Riċetta: Majjal bil-Larinġ u Patata Mimlija

Riċetta: Majjal bil-Larinġ u Patata Mimlija

by | 24/Jan/22 | Riċetti, Varjetà

Ingredjenti (għal 4 porzjonijiet):

Għal-laħam:

8 biċċiet majjal (jien użajt medallions)

Żewġ larinġiet imqatta’ slajsis

200ml stokk taċ-ċanga sħun

4 imgħaref dqiq plejn

Mgħarfa garlic powder

Mgħarfa sweet paprika

Mgħarfa mustard powder

Żewġt imgħaref butir

Kuċċarina soy sauce

Kuċċarina riegnu

Kuċċarina sagħtar

Kuċċarina worcestershire sauce

Bżar u melħ skont il-gosti tiegħek

Metodu:

  • Ħallat id-dqiq, il-garlic powder, is-sweet paprika u l-mustard powder flimkien fuq platt.
  • Immartella ftit il-biċċiet tal-majjal jew b’martell tal-kċina jew b’qiegħ ta’ tazza.
  • Għaddi kull biċċa majjal mit-taħlita tad-dqiq u ara li jinksew bit-taħlita miż-żewġ naħat.
  • Saħħan il-butir fuq nar medju f’taġen ftit fond u kif jisħon, aqli l-biċċiet tal-majjal għal madwar 3 minuti fuq kull naħa, sakemm tara li bdew jieħdu kulur dehebi.
  • Issa żid l-istokk sħun. Żid ukoll il-bżar, il-melħ, is-soy sauce, il-worcestershire sauce, is-sagħtar u r-riegnu. Baxxi n-nar, għatti it-taġen u ħallih itektek għal 15-il minuta sakemm il-laħam isir tari.
  • Ikxef it-taġen u poġġi slajs larinġa fuq kull biċċa laħam. B’imgħarfa tella’ ftit mill-gravy li għandek fit-taġen fuq kull biċċa laring. Erġa’ għatti t-taġen u ħallih itektek għal 5 minuti.
  • Servi immedjatament ma’ kontorn ta’ ħaxix jew patata.

Fir-ritratt ta’ din ir-riċetta se taraw toqlija sempliċi ta’ ħaxix imħallat u patata mimlija l-forn.

Ingredjenti għall-patata mimlija:

8 patatiet imdaqqsa bil-qoxra

Basla maħkuka

Żewġ sinniet tewm imqatta’ rqaq

8 slajsis bejken imqatta’

Nofs kuċċarina chilli flakes

4 mgħaref mozzarella maħkuk

4 cherry tomatoes maqsuma min-nofs

Kuċċarina żejt taż-żebbuġa

Metodu:

  • Aħsel u għalli l-patata bil-qoxra f’misħun jagħli għal bejn 15 u 20 minuta sakemm tiġi nofs sajran.
  • Sadanittant, saħħan iż-żejt ġo taġen. Żid il-bejken, il-basla, it-tewm u ċ-chilli flakes. Ħawwad u aqli sakemm il-bejken ikun sar sew.
  • Tella’ l-patata mill-misħun u aqtagħlha biċċa mill-wiċċ.
  • Ħaffer ftit il-patata u neħħi ftit mill-ġewwieni tal-patata.
  • Imla l-vojt bit-toqlija tal-bejken.
  • Daħħal il-patata fil-forn fuq dixx miksi bil karta tal-forn u aħmiha għal bejn 30 u 40 minuta sakemm iddaħħal ponta ta’ sikkina u tara li saret sew.
  • Oħroġ id-dixx u iksi l-wiċċ tal-mili bil-mozzarella u poġġi nofs tadama fil-wiċċ.
  • Erġa’ daħħal id-dixx fil-forn għal 10 minuti.

L-ikla t-tajba!

Din ir-riċetta ġiet imwassla lilkom minni u minn Vince Busuttil.

Jekk għandek xi mistoqsijiet dwar din ir-riċetta u oħrajn, ibagħtilna fuq info@skoperta.net

Riċetta: Koxox tat-Tiġieġ bil-Glaze tal-Għasel

Riċetta: Koxox tat-Tiġieġ bil-Glaze tal-Għasel

by | 15/Nov/21 | Riċetti, Varjetà

Ingredjenti (għal 4 porzjonijiet):

Żewġ imgħaref żejt taż-żebbuġa

4 koxox tat-tiġieġ bl-għadam u bil-ġilda

Nofs tazza għasel

Nofs tazza ħall tat-tuffieħ (apple cider vinegar)

Bżaru aħmar milli jaħraq, bla żerriegħa u mqatta’ fin

Kuċċarina kemmun midħun

Kuċċarina trab tat-tewm

Nofs kuċċarina melħ

Żewġ kuċċarini cornstarch

Żewġt imgħaref ilma

Metodu:

  • Saħħan il-forn minn qabel.
  • Żid iż-żejt taż-żebbuġa f’taġen kbir fuq nar qawwi.
  • Meta ż-żejt ikun jaħraq sew, żid it-tiġieġ, bin-naħa tal-ġilda ‘l isfel.
  • Aqli għal madwar 8 minuti jew sakemm il-ġilda tieħu kulur kanella.
  • Eqleb it-tiġieġ u aqli għal 5 minuti oħra.
  • Neħħi l-biċċiet tat-tiġieġ mit-taġen u poġġihom ġo dixx tal-forn.
  • Għalissa warrabhom f’post sħun.
  • Baxxi n-nar għal medju. Żid il-ħall tat-tuffieħ, l-għasel, il-bżaru aħmar, il-kemmun, it-trab tat-tewm, u l-melħ. Ħallih itektek għal 3 minuti.
  • Sadanittant ġo tazza poġġi l-ilma u l-cornstarch u ħawwad sakemm il-cornstarch jinħall kompletament.
  • Issa żid it-taħlita tal-cornstarch ġot-taġen mat-taħlita tal-għasel u ħawwad biex tgħaqqad. Sajjar għal żewġ minuti jew sakemm il-glaze tkun saret magħquda.
  • Ferra nofs il-glaze fuq il-biċċiet tat-tiġieġ fid-dixx tal-forn sakemm tara li ksejthom sew.
  • Sajjar mikxuf fil-forn għal kwarta.
  • Wara kwarta neħħi d-dixx mill-forn u erġa’ iksi t-tiġieġ bil-glaze li baqagħlek.
  • Erġa’ sajjar għal kwarta oħra.
  • Servi immedjatament.

Tista’ sservihom ma’ kwalunkwe kontorn ta’ patata jew ħaxix.

Jekk tixtieq li sservihom mal-kontorn li għandi jien fir-ritratti huwa facli ħafna…..

Ingredjenti (għal 4 porzjonijiet):

4 patatiet imdaqqsa, imqattgħin roti rqaq

Żewġ basliet kbar, imqattgħin roti rqaq

8 faqqiegħ, imqattgħin roti rqaq

4 sinniet tewm, imqattgħin irqaq

10 cherry tomatoes maqsumin min-nofs

Kuċċarina żejt taż-żebbuġa

Mgħarfa nbid abjad

Nofs dada tal-istokk tat-tiġieġ imdewba f’200ml ilma

Bżar u melħ skont il-gosti tiegħek

Kuċċarina kari

Mgħarfa ġobon cheddar maħkuk u mgħarfa ġobon mozzarella maħkuk imħalltin flimkien

Metodu:

  • L-aħjar li tuża taġen daqxejn fond u li għandu għatu.
  • Fit taġen saħħan iż-żejt u l-inbid.
  • Żid il-basal, il-faqqiegħ u it-tewm.
  • Żid il-bżar, il-melħ u il-kari.
  • Ħawwad sew u aqli sakemm il-basal jirtab.
  • Neħħi t-taġen minn fuq in-nar u itfa’ t-taħlita tal-basal ġo platt għal ftit ħin.
  • Issa rranġa it-tadam fil-qiegħ tat-taġen.
  • Fuq it-tadam poġġi saff patata.
  • Itfa’ nofs it-taħlita tal-basal fuq il-patata.
  • Erġa’ agħmel saff patata u spiċċa billi tferrex il-kumplament tat-taħlita tal-basal fil-wiċċ.
  • Ferra l-istokk tat-tiġieg li lestejt, għatti t-taġen u poġġi fuq nar baxx għal madwar kwarta, jew sakemm b’furketta tara l-patata saret sew.
  • Issa ferrex il-ġobon fil-wiċċ u erġa’ għatti u sajjar fuq nar baxx għal xi żewg minuti sakemm idub il-ġobon.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibagħtilna fuq info@skoperta.net

Riċetta: Flett taċ-Ċanga bil-Faqqiegħ

Riċetta: Flett taċ-Ċanga bil-Faqqiegħ

by | 14/Jun/21 | Riċetti, Varjetà

Għandek bżonn – għal żewġ porzjonijiet:

Żewġ steaks ħoxnin tal-flett taċ-ċanga

Mgħarfa żejt taż-żebbuġa

Għall-gratin tal-faqqiegħ:

Kuċċarina żejt taż-żebbuġa

Żewġ basliet, imqatta’ slajsis irqaq

3 sinniet tewm sħaħ, mgħaffġa bl-idejn

8 faqqiegħ (chestnut), maqtugħ f’biċċiet kbar

Melħ u bżar skont il-gosti tiegħek

250ml krema friska

3 isfra tal-bajd

Żewġ imgħaref kurrat imqatta’ rqiq

Żewġ imgħaref ġobon parmesan maħkuk

Għall-kontorn tal-patata u sprag:

Madwar 8 patatiet żgħar, maħsula u maqtugħa min-nofs

8 biċċiet sprag, maħsula u bit-truf ta’ wara mirquma

Mgħarfa żejt taż-żebbuġa

6 sinniet tewm imqatta’ rqaq ħafna

Mgħarfa ġobon parmesan maħkuk

Mgħarfa frak tal-ħobż

Niskata melħ u bżar

Kuċċarina sagħtar

Nofs kuċċarina riegnu

Nofs kuċċarina ħabaq

Żewġ imgħaref tursin frisk biex iżżejjen.

Metodu:

  • Jaqbel li l-ewwel tibda tipprepera l-kontorni, biex jilħqu jsiru bil-mod.
  • Aħsel il-patata u ħalliha bil-qoxra. Aqsamha min-nofs u ixħetha fi skutella kbira.
  • Magħha żid l-isprag li tkun ħsilt u qtajtlu t-truf ta’ wara.
  • Issa żid iż-zejt, il-ħabaq, is-sagħtar, ir-riegnu, il-bżar u l-melħ.
  • Żid ukol it-tewm, il-parmesan, u l-frak tal-ħobż.
  • Ħallat kollox sewwa u irrangahom fuq pjanċa tal-forn.
  • Sajjarhom f’forn 180 degrees għal madwar 45 minuta sakemm tara li saru sew u ħmaru.
  • Tihom taħwida wara xi 20 minuta.
  • Sadanittant iprepara il-gratin tal-faqqiegħ:
  • Fi skutella kbira, ħallat il-krema friska, l-isfra tal-bajd u l-kurrat. Warrabhom għal ftit.
  • Saħħan iż-żejt f’taġen kbir. Aqli l-basal, il-faqqiegħ u t-tewm sħiħ fuq nar għoli u ħawwad spiss sakemm tara li l-basal irtab u l-faqqiegħ sar.
  • Neħħi u armi t-tewm is-sħiħ.
  • Itfa’ l-basal u l-faqqiegħ ġol-iskutella mat-taħlita tal-krema friska, isfra tal-bajd u kurrat.
  • Ħawwadhom sew u warrabhom sakemm tiprepara l-laħam.
  • Sa dan il-ħin, il patata u l-isprag li għandek fil-forn se jkunu kważi saru.
  • Għall-aħħar pass, roxx sew bżar u melħ fuq il-laħam.
  • Saħħan iz-żejt f’taġen u aqli l-laħam għal ftit sekondi minn kull naħa fuq nar għoli.
  • Il-laħam irid biss jieħu kemm kemm kulur. M’għandux isir sew.
  • Irranġa l-laħam fuq pjanċa tal-forn. Poġġi ammont sew mill-gratin tal-faqqiegħ fuq kull biċċa laħam u roxx il-ġobon parmesan fil-wiċċ.
  • Daħħal il-pjanċa fil-forn sħun għal bejn 8 u 10 minuti.
  • B’hekk l-ikla kollha hi lesta u tista’ tirranġaha fuq il-platti tiegħek.
  • Żejjen bit-tursin frisk u servi.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net

Riċetta: Insalata tal-Patata bil-Bejken

Riċetta: Insalata tal-Patata bil-Bejken

by | 17/May/21 | Riċetti, Varjetà

Din l-insalata tajba anke sħuna bħala kontorn ma’ xi platt tal-laħam.

Għandek bżonn (għal 4 porzjonijiet):

4 patatiet kbar
Basla kbira mqatta’ rqiqa
4 slices bejken, imqattgħin f’biċċiet żgħar
Mgħarfa tewm imqatta’ fin ħafna
Kuċċarina żerriegħa tal-kosbor
Kuċċarina żrieragħ tal-kemmun
Kuċċarina oregano
Niskata bżar
Mgħarfa żejt taż-żebbuġa
Mgħarfa sherry vinegar
Mgħarfa kosbor imqatta’ frisk biex iżżejjen

Metodu:

  • Qaxxar u agħlli l-patata. Tħallihomx jirtabu wisq.
  • Saffi l-patata u ħalliha tibred, u mbagħad qattagħha f’biċċiet kbar.
  • F’taġen nonstick, aqli l-bejken, il-basla u t-tewm sakemm il-basla tirtab u l-bejken isir iqarmeċ.
  • M’hemmx bżonn ta’ żejt għax huma jsiru fix-xaħam li joħroġ mill-bejken stess.
  • Neħħi l-bejken, il-basla u t-tewm mit-taġen u poġġihom ġo skutella kbira.
  • Fl-istess taġen, żid iż-żerriegħa tal-kosbor, iż-żerriegħa tal-kemmun, l-oregano u l-bżar.
  • Qallihom għal żewġ minuti, u ħawwad kontinwament biex ma jeħlux u toħrog sew l-aroma taghħom.
  • Neħħi minn fuq in-nar u żidhom mat-taħlita tal-bejken.
  • Imbagħad żid ukoll il-patata ġol-iskutella.
  • Żid iż-żejt u l-ħall u ħawwad sew biex tiksi l-patata bit-taħlita u l-ħxejjex aromatiċi kollha.
  • Żejjen bil-kosbor frisk.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net

Enable Notifications OK No thanks