Isostnu li l-istabbiliment tal-ikel kellu jagħlaq waqt il-velja bħala turija ta’ rispett

Isostnu li l-istabbiliment tal-ikel kellu jagħlaq waqt il-velja bħala turija ta’ rispett

by | 22/Jan/23 | Ġrajjiet, Kurrenti

Bosta qed jaqsmu r-reazzjonijiet tagħhom wara l-velja li saret għal Pelin Kaya nhar il-Ġimgħa li għadda fejn kien hemm ukoll preżenti l-qraba tagħha.

Pelin Kaya, ta’ 30 sena, inqatlet nhar it-18 ta’ Jannar wara li raġel ta’ 33 sena baqa’ dieħel f’pompa tal-petrol u wara fl-istabbiliment tal-ikel, il-KFC, fil-Gżira.

Ir-raġel tressaq il-qorti mixli bil-qtil ta’ Pelin Kaya, bil-pulizija tixhed li “ma kienx sempliċi inċident tat-traffiku iżda omiċidju volontarju.”

Kienu ħafna li esprimew l-opinjoni tagħhom fuq il-midja soċjali hekk kif sostnew li fil-fehma tagħhom l-istabbiliment tal-ikel, il-KFC kellu jagħlaq waqt il-velja. Bosta rreferew ukoll għan-nies li kienu qed jieklu dak il-ħin, filwaqt li sostnew, li huwa atteġġjament li juri nuqqas ta’ rispett u dinjità lejn il-vittma u l-qraba tagħha.

Oħrajn għandhom opinjoni totalment differenti għaliex jemmnu li l-ebda mill-imsemmija ma naqsu mir-rispett u jsostnu li hemm kwistjonijiet aktar serji li wieħed għandu jitħasseb dwarhom relatati ma’ dan il-każ.

Bil-filmat: Il-mument li seħħ l-inċident li ħa l-ħajja ta’ mara ta’ 30 sena

Bil-filmat: Il-mument li seħħ l-inċident li ħa l-ħajja ta’ mara ta’ 30 sena

by | 18/Jan/23 | Ġrajjiet, Kurrenti

Filmat tas-CCTV juri l-mument li seħħ l-inċident li kkawża l-mewt ta’ mara ta’ 30 sena mit-Turkija.

Fil-filmat, jidher is-sewwieq ta’ 33 sena joħroġ mill-karozza wara li baqa’ dieħel fl-istabbiliment tal-ikel, KFC fil-Gżira, u baqa’ miexi f’direzzjoni ‘l bogħod miż-żona tal-inċident.

Dan seħħ wara ftit li baqa’ dieħel f’pompa tal-petrol.

Xi nies li kienu fuq il-post allegaw li s-sewwieq attakka lill-vittma waqt li kienet stenduta fl-art, kif ukoll li kien aggressiv ma’ nies li ppruvaw jagħtu l-għajnuna tagħhom tant li l-pulizija kellhom jużaw it-taser biex setgħu jarrestawh.

Huwa nstab li kien taħt l-effett tad-droga u l-alkoħol.

Nota: Dan il-filmat fih xena xokkanti.

Filmat: TVMNews

Pelin Kaya hija l-vittma li nqatlet b’daqqa ta’ karozza f’għeluq sninha

Pelin Kaya hija l-vittma li nqatlet b’daqqa ta’ karozza f’għeluq sninha

by | 18/Jan/23 | Ġrajjiet, Kurrenti, L-Aħħar Aħbar

Pelin Kaya hija l-mara ta’ 30 sena li tilfet ħajjitha traġikament f’għeluq sninha.

Hija mietet wara li fis-sigħat bikrin ta’ dalgħodu, ittajret minn raġel li wara li ħabat f’pompa tal-petrol, baqa’ dieħel fl-istabbiliment tal-ikel, KFC fil-Gżira.

Il-vittma, oriġinarjament minn Istanbul, kienet toqgħod il-Gżira stess, mhux wisq ‘il bogħod minn fejn seħħ l-inċident, u kienet ilha tgħix Malta għal aktar minn sena. Hija kienet taħdem bħala interior designer.

Mara ta’ 30 sena titlef ħajjitha traġikament wara li ttajret – Ir-raġel kien taħt l-effett tad-droga

Mara ta’ 30 sena titlef ħajjitha traġikament wara li ttajret – Ir-raġel kien taħt l-effett tad-droga

by | 18/Jan/23 | Ġrajjiet, Kurrenti, L-Aħħar Aħbar

Mara torka ta’ 30 sena tilfet ħajjitha traġikament fis-sigħat bikrin ta’ dalgħodu wara li karozza baqgħet dieħla f’ħanut fil-Gżira.

Skont dak li qed jiġi rrapurtat, għall-ħabta tas-siegħa ta’ filgħodu, fit-Triq Testaferrata, sewwieq ta’ 33 sena minn Ħal Lija, ħabat f’pompa tal-petrol u wara saq fir-ristorant tal-KFC, fejn kienet tinsab il-mara.

Nies li nzertaw fuq il-post ippruvaw jassistu mill-ewwel lill-mara, iżda x-xufier kien aggressiv, tant li qed jiġi rrappurtat li saħansitra beda jitfa’ l-ġebel. Kellhom ikunu l-pulizija li kontrollawh permezz ta’ taser u arrestawh.

Skont rapporti, ir-raġel kien taħt l-effett tad-droga u ma kienx jaf lill-vittma.

Il-Maġistrat Nadin Lia qed tmexxi inkjesta, filwaqt li l-investigazzjonijiet tal-pulizija għadhom għaddejjin.

Enable Notifications OK No thanks