L-ajruporti tar-Renju Unit se jbiddlu r-regola tal-likwidi u oġġetti elettroniċi
Il-gvern tar-Renju Unit qed jipprepara biex sa’ Ġunju tal-2024, fil-biċċa l-kbira tal-ajruporti jiġu installati scanners 3D ġodda ta’ teknoloġija avvanzata, li juru stampi aktar dettaljati tal-bagalji.
Waħda miill-bidliet se tkun li r-regola li tippermetti likwidi sa 100 millilitru se tiżdied għal żewġ litri.
Bidla oħra se tkun dwar oġġetti elettroniċi. Il-passiġġieri bħalissa huma meħtieġa jneħħu oġġetti bħal tablets, laptops u likwidi mill-bagalja li jkollhom f’idejhom biex jiġu skenjati mis-sigurtà tal-ajruporti.
Likwidi, bħal krema tax-xemx, shampoo jew toothpaste jeħtieġ li jkunu sa 100 millilitru jew inqas u għandhom ikunu f’borża tal-plastik ċara.
Dawn ir-restrizzjonijiet ilhom fis-seħħ minn Novembru 2006 u l-likwidi ġew ipprojbiti fil-kabina tliet xhur qabel, meta l-pulizija Ingliża qalet li kienet skopriet pjan li kien se jwassal biex jisplodu daqs 10 ajruplani bl-użu ta’ splussivi moħbija fi fliexken tax-xorb.
Il-Gvern qal li l-pass li l-ajruporti jaġġornaw it-tagħmir tal-iskenjar għal CT scanners simili ta’ dawk użati fl-isptarijiet, se jfisser li eventwalment r-regoli dwar oġġetti elettriċi jistgħu jitneħħew u l-limitu tal-likwidu jista’ jiġi estiż għal żewġ litri.
Sakemm din il-liġi tgħaddi, ir-regoli attwali xorta se japplikaw f’ajruporti li ma jużawx it-teknoloġija. Il-passiġġieri huma avżati biex jiċċekkjaw dan qabel jivvjaġġaw.
Is-Segretarju tat-Trasport Mark Harper qal li t-teknoloġija l-ġdida se tnaqqas il-ħinijiet tal-kju biex ittejjeb “l-esperjenza tal-passiġġieri, u l-aktar importanti li tidentifika theddid potenzjali”.
Christopher Snelling, direttur tal-politika fl-Assoċjazzjoni tal-Operaturi tal-Ajruport, li jirrappreżenta l-ajruporti tar-Renju Unit, żied jgħid li l-investiment kien “pass kbir ‘il quddiem għall-ivvjaġġar bl-ajru tar-Renju Unit’
“Se jagħmel il-vjaġġ mill-ajruporti tar-Renju Unit aktar faċli u l-ivvjaġġar bl-ajru nnifsu aktar pjaċevoli,” żied jgħid.
It-teknoloġija diġà ilha tintuża mill-ajruporti tal-Istati Uniti, bħal Hartsfield-Jackson ta ‘Atlanta u O’Hare ta’ Chicago, għal numru ta’ snin.
