bott kbir)

400g Sugu tat-tadam (bott kbir)

1200ml ilma

Basla kbira mqatta’ rqiqa

Bżar u melħ skont il-gosti tiegħek

200g ġobon maħkuk (jien nuża ġobon Kefalotieri)

200g ġobon cheddar maħkuk

Mgħarfa butir unsalted

500ml Beschamel

Kikkra ħalib

Metodu:

  • Saħħan iż-żejt f’kazzola kbira u qalli l-basal sakemm jirtab.
  • Żid il-kapuljat u qalli sakemm jieħu kulur kannella. Ħawwad spiss biex ma jibqalekx biċċiet kbar.
  • Żid il-corned beef, ħawwad u ħallih isir għal żewġ minuti.
  • Issa żid il-kunserva, is-sugu, il-melħ, il-bżar u l-ilma.
  • Ħawwad sewwa u ħallih fuq nar għoli sakemm tara li se jibda jagħli.
  • Baxxi n-nar u ħalli z-zalza t-tektek għal madwar 30 jew 40 minuta. Kultant tiha taħwida.
  • Sadanittant itfa’ borma bl-ilma u ftit melħ fuq in-nar biex tgħalli l-ispagetti.
  • Ħallat il-beschamel u l-ħalib ġo buqar u warrab fil-friġġ.
  • Saħħan il-forn għal 180 degrees.
  • Kif jagħli l-misħun itfa’ l-ispagetti u ħallih isir għal 10 minuti. Tħallihx jirtab wisq.
  • Saffi l-għaġin u erġa’ itfgħu mal-ewwel fil-borma. Żidlu l-butir u l-ġobon maħkuk (mhux iċ-cheddar).
  • Ħawwad malajr u ferra z-zalza fuq l-ispagetti ġewwa l-borma.
  • Ħallat kollox sew u itfa t-taħlita kollha ġo dixx tal-forn.
  • Ferra t-taħlita kiesħa tal-beschamel fil-wiċċ u ferrex iċ-cheddar ukoll fil-wiċċ.
  • Aħmi f’forn sħun għal 30 minuta.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net

Tiegħek Għal Dejjem (It-tieni parti minn erbgħa) – Rakkont minn Sharon Calleja

Tiegħek Għal Dejjem (It-tieni parti minn erbgħa) – Rakkont minn Sharon Calleja

by | 06/Jun/21 | Letteratura, Varjetà

Imma jiena ma’ stajtx nifhem għalfejn.
Is-soltu kien iħallini niġri ftit fil-ġnien, iżda llum reġa’ poġġieni fis-sodda tiegħi. Rajt wiċċu nkwetat, hekk kif mar fil-kċina u ġab dak il-bott li kellu kelb fuqu. Il-bott favorit tiegħi, li malli jiftħu tgħidx kemm kienet toħroġ riħa tfuħ!
Iżda le, ma ħarġitx riħa tfuħ minnu. Anzi bejnietna, donnu narah biss kien qed idejjaqni.
Għalkemm Kurt poġġieh fi plattina nadifa, maġenb buqar ilma frisk qrib is-sodda tiegħi, ħarist in-naħa l-oħra għax ridtu jinduna li ma kellix ġuħ.
U kien dak il-ħin, dak il-ħin, li bdejt inħoss il-bard.
“Trid kutra?” staqsieni, għajnejh ileqqu bid-dmugħ.
Tgħid għalfejn kien beda jibki? Tgħidx kemm ħassejtni ħażin! Verament kienet tinqasam qalbi, kull darba li kont narah imdejjaq.
Iżda dak il-ħin…………………
Dak il-ħin kien imdejjaq iżjed mis-soltu!
Rajtu sejjer iġibli kutra żgħira, b’rasu baxxuta lejn l-art, ħsejjes ta’ qsim il-qalb ħerġin minn fommu.
U malli ħassejt il-kutra fuq dahri, ħassejt il-wens………….ħassejt wens kbir, speċjalment xħin Kurt beda jħokkli wara widnejja! Bla ma rrid, eżatt malli jogħrokli dik il-parti fina, kienet tiċċaqlaq saqajja mingħajr ma ninduna! Kont nagħlaq għajnejja u nieħu gost!
Iżda llum, sieqi donnha ċċaqalqet bilmod aktar mis-soltu. Donnha kienet xi ftit għajjiena bħall-kumplament ta’ ġismi kollu.
Għalaqt għajnejja u erġajt irqadt.
Sadanittant kont naf li Kurt kien qed iċempel lil xi ħadd bil-mobajl. Smajt leħnu fil-viċin, imbagħad fid-distanza. Ħassejtni trankwill. Rilassat. U għajjien ħafna. Ħallejt in-ngħas jieħu kontroll ta’ ġismi kollu.
Imbagħad stenbaħt għax smajt taħbita ħafifa mal-bieb ta’ barra.
Is-soltu kont inqum ninbaħ, nifraħ u nħossni mħasseb għal min seta kien hemm hemm barra, kollox fl-istess ħin.

Ir-rakkont ikompli l-ġimgħa d-dieħla…

Riċetta: Spaghetti alla Carbonara

Riċetta: Spaghetti alla Carbonara

by | 24/May/21 | Riċetti, Varjetà

Kważi l-platti kollha tal-għaġin Taljani jeħtieġu vera ftit ingredjenti … u l-Carbonara mhix eċċezzjoni! Tjubija fis-sempliċità!

Għandek bżonn – (għal 4 porzjonijiet):

400g spagetti
200g guanciale, maqtugħ f’biċċiet żgħar irqaq
4 bajdiet
100g ġobon pecorino romano maħkuk
Bżar skont il-gosti tiegħek

Metodu:

  • Imla borma kbira bl-ilma, żid ftit melħ, u poġġiha fuq in-nar waqt li tipprepara l-ingredjenti l-oħra.
  • Imbagħad saħħan taġen fond nonstick u aqli l-guanciale fix-xaħam tiegħu stess sakemm isir iqarmeċ.
  • Ħallih fit-taġen u warrbu għal issa.
  • Ġo buqar ħawwad il-bajd, il-ġobon, u ftit bżar sakemm ikollok zalza qisha krema. Warrabha.
  • Agħlli l-ispagetti għal madwar 12-il minuta sakemm isir ‘al dente’.
  • Ħames minuti qabel ma l-ispagetti jkun sar, poġġi t-taġen bil-pancetta fuq nar medju u żid miegħu żewġ imgħaref mill-ilma tal-għaġin. Ħawwad u ħalliha ttektek.
  • Warrab tazza mill-ilma tal-għaġin fil-każ li jkollok bżonn tuża ftit aktar tard.
  • Saffi l-għaġin u immedjatament żidu ġot-taġen mal-pancetta u x-xaħam tagħha.
  • Ħawwadhom sew għal madwar 2 minuti fuq nar qawwi.

Issa għall-parti delikata – trid tgħaġġel!

  • Meta l-guanciale u l-ispagetti jitħalltu sew u jkunu sħan sew, itfi n-nar imma ħalli t-taġen fuq l-istess burner, biex jibqgħu fuq is-sħana.
  • Jekk tħalli n-nar mixgħul, il-bajd se jissajjar wisq u jiġi qisu scrambled eggs.
  • Kif titfi n-nar, mejjel it-taġen biex l-ispagetti jaqa’ għal naħa waħda, u ferra s-sauce tal-bajd u l-pecorino fuq l-ispazju vojt.
  • Issa ħawwad malajr kemm tista’ sabiex il-bajd ikun totalment inkorporat fl-ispagetti mingħajr ċapep.
  • Il-konsistenza hija importanti ħafna. Jekk tara li huwa niexef wisq meta tkun qed tħallat, żid ftit imgħaref mill-ilma li warrabt tal-għaġin.
  • Jew, jekk hemm wisq likwidu, żid mgħarfa ġobon.
  • Servi immedjatament.
  • Żejjen bi ftit biċċiet ta’ guanciale mqarmċin, pecorino maħkuk u bżar.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net

Enable Notifications OK No thanks