by skoperta.net | 05/Feb/22 | Ġrajjiet, Kurrenti
Bħalissa, għaddejja ħidma intensiva ta’ salvataġġ għal tifel ta’ 5 snin li ilu dawn l-aħħar erbat iljieli maqbud ġo bir.
Il-ħaddiema tas-salvataġġ fit-Tramuntana tal-Marokk ilhom iħaffru biex jippruvaw jilħqu lit-tifel li nqabad fil-qiegħ ta’ bir b’fond ta’ 32 metru wara li waqa’ għal isfel it-Tlieta billejl.
Fl-aħħar sigħat ġie rrappurtat li l-ħidma ta’ salvataġġ waslet fl-aħħar stadji tagħha u resqin aktar lejn il-possibilità li t-tifel, bl-isem ta’ Rayan, jiġi salvat. Fil-fatt, il-midja lokali llum irrappurtat li l-ħaddiema ta’ salvataġġ issa jinsabu 1.8m ‘il bogħod mit-tifel.
L-operazzjoni ta’ salvataġġ ilha għaddejja jiem sħaħ, u eluf inġabru fuq il-post.
Missier Rayan kien qed isewwi xi ħsarat fil-bir fil-ħin tal-inċident, u qal li hu u omm Rayan jinsabu inkwetati ħafna. Huwa qal li dik is-sekonda li neħħa għajnejh minn fuqu, it-tifel waqa’ fil-bir, u stqarr li għadu ma raqadx sekonda.
Waqt li tkellmet mal-midja, bid-dmugħ f’għajnejha omm Rayan qalet li l-familja kollha ħarġet tfittex lit-tifel sakemm imbagħad indunaw li kien waqa’ fil-bir. Hija qalet li għadha tittama li t-tifel joħroġ mill-bir ħaj
Filmati minn kamera mniżżla fil-bir, nhar il-Ħamis urew li t-tifel kien ħaj u f’sensih, għalkemm jidher li qed isofri minn xi ġrieħi ħfief f’rasu.
Il-ħaddiema tas-salvataġġ niżżlu maskra tal-ossiġnu, ikel u ilma fil-bir u tim mediku jinsab ukoll fuq il-post, lest biex jikkura lit-tifel.
by skoperta.net | 26/Jan/22 | Konf Taf?
Il-kunċerti ta’ Elton John fl-American Airlines Center f’Dallas ġew posposti wara li l-kantant irriżulta pożittiv għall-Covid-19, skont stqarrija mill-arena.
Fl-istqarrija ntqal li l-kunċerti bl-isem ta’ Farewell Yellow Brick Road f’Dallas li diġà kienu posposti qabel, ma kinux se jsiru fid-data skedati.
Intqal ukoll li Elton John huwa mlaqqam bil-booster b’kollox, u għandu sintomi ħfief. Għaldaqstant dawk li kienu se jattendu qed jiġu mitluba sabiex iżommu l-biljetti tagħhom għad-dati skedati mill-ġdid li se jitħabbru dalwaqt.
Il-kantant kien għadu kif għamel ir-ritorn tiegħu wara waqfa ta’ kważi sentejn minħabba l-pandemija.
by skoperta.net | 22/Apr/21 | Letteratura, Varjetà
Fuq il-profil ta’ Facebook tiegħu, Joe Debono, magħruf aktar bħala James Bondin qasam poeżija emozzjonali u riflessiva miktuba minnu stess dwar l-effetti li qed tikkawża fuqu u fuq ħajtu l-marda tal-ALS.
M’għadnix narafhom
M’għadnix narafhom dawn dirgħajja….
Li tant għannqu ħbieb tul is-snin
U taptpu kuraġġ fuq l-ispallejn
Li kaħħlu, u żebgħu u sammru f’injam
U sewwew fejn kien hemm għalfejn.
L-idejn li lagħbu tennis, subbuteo u darts
U għoddew tant flus u għamlu kontijiet
Li kitbu il-lottu bil-karta saħħara
U harbxu tant stejjer u ħsiebijiet
… Illum mejtin
M’għadnix narafhom dawn riġlejja….
Li ġrew wara l-ballun bil-ħeġġa,
U telgħu u niżlu slielem tul is-snin
Li qadfu b’saħħa biex gawdejt il-baħar
Li żifnu mal-kollegi f’xi festin
Li mxew fil-Vatikan u ħdejn l-Akropoli,
Li żżerżqu fuq silġ iebes tal-Islanda
U telgħu fuq l-Etna u l-Vesuvju
U daru mal-imtieħen tal-Olanda
…. Illum bla saħħa.
M’għadnix nagħrfu dan leħni…
Li tant tkellem ma nies bil-kelma t-tajba
U spjega tant prinċipji, ħfief u tqal,
Li qara, rrexta u drabi ukoll kanta
U daħħaq ħafna nies, il-kbar u t-tfal.
Li irrakkonta fatti mill-Istorja,
Imħallta ma xi leġġenda Maltija
B’ilsna barranin biex min iżurna,
igawdi ta’ pajjiżna is-sbuħija
…. Illum imkarkar.
Qed nagħraf biss dan moħħi…
Li għadu joħloq u jtini l-idejat,
Li kif jitwieldu ituni l-enerġija.
U li b’għajnejja jħaddem il-kompjuter
biex bih nesprimi li għaddej ġo fija.
Dal-moħħ li jġedded il-memorji
U jġib tifkiriet sbieħ quddiem għajnejja,
li jgħini nifhem din il-kundizzjoni,
U li ħajti inbidlet iżda għada għaddejja
…. U jwennisni.
Joseph Debono
21.04.21
