Select Page
Riċetta: Ross biz-Zalzett Malti u Ħaxix

Riċetta: Ross biz-Zalzett Malti u Ħaxix

Ingredjenti (għal 4 porzjonijiet):

275g ross mgħolli (jew ara l-metodu li nuża jien aktar l-isfel)

3 zalzett tal-malti, mingħajr ġilda u mqatta’ ftit

Bżar u melħ skont il-gosti tiegħek

Kuċċarina żejt tal-ġunġlien (sesame seed oil), jew żejt taż-żebbuġa

Żewġ imgħaref ħall tat-tuffieħ

Żewġ kuċċarini soy sauce

Kuċċarina kemmun

Nofs bżaru tal-kulur imqatta’ dadi żgħar

4 faqqiegħ imqatta’ dadi

Nofs karrotta mqatta’ dadi żgħar

Nofs qarabagħlija mqatta’ dadi żgħar

Żewġ imgħaref brunġiel imqatta’ dadi żgħar

Żewġ imgħaref pastard imqatta dadi żgħar

Żewġ imgħaref qara ħamra mqatta’ dadi żgħar

Żewġ spring onions imqatta’

Żewġ sinniet tewm imqatta’

Żewġ chillies (bżar aħmar jaħraq), imqattgħin irqaq u mingħajr żerriegħa

8 cherry tomatoes maqsumin min-nofs

Għat-tiżjin:

Mgħarfa parmesan imfarrak

Mgħarfa tursin frisk imqatta’

Metodu:

  • Poġġi ż-żejt, is-soy sauce, u l-ħall ġo taġen fond fuq nar medju.
  • Kif tara li saħnu ftit, żid il-bżar, il-melħ, u l-kemmun.
  • Ħawwad ftit u żid il-brunġiel, il-qarabagħli, il-pastard, it-tewm, il-bżaru l-ħelu, iċ-chillies, il-karrotta, il-faqqiegħ, l-ispring onions, u l-qara ħamra.
  • Sajjar mikxuf fuq nar medju għal 5 minuti waqt li tħawwad spiss.
  • Żid iz-zalzett u sajjar u ħawwad għal 3 minuti.
  • Żid it-tadam. Ħawwad sew. Baxxi n-nar, għatti t-taġen u ħallih isir għal 5 minuti.
  • Żid ir-ross mat-taħlita li għandek fit-taġen u ħawwad sew għal żewġ minuti biex jitħallat kollox sew.
  • Servi mżejjen bi ftit ġobon parmesan u tursin imqatta’ fil-wiċċ.

Ingredjenti u metodu għal ross safrani – dawn l-ammonti iservu għal bejn 3 u 4 porzjonijiet:

800ml ilma

275g ross, abjad jew brown nej

Kuċċarina mburġata Turmeric powder

Bżar u melħ

  • Ferra’ l-ilma ġo kazzola u poġġiha fuq nar medju.
  • Żid il-bżar u l-melħ, u t-turmeric.
  • Ħallih fuq in-nar sakemm jiftaħ jagħli.
  • Kif jibda jagħli, żid ir-ross.
  • Ħawdu darba waħda biss b’imgħarfa tal-ħadid. Importanti li tuża mgħarfa tal-ħadid.
  • Għatti l-kazzola u baxxi n-nar fuq l-iżghar burner.
  • Ħallih isir għal 20 minuta. Tikxfux u tħawdux għal dawk l-20 minuta.

Nota: Jekk dan ir-ross ma tkunx se sservih ma’ zalza li fiha togħmiet qawwijin bħar-riċetta tal-lum, tista’ żżid kwalunkwe ħwawar mal-ilma qabel ma titfa’ r-ross.

Bħal pereżempju; kari, mixed spice, ħabaq jew sagħtar niexef, lewż imqatta’, u anki dada tal-istokk tal-ħaxix jew tiġieġ jekk tiggosta.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibagħtilna fuq info@skoperta.net

Riċetta: Penne bil-Krema u Limoncello

Riċetta: Penne bil-Krema u Limoncello

Ingredjenti (għal 4 porzjonijiet):

500g għaġin penne, mgħolli ‘al dente’

200g ġobon mascarpone

100g pancetta mqatta’ dadi

200g kapuljat taċ-ċanga

150ml inbid abjad

Basla kbira, imqatta’ rqiqa

Karrotta kbira, imqatta’ rqiqa

Zokk ta’ karfusa mqatta’ rqiq

Nofs kuċċarina noċemuskata

Mgħarfa butir

4 imgħaref tursin frisk imqatta’

200ml stokk tal-ħaxix

150ml Limoncello

Nofs qoxra ta’ lumija, maħkuka

Tazza krema friska

Metodu:

  • Saħħan il-butir f’taġen fond.
  • Kif jisħon il-butir żid il-basla, il-karrotta, iz-zokk tal-karfusa, u l-pancetta u aqlihom sakemm jirtabu u jieħdu kulur dehebi.
  • Żid il-kapuljat, l-inbid, u l-istokk. Ħawwad u ħallih itektek mikxuf fuq nar baxx għal 30 minuta. Kultant tih taħwida.
  • Imbagħad żid il-Limoncello, il-qoxra tal-lumija, u l-krema friska. Ħawwad, u ħallih itektek mikxuf għal 5 minuti.
  • Issa neħħi t-taġen minn fuq in-nar u żid il-mascarpone, it-tursin, u n-noċemuskata.
  • Ħawwad sew.
  • Żid il-penne li tkun diġa għallejtu. Ħawwad sew sakemm l-għaġin ikun miksi sew biz-zalza.
  • Erġa’ poġġi t-taġen fuq nar baxx u sajjar għal 3 minuti, waqt li tħawwdu kontinwament.
  • Servi immedjatament.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibagħtilna fuq info@skoperta.net

Filmat: 68 sena ilu seħħet l-Inkurunazzjoni tar-Reġina Eliżabetta II

Filmat: 68 sena ilu seħħet l-Inkurunazzjoni tar-Reġina Eliżabetta II

L-inkurunazzjoni hija ċerimonja li timmarka l-mument li sovran jiġi inawgurat fil-kariga billi jirċievi l-kuruna, li hija s-simbolu ewlieni tal-awtorità regali.

Fl-1937, il-Prinċipessa Eliżabetta ta’ 11-il sena kienet rat lil missierha, ir-Re Ġorġ VI, inkurunat fiċ-ċerimonja elaborata u 16-il sena wara fit-2 ta’ Ġunju kellha ssir l-inkurunazzjoni uffiċjali tagħha stess.

L-inkurunazzjonijiet ilhom isiru f’Westminster Abbey għal 900 sena u l-istess sar għall-inkurunazzjoni tar-Reġina Eliżabetta, iżda l-inkurunazzjoni tal-1953 kienet innovattiva fiha nnifisha. L-ewwel waħda li qatt ġiet imxandra fuq it-televiżjoni, kienet segwita minn 27 miljun persuna fir-Renju Unit biss u miljuni ta’ udjenzi oħra madwar id-dinja.

Skoprejna ftit fatti interessanti dwar dak il-jum notevoli tat-2 ta’ Ġunju, 1953..

Westminster Abbey ilu l-post għal kull inkurunazzjoni mill-1066. Qabel ma nbniet l-Abbey, l-inkurunazzjonijiet kienu jsiru kull fejn kien konvenjenti, u saru f’Bath, Oxford u Canterbury.

Ir-Reġina Eliżabetta II ġiet inkurunata fit-2 ta’ Ġunju, 1953 f’Westminster Abbey. Il-Maestà tagħha kienet id-disa’ u tletin sovran li ġew inkurunati f’Westminster Abbey.

Ir-Reġina Eliżabetta II hija s-sitt Reġina li ġiet inkurunata f’Westminster Abbey. L-ewwel waħda kienet ir-Reġina Marija I, li ġiet inkurunata fl-1 t’Ottubru, 1553.

Ir-Reġina kisbet it-tron mal-mewt ta’ missierha, ir-Re Ġorġ VI. Kienet il-Kenya dak iż-żmien u saret l-ewwel sovrana f’aktar minn 200 sena.

In-nanna tar-Reġina, ir-Reġina Marija, ta’ 81 sena kienet l-ewwel Reġina li rat neputija tikseb it-tron. Madanakollu, hija mietet qabel ma saret l-inkurunazzjoni.

Is-servizz tal-inkurunazzjoni użat għar-Reġina Eliżabetta II dixxendenti direttament minn dak tar-Re Edgar f’Bath fl-973. L-ordni tas-servizz oriġinali tas-seklu 14 kienet miktuba bil-Latin u ntużat sal-inkurunazzjoni ta’ Eliżabetta I.

L-inkarigat Earl Marshal huwa responsabbli għall-organizzazzjoni tal-inkurunazzjoni. Mill-1386 il-pożizzjoni ttieħdet mid-Duka ta’ Norfolk. Is-16-il Duka ta’ Norfolk kien responsabbli għall-inkurunazzjoni tar-Reġina fl-1953 u kien ukoll responsabbli għall-funeral tal-Istat ta’ Sir Winston Churchill (1965) u l-investitura tal-Prinċep ta’ Wales (1969).

Ir-Reġina u d-Duka ta’ Edinburgu kienu misjuqa mill-palazz ta’ Buckingham għal Westminster Abbey fil-Gold State Coach, miġbuda minn tmien żwiemel griżi: Cunningham, Tovey, Noah, Tedder, Eisenhower, Snow White, Timperley u McCreery.

Il-bukkett tal-inkurunazzjoni kien magħmul minn fjuri bojod, orkidej u lilies of the valley mill-Ingilterra, stephanotis mill-Iskozja, orkidej minn Wales u qronfol mill-Irlanda ta’ fuq u l-Isle of Man.

Id-Duka ta’ Edinburgu libes uniformi Navali għall-vjaġġ lejn u mill-Abbey. Waqt li kien fl-Abbey, huwa libes kurunetta u l-libsa tad-Duka tiegħu fuq l-uniformi.

Il-libsa tar-Reġina, iddisinjata mid-disinjatur Ingliż tal-moda Norman Hartnell, kienet magħmula minn satin abjad u rrakmata bl-emblemi tar-Renju Unit u tal-Commonwealth b’ħajt lewn id-deheb u l-fidda.

Mill-inkurunazzjoni, ir-Reġina libset il-libsa tal-inkurunazzjoni sitt darbiet inkluż fil-ftuħ tal-Parlament fi New Zealand u l-Awstralja fl-1954.

Is-sefturi, il-koki u l-ġardinara tal-palazz ta’ Buckingham inġabru ġewwa l-Grand Hall fil-palazz ta’ Buckingham biex jaraw lir-Reġina titlaq lejn Westminster Abbey.

Is-servizz tal-inkurunazzjoni tar-Reġina beda fil-11:15 u dam kważi tliet sigħat.

Fi triqitha lejn l-inkurunazzjoni, il-Maestà tagħha libset id-Diadema tal-Istat George IV, il-kuruna murija fuq il-bolol. Magħmula fl-1820, id-Diadema fiha l-ward, shamrocks u thistles b’1,333 djamant u 169 perla.

Il-purċissjoni tas-sovran kienet magħmula minn 250 persuna inklużi mexxejja tal-Knisja, Prim Ministri tal-Commonwealth, membri tal-familja Rjali, mexxejja ċivili u militari u l-Yeoman of the Guard.

L-Arċisqof ta’ Canterbury mexxa s-servizz, dmir li kien ilu jitwettaq mill-Konkista fl-1066. Għall-ewwel darba fl-1953, ħa sehem ukoll rappreżentant ta’ Knisja oħra, il-moderatur tal-Knisja tal-Iskozja.

Is-servizz tal-inkurunazzjoni sar f’sitt partijiet: ir-rikonoxximent, il-ġurament, id-dlik taż-żejt (anointing), l-investitura (li tinkludi l-inkurunat), l-intronizzazzjoni u l-ġieħ.

Ir-riċetta għaż-żejt fiha żjut tal-larinġ, ward, kannella, musk u ambra. Normalment isir lott biex iservi għal aktar inkurunazzjonijiet, iżda f’Mejju tal-1941 bomba li laqtet id-Dekanat qerdet kollox, u għalhekk sar lott ġdid.

Waħda mill-istallazzjonijiet l-aktar notevoli għall-inkurunazzjoni kienet l-anness fit-tard tal-punent ta’ Westminster Abbey. Dan ipprovda l-ispazju meħtieġ li fih il-purċissjonijiet setgħu jiffurmaw u jinfirxu li ma jidhrux mill-folol.

Il-Prinċep Charles irċieva stedina speċjali tat-tfal miżbugħa bl-idejn għall-inkurunazzjoni t’ommu u kien l-ewwel tifel li ra lil ommu tiġi nkurunata bħala sovran. Il-Prinċipessa Anne ma attendietx Iċ-ċerimonja billi kienet meqjusa żgħira wisq.

Total ta’ 8,251 mistieden attenda ċ-ċerimonja tal-inkurunazzjoni tar-Reġina f’Westminster Abbey.

129 nazzjon u territorju kienu rrapreżentati uffiċjalment fis-servizz tal-inkurunazzjoni.

Xi nies fl-Abbey raw ir-raba’ inkurunazzjoni tagħhom. Il-Prinċipessa Marie Louise (in-neputija tar-Reġina Victoria) kienet rat ukoll l-inkurunazzjonijiet tar-Re Edward VII (1902), ir-Re Ġorġ V (1911) u r-Re Ġorġ VI (1937).

Ir-Reġina ġiet inkurunata fis-St Edward’s Chair, li kien magħmul fl-1300 għal Edward u baqa’ jintuża’ f’kull inkurunazzjoni minn dak iż-żmien. Huwa miżmum b’mod permanenti f’Westminster Abbey.

Il-kuruna ta’ St Edward, magħmula fl-1661 minn deheb solidu, tqiegħdet fuq ras ir-Reġina waqt is-servizz tal-inkurunazzjoni.

Wara l-kuruna, l-orb, magħmul ukoll fl-1661, kien l-iktar biċċa importanti tar-regalia. Huwa globu tad-deheb imdawwar b’salib imdawwar b’medda ta’ djamanti, żmeraldi, rubini, żaffir u perli b’ametista kbira fis-summit.

Iċ-ċurkett tal-inkurunazzjoni, magħruf bħala The Wedding Ring of England tpoġġa fuq ir-raba’ saba’ tal-id il-leminija tar-Reġina skont it-tradizzjoni. Magħmul għall-inkurunazzjoni tar-Re William IV fl-1831, iċ-ċurkett ilu jintlibes f’kull inkurunazzjoni minn dakinhar, ħlief għar-Reġina Victoria, li s-swaba tagħha kienu tant żgħar li ċ-ċurkett ma setax jitnaqqas biżżejjed għad-daqs tagħha u nħolqot alternattiva.

Il-kopertura tal-BBC tal-inkurunazzjoni kienet żvilupp kbir għall-istorja tax-xandir. Kien l-ewwel servizz li ġie televiżiv u għal ħafna nies, kienet l-ewwel darba li kienu qed jaraw avveniment fuq it-televiżjoni.

27 miljun persuna fir-Renju Unit (mis-36 miljun popolazzjoni) segwew iċ-ċerimonja fuq it-televiżjoni u 11-il miljun semgħuha fuq ir-radju.

Kien hemm aktar minn 2,000 ġurnalist u 500 fotografu minn 92 nazzjon fuq ir-rotta tal-inkurunazzjoni.

Fost il-ħafna ġurnalisti barranin kien hemm Jacqueline Bouvier, li dak iż-żmien kienet taħdem għall-Washington Times-Herald u li aktar tard saret il-First Lady tal-Amerika bħala Jackie Kennedy.

Il-Kuruna tal-Istat Imperjali li ntlibset mir-Reġina waqt ir-ritorn tagħha lejn il-palazz ta’ Buckingham, kien fiha erba’ perli tradizzjonalment maħsuba li kienu l-imsielet tar-Reġina Eliżabetta I.

Numru ta’ ritratti uffiċjali ttieħdu fil-palazz ta’ Buckingham wara l-inkurunazzjoni, iżda l-aktar memorabbli huma dawk meħuda minn Cecil Beaton. Għall-immaġni definittiva tiegħu huwa poġġa lir-Reġina quddiem sfond li juri l-kappella ta’ Henry Vii f’Westminster Abbey.

L-artist uffiċjali għall-inkurunazzjoni kien l-artist Pollakk Feliks Topolski, li pproduċa rekord permanenti tal-okkażjoni fil-kuritur t’isfel tal-palazz ta’ Buckingham. Il-pittura saret f’14-il sezzjoni, kull waħda għolja ħafna aktar minn metru.

Il-Lord Lieutenants tar-Reġina kkummissjonaw lill-artist Terence Cuneo biex ipinġi ċ-ċerimonja tal-inkurunazzjoni u fl-1954 Herbert James Gunn pitter state portrait tar-Reġina fl-ilbies tagħha tal-inkunurazzjoni.

Fit-2 ta’ Ġunju tal-1953, waslet l-aħbar li Edmond Hilary u Tenzing Norgay kienu waslu sal-quċċata tal-muntanja Everest. Ir-Reġina ppreżentat lill-14-il membru tal-expedition b’edizzjonijiet speċjali ta’ midalji tal-inkurunazzjoni bil-kliem ‘Mount Everist Expedition’.

L-ewwel mawra tagħha barra l-pajjiż li għamlet ir-Reġina wara l-inkurunazzjoni kienet lejn il-Bermuda, il-Ġamajka, il-Panama, Fiġi, Tonga u New Zealand li bdiet f’Novembru tal-1953. Irritornat fl-1954 u żaret l-Awstralja, Ceylon (issa s-Sri Lanka), Aden u l-Uganda. Hija u sejra lura d-dar minn Aden, għaddiet minn Malta u Ġibiltà .

Fl-24 ta’ Ġunju tal-1963, l-Unuri tal-Iskozja (il-kuruna, ix-xettru u x-xabla) inġarru quddiem ir-Reġina f’purċissjoni mill-palazz ta’ Holyroodhouse sal-Katidral ta’ St Giles.

Qatt ġietek kurżità minn fejn oriġinat il-coronation chicken u għaliex tissejjaħ hekk?

Il-coronation chicken inħolqot fl-1953, meta l-florist rinomat Constance Spry u x-chef tal-cordon bleu Rosemary Hume ħadu ħsieb l-ikel taċ-ċelebrazzjoni tal-inkurunazzjoni tar-Reġina Eliżabetta II. Huwa maħsub li ġiet ispirata mill-Jubilee Chicken maħluqa għall-ġublew tal-fidda ta’ George V fl-1935.

Dak iż-żmien ir-riċetta kienet ippubblikata b’mod wiesa’ u għalhekk setgħet titgawda fil-festini tat-toroq madwar il-Gran Brittanja iżda mhux kulħadd seta’ jagħmel dan.

L-ingredjenti użati kienu notevoli għal żmienhom, b’ħafna minnhom li kienu għadhom kemm jiġu disponibbli, filwaqt li l-maġġoranza tal-pajjiż kienet għadha taħt ir-restrizzjonijiet tar-razzjonar ta’ wara l-gwerra.

Ir-riċetta oriġinali kienet tikkonsisti f’tiġieġ żgħar inkaljati, ilma, ftit inbid, karrotta, garni, melħ, bżar u krema bil-kari.

Jingħad li l-platt li ġie servut fiċ-ċelebrazzjoni tal-inkurunazzjoni tar-Reġina kien jikkonsisti f’biċċiet tat-tiġieġ, b’tarf wieħed ta’ kull dixx, insalata mħawwra tar-ross, piżelli u pimentos.

Verżjoni kemxejn aktar żviluppata ta’ din ir-riċetta għadha l-favorita tan-nazzjon sal-lum.

Riċetta: Stuffat tal-qarnit

Riċetta: Stuffat tal-qarnit

Għandek bżonn: (għal 6 persuni)

1 kg qarnit imqatta’ biċċiet żgħar
500ml ilma
Mgħarfa żejt taż-żebbuġa
2 basliet imqatta’ rqaq
4 sinniet tewm imqattgħin irqaq
4 patatiet kbar maqsumin f’erbgħa
300g piżelli (marrowfat)
2 imgħaref pejst tat-tadam
Karrotta kbira mqatta’
2 imgħaref żebbuġ imqatta’
Mgħarfa kappar
220ml inbid aħmar
400g bott tadam imqatta’, jew 5 tadamiet friski imqatta’
Kuċċarina ħabaq
Kuċċarina nagħniegħ
Kuċċarina curry
Kuċċarina rignu
Kuċċarina merqtux
Kuċċarina ħwawar tal-ħut
Kuċċarina bżar
Kuċċarina melħ fl-ilma li tgħalli fih il-qarnita
600g spagetti mgħolli (jekk se sservi l-istuffat fuq spagetti)

Metodu:

Saħħan il-500ml ilma ġo kazzola. Kif jiftaħ jgħali żid il-qarnit u roxx il-kuċċarina melħ.
Ħallih isir fuq nar baxx għal kwarta. Itfi n-nar u ħalli l-qarnit jibred fl-ilma tiegħu.

Sadanittant, saħħan iż-żejt ġo borma kbira. Aqli l-basal u t-tewm sakemm jieħdu kulur kannella.

Żid l-inbid, il-pejst tat-tadam, il-karrotta, il- ħabaq, ir-rignu, in-nagħniegħ, il-curry, il-bżar, il-merqtux u il-ħwawar tal-ħut.
Ħawwad sewwa u sajjar fuq nar qawwi għal ftit minuti sakemm l-inbid jevapora.

Żid l-ilma li tkun għallejt il-qarnit fih u mbagħad żid ukoll il-patata, iż-żebbuġ u l-kappar. Ħawwad sewwa u malli jiftaħ jgħali, baxxi n-nar u żid il-biċċiet tal-qarnit.

Ħallih itektek fuq nar baxx għal nofs siegħa u kultant tih taħwida, sakemm l-istuffat jagħqad ftit u l-qarnit isir tari.

Servi waħdu jew fuq platt spagetti.

L-ikla t-tajba 🙂

Riċetta: Paccheri bir-Ragu tal-Ħaruf

Riċetta: Paccheri bir-Ragu tal-Ħaruf

Ingredjenti (għal bejn 4 u 6 persuni): 

800g għaġin Paccheri

400g kapuljat tal-ħaruf

Mgħarfa żejt taż-żebbuġa

Basla mdaqsa mqatta’ rqiqa

Karrotta mqatta’ rqiqa

Zokk ta’ karfusa mqatta’ rqiq

2 kuċċarini kosbor midħun

Kuċċarina min kull wieħed min dawn li ġejjin – bużbież, kemmun, klin, sagħtar. paprika milli jaħraq, bżar, u melħ

Mgħarfa kunserva

3 tadamiet kbar imqatta’

Bott tadam imqatta’.

100ml kikkra nbid aħmar

300ml stokk tat-tiġieġ

Mgħarfa butir

Żewġ imgħaref nagħniegħ frisk imqatta’ rqiq

100g irkotta

Metodu:

  • Saħħan iż-żejt ġo taġen fond jew kazzola. Żid il-basla, karrotta, u z-zokk tal-karfusa u aqlihom għal ftit minuti sakemm jirtabu.
  • Żid il-ħaruf u l-ħwawar kollha u sajjar fuq nar baxx sakemm il-kapuljat jieħu ftit kulur u jinxef il-likwidu kollu. Ħawwad spiss.
  • Żid l-inbid u erġa’ tektek bil-mod sakemm ma jibqax likwidu.
  • Żid it-tadam il-frisk u tal-bott, l-istokk, u l-kunserva. Ħawwad sewwa u kif jiftaħ jgħali, baxxi n-nar u ħallih itektek għal madwar 30 minuta. Tih taħwida qisu kull għaxar minuti.
  • Sadanittant, għalli il misħun u kif jgħali sajjar il-paccheri skont il-ħin fuq il-pakkett. Ħallihom isiru ‘al dente’.
  • Kif isiru saffihom, però titfax ilma kiesaħ fuqhom. Ħawwad magħhom mgħarfa butir, u eżatt wara itfa l-għaġin kollu fiz- zalza.
  • Tektek u ħawwad fuq nara baxx ghal ftit minuti, sakemm tara li l-għaġin hu miksi biz zalza.
  • Servi b’mgħarfa rkotta mħallta man-nagħniegħ l-imqatta’ fuq kull platt.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibagħtilna fuq info@skoperta.net

Enable Notifications OK No thanks