by skoperta.net | 25/Jan/22 | Ġrajjiet, Kurrenti
Nhar it-Tnejn, il-Papa Emeritu Benedittu XVI ammetta li kien preżenti f’laqgħa fl-1980 li fiha ġie diskuss saċerdot akkużat b’abbuż sesswali.
Huwa qal li ċ-ċaħda tiegħu aktar kmieni ġiet minn żball fl-editjar tal-istqarrija tiegħu.
Investigazzjoni indipendenti dwar abbuż mill-kleru Kattoliku fl-Arċidjoċesi ta’ Munich, fejn il-Papa Emeritu Benedittu kien Arċisqof mill-1977 sal-1982, il-ġimgħa li għaddiet uriet li kien preżenti.
L-ammissjoni waslet fi stqarrija lill-Aġenzija Kattolika tal-Aħbarijiet permezz tas-segretarju privat tiegħu l-Arċisqof Georg Gänswein, li qal li l-iżball ma sarx b’intenzjoni malizzjuża iżda riżultat ta’ żball fl-ipproċessar editorjali tad-dikjarazzjoni tiegħu għall-investigazzjoni indipendenti kkummissjonata mill-Arċidjoċesi ta’ Munich.
Gänswein qal li l-Papa Emeritu Benedittu jiddispjaċih ħafna għal dan u jitlob li jiġi skużat.
Benedittu XVI, magħruf bħala Joseph Ratzinger qabel ma sar Papa, qed jippjana li joħroġ stqarrija dettaljata fil-jiem li ġejjin, qal Gänswein, u żied li Benedittu talab biex wieħed jifhem li r-reviżjoni sħiħa tar-rapport ta’ 1,900 paġna għadha teħtieġ iż-żmien.
Fl-istqarrija ntqal li dak li qara mir-rapport s’issa, jimlieh b’mistħija u uġigħ minħabba t-tbatija kkaġunat fuq il-vittmi.
Benedittu, li llum għandu 94 sena, sar l-ewwel Papa f’sekli sħaħ li rriżenja meta ċeda fl-2013. Il-mandat tiegħu kien imtappan minn skandlu globali ta’ abbuż sesswali fil-Knisja Kattolika, u s-sejbiet tal-investigaturi, li issa jimplikawh direttament f’nuqqas li jipprevjeni u jieħu azzjoni dwar l-akkużi ta’ abbuż, jheddu li jħassru r-reputazzjoni tal-Papa Emeritus.
by skoperta.net | 04/Jun/21 | Ġrajjiet, Kurrenti
Il-Jum Internazzjonali tat-Tfal Innoċenti li huma Vittmi ta’ Aggressjoni huwa jum ta’ osservanza annwali tan-Nazzjonijiet Uniti fl-4 ta’ Ġunju ta’ kull sena.
Il-ġurnata ġiet deċiża f’Awwissu tal-1982 f’assemblea speċjali tan-Nazzjonijiet Uniti (NU), meta membri tal-istat għarfu s-sinjifikat tal-impatt tal-kunflitt fuq it-tfal u l-ħtieġa li tittieħed azzjoni u titqajjem kuxjenza. L-assamblea adottat ir-Riżoluzzjoni 51/77 dwar id-drittijiet tat-tfal, li nħolqot minn sforzi diġà kienu għaddejjin biex tipproteġi d-drittijiet tat-tfal f’kunflitt. L-impatt tal-gwerra fil-Libanu kienet l-ispirazzjoni għal din il-ġurnata.
Sfortunatament, it-tfal huma fost l-aktar vittmi innoċenti ta’ uġigħ u tbatija. Madwar id-dinja, ħafna tfal jgħixu f’żoni fejn il-gwerra u l-kunflitt huma parti mill-ħajja tagħhom u dan qiegħed dejjem jiżdied.
Skont statistiċi, aktar minn 536 miljun tifel u tifla jgħixu f’pajjiżi affettwati minn kunflitt jew diżastri. Aktar minn 50 miljun tifel u tifla ġew maħruġa minn darhom. Meta jiġri dan, iżid il-vulnerabilità tagħhom għall-vjolenza u l-isfruttament. Dan huwa dovut l-aktar għall-fatt li dawn it-tfal isiru orfni jew huma separati mill-familji tagħhom.
L-abbuż emozzjonali, fiżiku, sesswali u mentali huwa wkoll realtà għal miljuni ta’ tfal madwar id-dinja, li ħafna drabi jikkawża anki mewt, inklużi vjolenza sesswali, ħtif, ċaħda ta’ aċċess umanitarju, u attakki fuq skejjel u sptarijiet.
Huwa stmat li 200 miljun tifel u tifla jkunu vittmi ta’ vjolenza sesswali kull sena.
Il-pajjiżi fejn it-tfal huma l-inqas siguri jinkludu: Il-Pakistan, l-Eġittu, il-Możambik, il-Vjetnam, iċ-Ċina, l-Arġentina, ir-Russja, in-Niġerja u l-Indoneżja.
In-NU tirrikonoxxi li hemm bżonn li jsir aktar biex jiġu protetti d-drittijiet ta’ dawn it-tfal u tiġi enfasizzata t-tbatija tagħhom.
Dan il-jum jafferma l-impenn tan-NU għall-protezzjoni tad-drittijiet tat-tfal, u l-għan huwa li tenfasizza t-tbatija ta’ tfal li huma vittmi ta’ abbużi bħala riżultat ta’ kunflitt. Hija opportunità għall-pubbliku globali biex jitgħallem dwar it-tbatija tat-tfal f’żoni ta’ kunflitt.
