Select Page
“Ejjew inżommu ż-żjara tal-Papa f’pajjiżna ħajja billi ngħixu dak li qalilna fil-messaġġi tiegħu” – Fr. Aaron Zahra

“Ejjew inżommu ż-żjara tal-Papa f’pajjiżna ħajja billi ngħixu dak li qalilna fil-messaġġi tiegħu” – Fr. Aaron Zahra

Dawn l-aħħar jumejn rajna xeni mill-isbaħ f’pajjiżna matul iż-żjara appostolika tal-Papa Franġisku. Żjara li magħha ġabet għaqda u ferħ kbir fost il-poplu Malti.

Kienet ċara li ħafna n-nies ħassewhom kuntenti u ferħana li raw il-Papa għaddej mit-toroq tagħhom u setgħu jarawh daqshekk mill-viċin. Dan il-ferħ jista’ jiġi preservat fil-qalb tagħna jekk ngħixu fil-konkret dak li qalilna l-Papa Franġisku.

Fid-diskorsi tiegħu li għamel matul iż-żjara miss diversi temi li l-poplu Malti għandu bżonn jirifletti fuqhom ħafna. Il-Papa Franġisku ma naqasx milli jfakkarna li aħna naduraw u nagħtu qima lil Alla li hu ħanin u jagħdirna. Kienet providenzjali ħafna li inzerta ġie fostna fil-ħames Ħadd tar-Randan, meta l-liturġija toffrilna li niriflettu fuq l-episodju tal-mara adultera.

Fl-omelija, il-Papa Franġisku qalilna li Alla ma jgħeja qatt jaħfrilna, imma huwa aħna li ngħejew nitolbuh maħfra. Kliem qawwi ħafna li wieħed għandu jixtarr.

Fit-tmiem taż-żjara tiegħu, fil-laqgħa mar-refuġjati, il-Papa Franġisku ried ifakkarna li aħna rridu nilqgħu lil dawn in-nies b’idejna miftuħa. Ikolli nistqarr li dawk l-esperjenzi li smajna jħallu togħma ta’ qrusa fejn il-ħafna sabiħ u tajjeb li għandu l-poplu Malti. Hemm bżonn li naħdmu iktar biex nirrispettaw id-dinjità ta’ kull bniedem; ġej minn fejn ġej.

Il-poplu Malti, permezz tar-refuġjati, għandu l-opportunità li jkun mera tal-ħniena t’Alla. Irridu nippruvaw nilbsu ż-żarbun ta’ dawn in-nies li jkollhom iħallu pajjiżhom, familthom u djarhom biex jipproteġu l-ħajja tagħhom. Kieku aħna konna fis-sitwazzjoni tagħhom żgur li l-istess konna nagħmlu. Dan ukoll rajnieh b’għajnejna fuq it-TV ġewwa l-Ukrajna. Eluf ta’ nies iħallu pajjiżhom biex isibu kenn.

Ejjew inżommu ż-żjara tal-Papa Franġisku f’pajjiżna ħajja billi ngħixu dak li qalilna fil-messaġġi tiegħu.

Filmat: Milied fil-Qalb – Kollaborazzjoni mużikali bejn bosta kantanti Maltin

Filmat: Milied fil-Qalb – Kollaborazzjoni mużikali bejn bosta kantanti Maltin

Ftit ġranet ilu ġiet imnedija kanzunetta oriġinali bl-isem ta’ Milied fil-Qalb, flimkien ma’ vidjow mużikali, li diġà qed tintlaqa’ tajjeb ħafna mill-pubbliku.

Il-kantawtur Kurt Cassar, li s-sena li għaddiet kien il-moħħ wara l-interpretazzjoni Maltija tal-kanzunetta We Are The World, flimkien ma’ Mark Spiteri Lucas ħolqu din il-kanzunetta li twassal messaġġ ta’ ferħ u mħabba.

Milied fil-Qalb, twassal il-messaġġ li l-Milied nistgħu ngħixuh kuljum u mhux darba f’sena biss. Li nsibu dak li jagħmilna kuntenti, ngħożżu lil xulxin u nkunu hemm għal xulxin kuljum sabiex inżommu l-istess ferħ tal-Milied f’qalbna matul is-sena kollha.

L-interpretazzjoni tinvolvi bosta kantanti popolari Maltin fosthom Olivia Lewis, Mike Spiteri, Fiona Cauchi, Georgina Abela, Christian Arding, Kurt Cassar, Claudio Castelletti tal-grupp Malti ‘Kantera’, Mark Anthony, Mark Spiteri Lucas, Laura Bruno, Lawrence Grey, Martina Fenech, Ivan Spiteri Lucas u Krista, Vince Fabri, Dan, Marie Claire, Maria Luana, Victorio u Clive, Nicole Vella, Chanelle Monsigneur u oħrajn.

Hemm ukoll is-sehem ta’ kor tat-tfal u personalitajiet popolari Maltin fosthom Hector Bruno u Eileen Montesin flimkien ma’ atturi popolari oħrajn.

Kanzunetta li ċertament se tibqa’ tmiss il-qlub tal-Maltin u Għawdxin għal diversi snin.

“Din is-sena Sibtek se jkun kompletament differenti.” – Ryan u Josmar

“Din is-sena Sibtek se jkun kompletament differenti.” – Ryan u Josmar

Nitkellmu ma’ Ryan u Josmar

Proprju għada jibda’ l-istaġun il-ġdid ta’ Sibtek, li se jkun differenti mis-snin li għaddew. X’se nkunu qed naraw differenti f’din l-iskeda u x’se jibqa’ l-istess?

Ryan u Josmar: Iva, għada niftħu l-istaġun il-ġdid ta’ Sibtek! Din is-sena Sibtek se jkun kompletament differenti, fost ħafna affarijiet se jkollna mużika live, stil ta’ preżentazzjoni pjuttost differenti mis-soltu, ħafna sorpriżi u ħafna u ħafna daħq! Sibtek din is-sena se jibda iktar kmieni, fil-12.15 eżatt wara l-aħbarijiet ta’ nofsinhar fuq TVM.

X’tistgħu tiżvelaw fuq l-istaġun il-ġdid?

Ryan u Josmar: Se tirritorna il-VIP house li tant baqgħu jħobbu n-nies! Nassigurawkom li Sibtek din is-sena se jkun programm verament għall-familja kollha.

Għaliex taħsbu li Sibtek, sena wara sena jkun daqstant segwit? U x’taħsbu li se jħeġġeġ lit-telespettaturi jkomplu jsegwu dan l-istaġun ukoll?

Ryan u Josmar: Li tkun qrib in nies u li tisma’ hija l-iktar ħaġa importanti. Li tevolvi u timxi mal-moda u maż-żmien hija essenzjali għax IVA, aħna nemmnu li anke t-televiżjoni għandu l-moda tiegħu. Din is-sena n-nies se jaraw kemm Sibtek huwa versatili. Biss biss l-ewwel u t-tieni programmi huma totalment differenti minn xulxin.

Bħala xogħol ta’ produzzjoni, kif taħdmuh u tqassmuh bejnietkom? Taqblu fl-ideat li jkollkom?

Ryan u Josmar: Il-produzzjoni nidħlu fiha t-tnejn li aħna u naqblu ħafna però għandna tim ta’ nies kollha etajiet differenti minn 17-il sena sa 60 sena biex żgur inkunu ċerti li nolqtu lill-familja kollha.

Wara dawn is-snin kollha, tkunu eċitati qabel kull programm?

Ryan u Josmar: ĦAFNA ĦAFNA ĦAFNA, friefet kbar għandna bħalissa!!!!

X’inhu l-messaġġ tagħkom għas-segwaċi li se jkunu magħkom f’din l-iskeda wkoll?

Ryan u Josmar: Napprezzaw immens is-sapport u l-imħabba kollha li nirċievu kontinwament mingħandkom. INĦOBBUKOM ĦAFNA! Grazzi mill-qalb talli Sibtek.

Normalment, Ryan u Josmar iħobbu jwasslulna kurżitajiet dwar diversi personalitajiet, imma llum se niskopru ftit dwarhom u r-relazzjoni tagħhom bħala koppja..

Fejn iltqajtu għandna idea, għaliex nassumu li kien proprju Sibtek li laqqagħkom flimkien iżda għidulna l-istorja ta’ meta iddeċidejtu li tieħdu r-relazzjoni tagħkom għal dik ta’ koppja… min għamel l-ewwel pass?

Josmar: Propjament aħna ltqajna qabel Sibtek, fuq proġett tat-televiżjoni ieħor bl-isem ta’ Generation. Kien programm tad-diskussjoni miż-żgħażagħ għaż-żgħażagħ. Ryan kien jippreżenta u jien inkanta dak iż-żmien. Minn hemmhekk bdiet ħbiberija speċjali sakemm wasalna għall-ħajja tagħna flimkien li għandna llum il-ġurnata.

Fejn kienet l-ewwel date uffiċjali?

Ryan: Fuego (illum m’għadux miftuħ sa fejn naf jien) morna nippreżentaw fuq xogħol propja, kienet serata Latina ħelwa ħafna. Imbagħad bqajna hemm!

Kif tiddeskrivu lil xulxin?

Josmar: Ryan huwa nadif immens, iffissat propjament. Lest jasal tard basta ħalla d-dar pinna u kollox pulit u organizzat. Iħobb ħafna x- xogħol u jaħdem ħafna ħafna u minn qalbu.

Ryan: Josmar dejjem jivvinta proġetti ġodda. Ma jibżax minn challenge u riskju jidħol għalih b’għajnejh magħluqa.

Kif jaffettwa r-relazzjoni tagħkom il-fatt li taħdmu flimkien? X’inhuma l-vantaġġi u l-iżvantaġġi?

Ryan u Josmar: Onestament aħna naraw vantaġġi biss. Allaħares ma naħdmux flimkien għax kieku lanqas naraw lil xulxin xi drabi. Ovvjament billi naħdmu flimkien ma jfissirx li l-ħin kollu flimkien. Ix xogħol taghna huwa vast ħafna, minn produzzjoni, editing, sales, u elf ħaġa oħra. We wouldn’t have it any other way.

Kif jirnexxilkom issibu bilanċ bejn ix-xogħol u l-ħin ta’ kwalità ta’ bejnietkom?

Ryan u Josmar: Ma nsibux fil-verità! Meta nħossuna stressjati, date night. Ikla tajba u flixkun inbid tajjeb hux..

Fuq xiex targumentaw l-aktar? U fuq xiex taqblu l-aktar?

Ryan u Josmar: Nargumentaw fuq l-indafa!!!! Naqblu fuq ix-xogħol!!

Min minnkom iċedi l-ewwel f’argument?

Ryan: Bla dubju Josmar!

X’jogħġobkom l-aktar f’xulxin?

Josmar: Ryan huwa ġentili u għandu qalb tad-deheb.

Ryan: Josmar jaf jieħu gost u pożittiv ħafna!

X’differenza jagħmel Rocco fil-ħajja tagħkom?

Ryan u Josmar: Rocco huwa l-baby tagħna. Il-ġurnata tagħna ddur miegħu wkoll. Naraw li jkollna biżżejjed ħin miegħu. Jekk jista’ jkun naraw li fejn se mmorru jista’ jiġi Rocco. Mhux dejjem possibbli, però fejn possibbli, jiġi.

Liema żmien kien l-aktar ta’ sfida għar-relazzjoni tagħkom?

Ryan u Josmar: Realistikament il-ħajja dejjem toffri xi sfida. Daqqa d-dar, daqqa x-xogħol, daqqa hekk u daqqa hekk. L-importanti li fl-isfidi tingħaqad flimkien għax b’hekk biss tista’ tirbaħ dik l-isfida. Bla dubju fi żminijiet ta’ sfidi kull relazzjoni tissaħħaħ. U aħna mhux b’inqas.

X’kienet l-aktar ħaġa spontanja li għamiltu bħala koppja?

Ryan u Josmar: Darba konna l-ajruport nieħdu kafè u qbadna xtrajna biljett u sifirna dak il-ħin ċum bum! L-ewwel flight kien għal Heathrow u morna hemm! Bla ħsieb u bla bagalji!!

Min minnkom hu l-aktar romantiku?

Ryan: L-ebda! How boring hux, imma ma tantx aħna romantiċi. Però Josmar ftit iktar!!

X’tgħallimtu mingħand xulxin?

Ryan u Josmar: Life is what you make it. Għix pożittiv u ara dejjem is-sabiħ fil-ħajja. Il-maltemp mhux se jibqa’ għal dejjem. Ix-xemx titla’ għal kulħadd!!

X’inhuma l-aspirazzjonijiet tagħkom bħala koppja?

Ryan u Josmar: Ngħixu ħajja sempliċi man-nies li nħobbu viċin tagħna u nkunu kuntenti. Xejn materjali. Xejn isbaħ mis-sempliċità.

Min kienet Florence Nightingale u x’impatt għamlet fuq l-Infermerija?

Min kienet Florence Nightingale u x’impatt għamlet fuq l-Infermerija?

Florence Nightingale, magħrufa bħala The Lady With the Lamp, kienet infermiera Ingliża, riformatriċi soċjali u statitriċi magħrufa l-aktar bħal l-fundatriċi tal-infermerija moderna. L-esperjenzi tagħha bħala infermiera matul il-Gwerra tal-Krimea kienu fundamentali fil-fehmiet tagħha dwar is-sanità. Hija waqqfet St. Thomas’ Hospital u Nightingale Training School għall-infermiera. L-isforzi tagħha biex tirriforma l-kura tas-saħħa influwenzaw ħafna l-kwalità tal-kura fis-sekli 19 u 20.

Florence Nightingale twieldet fit-12 ta’ Mejju tal-1820, ġewwa Firenze, l-Italja. Hija kienet l-iżgħar minn żewġt itfal u ġejja minn familja sinjura. Ommha, Frances Nightingale, kienet ġejja minn familja ta’ negozjanti u ta’ spiss kienet tissoċjalizza ma’ nies ta’ pożizzjoni soċjali prominenti. Minkejja dan, Florence, kienet ferm differenti minn ommha u kienet tkun ferm skomda f’sitwazzjonijiet soċjali. Hija kienet tippreferi li tevita li tkun fiċ-ċentru tal-attenzjoni kull meta kien ikun possibbli.

Missier Florence kien William Shore Nightingale, sinjur u sid ta’ art. Huwa kien wiret żewġ patrimonji, waħda f’Lea Hurst, Derbyshire, u l-oħra f’Hampshire, Embley Park, meta Florence kellha 5 snin. Florence trabbiet fil-propjetà tal-familja f’Lea Hursr, fejn missierha pprovdilha edukazzjoni klassika, inklużi studji bil-Ġermaniż, bil-Franċiż u bit-Taljan.

Minn età żgħira ħafna, Florence Nightingale kienet diġà attiva fil-filantropija, taqdi lin-nies morda u foqra fil-villaġġ ġirien tal-patrimonju tal-familja tagħha. Sakemm kellha 16-il sena, kienet ċara għaliha li l-infermerija kienet is-sejħa tagħha. Hija kienet temmen li dan kien l-iskop divin tagħha.

Meta Nightingale avviċinat lill-ġenituri tagħha u qaltilhom dwar l-ambizzjoni tagħha li ssir infermiera, ma kinux kuntenti. Fil-fatt, ipprojbewha li ssegwi x-xewqa tagħha. Matul l-era Vittorjana, tfajla tal-istatura soċjali bħal ta’ Nightingale kienet mistennija li tiżżewweġ raġel sinjur, u mhux tidħol għal xogħol li mill-klassijiet soċjali ta’ fuq kien meqjus bħala wieħed li d-dħul tiegħu kien baxx ħafna. Meta kellha 17-il sena, hija rrifjutat proposta taż-żwieġ, u r-raġuni tagħha kienet proprju li l-unika ambizzjoni tagħha kienet li ssir infermiera.

Determinata li ssegwi s-sejħa vera tagħha minkejja l-oġġezzjonijiet tal-ġenituri tagħha, fl-1844, Nightingale rreġistrat bħala studenta tal-infermerija f’Lutheran Hospital of Pastor Fliedner f’Kaiserwerth, il-Ġermanja.

Fil-bidu tas-snin 1850, Nightingale irritornat Londra, fejn ħadet xogħol ta’ infermiera fi sptar f’Middlesex għal governanti morda.il-ħidma tagħha hemmhekk impressjonat lil min kien impjegaha tant li ġiet promossa għal superintendent fi żmien sena biss minn mindu bdiet taħdem hemm. Din il-pożizzjoni kienet waħda ta’ sfida hekk kif Nightingale kellha tħabbat wiċċha mal-pandemija tal-kolera u kundizzjonijiet mhux sanitarji li wasslu għat-tixrid mgħaġġel tal-marda. Nightingale għamlitha l-missjoni tagħha li ttejjeb il-prattiki tal-iġjene, u tnaqqas b’mod sinifikanti r-rata tal-imwiet fl-isptar fil-proċess. Ix-xogħol iebes li kellha tiffaċċja ħalla effett fuq saħħitha.

Kienet għadha bilkemm irkuprat, meta Florence kellha tiffaċċja l-akbar sfida tal-karriera tagħha fl-infermerija. F’Ottubru tal-1853, faqqgħet il-Gwerra tal-Krimea. L-Imperu Ingliż kien fi gwerra kontra l-Imperu Russu għall-kontroll tal-Imperu Ottoman. Eluf ta’ suldati Ingliżi ntbagħtu fil-Black Sea, fejn il-provvisti naqsu malajr. Sal-1854, xejn inqas minn 18,000 suldat kienu ddaħħlu fi sptarijiet militari.

Dak iż-żmien, ma kienx hemm infermiera nisa stazzjonati fi sptarijiet fil-Krimea. Ir-reputazzjoni fqira ta’ infermiera nisa tal-passat kienet wasslet lill-uffiċċju tal-gwerra biex jevita li jimpjega aktar. Iżda, wara l-battalja tal-Alma, l-Ingilterra kienet f’diffikultà dwar in-negliġenza tas-suldati morda u midruba tagħhom, li mhux biss ma kellhomx biżżejjed attenzjoni medika minħabba li l-isptarijiet ma kellhomx biżżejjed staff, iżda wkoll kienu f’kundizzjonijiet mhux sanitarji u inumani.

Fl-aħħar tal-1854, Nightingale irċeviet ittra mingħand is-Segretarju tal-Gwerra Sydney Herbert, fejn talabha torganizza grupp ta’ infermiera biex jieħdu ħsieb is-suldati morda u midruba tal-gwerra tal-Krimea. Nightingale wieġbet għal din is-sejħa u minnufih ġabret tim ta’ 34 infermier minn varjetà ta’ ordnijiet reliġjużi u baħħret magħhom lejn il-Krimea ftit jiem biss wara.

Għalkemm kienu avżati bil-kundizzjonijiet orribbli li kien hemm, xejn ma seta’ jħejji biżżejjed lil Nightingale u lill-infermiera tagħha għal dak li raw meta waslu fi Scutari, l-isptar bażi Ingliż f’Kostantinopli. Minbarra n-nuqqas esaġerat ta’ iġjene, l-iktar provvisti bażiċi, bħal faxex u sapun kienu skarsi ħafna hekk kif in-numru ta’ morda u feruti kien żdied b’mod kostanti. Anke l-ilma kellu bżonn jiġi razzjonat. Aktar suldati kienu qed imutu minn mard infettiv bħat-tifojde u l-kolera milli minn ġrieħi mġarrba fil-battalja.

Nighgtingale kienet determinata li tibdel dawn il-kundizzjonijiet għall-aħjar. Irnexxielha takkwista mijiet ta’ xkupilji u kienet talbet lill-pazjenti l-inqas dgħajfa biex jogħrku kull rokna tal-isptar. Min-naħa tagħha, qattgħet kull minuta tieħu ħsieb is-suldati.

Filgħaxija kienet iddur fil-kurituri mudlama ġġorr lampa, u ddur u taqdi lil pazjent wara pazjent. Is-suldati, li kienu japprezzaw u jfittxu l-wens fil-kompassjoni bla limitu tagħha, kienu bdew isejħulha bħala “The Lady with the Lamp” filwaqt li oħrajn kienu jsejħulha bħala “The Angel of Krimea”. Ix-xogħol tagħha fl-isptar naqqas ir-rata ta’ mwiet b’żewġ terzi.

Minbarra li tejbet bil-kbir il-kundizzjonijiet sanitarji tal-isptar, Nightingale ħolqot numru ta’ servizzi għall-pazjenti li kkontribwew għat-titjib tal-kwalità tas-servizz li jingħata fl-isptar. Hija waqqfet il-ħolqien ta’ “kċina tal-invalidi” fejn kien ikun imsajjar ikel bnin għal pazjenti b’dieta speċjali. Stabbiliet il-laundry sabiex il-pazjenti jkollhom lożor nodfa. Hija waqqfet ukoll kamra u librerija għad-divertiment u l-istimulazzjoni intellettwali tal-pazjenti.

Ibbażati fuq l-osservazzjonijiet tagħha fil-Krimea, Nightingale kitbet noti dwar kwistjonijiet li jaffettwaw is-saħħa, l-effiċjenza u l-amministrazzjoni tal-isptar tal-armata Ingliża, rapport ta’ 830 paġna li janalizza l-esperjenza tagħha u jipproponi riformi għal sptarijiet militari oħra li joperaw f’kundizzjonijiet ħżiena. Il-ktieb jitratta ristrutturar totali tad-dipartiment amministrattiv tal-Uffiċċju tal-Gwerra, inkluż it-twaqqif ta’ Kummissjoni Rjali għas-Saħħa tal-Armata fl-1857.

Nightingale baqgħet f’Scutari għal sena u nofs. Hija telqet fis-Sajf tal-1856, ladarba l-kunflitt tal-Krimea ġie solvut, u rritornat lura fid-dar ta’ tfulitha f’Lea Hurst. B’sorpriża għaliha, intlaqgħet b’merħba ta’ eroj, li bl-umiltà tagħha għamlet minn kollox biex tevita. Ir-Reġina ppremjat ix-xogħol ta’ Nightingale billi ppreżentatilha brazzuletta mnaqqxa li saret magħrufa bħala “Nightingale’s Jewel” u billi tatha premju ta’ $250,000 mill-gvern Ingliż.

Bl-appoġġ tar-Reġina Victoria, Nightingale għenet biex tinħoloq Kummissjoni Rjali għas-Saħħa tal-armata. Hija impjegat statistiċi ewlenin tal-ġurnata, William Farr u John Sutherland, biex janalizzaw id-dejta dwar il-mortalità tal-armata, u dak li sabu kien tal-biża’: 16,000 mit-18,000 imwiet kienu minn mard li jista’ jiġi evitat u mhux mill-gwerra. Kienet l-abbiltà ta’ Nightingale li ttraduċiet din id-dejta f’format viżiva ġdid li verament ikkawżat sensazzjoni. Id-dijagramma taż-żona polari tagħha, issa magħrufa bħala “Nightingale Rose Diagram”, uriet kif ix-xogħol tal-Kummissjoni Sanitarja naqqas ir-rata tal-mewt u għamel id-dejta kkumplikata aċċessibbli għal kulħadd, u jispira standards ġodda għas-sanità fl-armata u lil hinn minnha. Hija saret l-ewwel membru mara tar-Royal Statistical Society u ġiet imsemmija membru onorarju tal-American Statistical Association.

Nightingale ddeċidiet li tuża l-flus biex tiffavorixxi l-kawża tagħha. Fl-1860, hija ffinanzjat it-twaqqif ta’ St. Thomas Hospital, u fi ħdanu, The Nightingale Training School għall-infermiera. Nightingale saret figura ta’ ammirazzjoni pubblika. Poeżiji, kanzunetti u drammi ġew miktuba u ddedikati għall-unur ta’ din l-eroj. Nisa żgħażagħ kienu jaspiraw li jkunu bħalha. Ħerqana li jsegwu l-eżempju tagħha, anke nisa sinjuri mill-klassijiet għolja bdew jirreġistraw fl-iskola tat-taħriġ. Nightingale introduċiet perspettiva ġdida u differenti dwar l-infermerija, lill-klassijiet għolja, fil-fatt kienet saret meqjusa bħala vokazzjoni onorabbli.

Waqt li kienet f’Scutari, Nightingale kien qabadha dak li kien jissejjaħ bħala “Crimean Fever”, li qatt ma rkuprat minnu kompletament. Meta kellha 38 sena, kienet spiċċat homebound u bedridden, u li baqgħet hekk għall-bqija ta’ ħajjitha.

B’determinazzjoni u dedikazzjoni bħal dejjem biex ittejjeb il-kura tas-saħħa u ttaffi t-tbatija tal-pazjenti, Nightingale kompliet bil-ħidma mis-sodda tagħha!

Waqt li kienet tgħix f’Mayfair, hija baqgħet awtorità u avukata għar-riforma tal-kura tas-saħħa, billi tintervista politiċi u tilqa’ viżitaturi distinti mis-sodda tagħha. Fl-1859, hija ppubblikat noti dwar l-isptarijiet, li kienu jitrattaw fuq kif tmexxi sew sptarijiet ċivili.

Matul il-Gwerra Ċivili tal-Istati Uniti, kienet tkun ta’ spiss ikkonsultata dwar kif għandhom jiġu mmexxija l-aħjar il-field hospitals. Nightingale serviet ukoll bħala awtorità dwar kwistjonijiet ta’ sanità pubblika fl-Indja kemm għall-militar kif ukoll għal persuni ċivili, għalkemm qatt ma marret l-Indja.

Fl-1908, fl-età ta’ 88 ingħatat il-merti ta’ unur mir-Re Edward. F’Mejju tal-1910, hija rċeviet messaġġ ta’ awguri mingħand ir-Re Ġorġ f’għeluq id-90 sena.

F’Awwissu tal-1910, Florence Nightingale mardet, imma dehret li rkuprat u kienet fi spirtu tajjeb. Ġimgħa wara, fit-12 t’Awwissu, 1910, kien proprju l-Ġimgħa filgħaxija, hija żviluppat sintomi inkwetanti , u mietet l-għada s-Sibt, 13 t’Awwissu, fis-14:00 fid-dar tagħha f’Londra.

B’mod karatteristiku, hija kienet esprimiet ix-xewqa li l-funeral tagħha jkun pjuttost kwiet u modest, minkejja x-xewqa tal-pubbliku li jonora lil Nightingale, li bla heda ddedikat ħajjitha għall-prevenzjoni tal-mard u l-iżgurar ta’ trattament sigur u kompassjonali għall-foqra u t-tbatija.

Bħala turija ta’ rispett lejn ix-xewqa tagħha, il-qraba tagħha rrifjutaw funeral nazzjonali. “The Lady with the Lamp” ġiet midfuna f’Hampshire, l-Ingilterra.

Il-mużew ta’ Florence Nightingale, li jinsab fis-sit ta’ The Nightingale Training School għall-infermiera, l-oriġinali, fih aktar minn 2,000 artifatt li jikkommemoraw il-ħajja u l-karriera ta’ “The Angel of Crimea”.

Sal-lum, Florence hija rikonoxxuta u meqjusa bħala l-pijuniera tal-infermerija moderna.

Għandi nibqa’ fiż-żwieġ minħabba t-tfal?!

Għandi nibqa’ fiż-żwieġ minħabba t-tfal?!

Wara l-aħħar artiklu dwar “Meta l-ġenituri jisseparaw” kellna ħafna mistoqsijiet.. u kummenti differenti. Tajjeb li ngħidulkom li kull każ huwa differenti u ċerti kwistjonijiet ikunu jeħtieġu attenzjoni individwali, anki għall-fatt li wieħed irid jisma’ l-istorja kollha u jidħol fid-dettal biex ix-xogħol isir sew. Għaldaqstant għalkemm aħna nagħmlu li nistgħu biex inwieġbu xi domandi permezz tal-artiklu iżda meta hemm sitwazzjonijiet urġenti, importanti li nfakkrukom li għandkom tfittxu sapport minn professjonisti mill-aktar fis possibli, kemm permezz ta’ servizzi privati kif ukoll dawk bla ħlas ipprovduti minn aġenziji differenti.

Mistoqsija li staqsew ħafna hija l-mistoqsija “Għandi nibqa’ fi żwieġ minħabba t-tfal?” Din hi mistoqsija li jistaqsu ħafna u fir-realtà m’hemmx tweġiba definittiva għax kull każ huwa differenti. Però ħassejna l-bżonn li nidħlu ftit aktar fid-dettal dwar dan permezz ta’ dan l-artiklu.

Din il-mistoqsija ġġib magħha mistoqsija oħra li tajjeb li wieħed jirrifletti fuqha – it-tfal kif se jħossuhom l-aħjar, meta l-ġenituri qed jgħixu taħt l-istess saqaf bi ġlied kontinwu jew inkella meta l-ġenituri qed jgħixu separati minn xulxin iżda aktar kalmi?

Ir-riskji meta jkun hemm il-problemi u l-ġenituri jkunu għadhom jgħixu flimkien.

Ir-riċerka tgħid li jekk it-tfal qed jgħixu taħt saqaf fejn b’mod kontinwu qed jesperjenzaw emozzjonijiet ta’ rabja, frustrazzjoni, uġigħ u ġlied, iċ-ċans hu li jieħdu eżempju ħażin ta’ x’jiġifieri li tkun ġenitur tajjeb u dan jista’ jinġarr magħhom għall-ġenerazzjoni li jmiss. Hemm implikazzjonijiet b’saħħithom li jekk il-ġenituri ma jafux kif jiffaċċjaw kunflitt se jkun hemm ħsara psikoloġika fuq it-tfal speċjalment jekk dawn qed jiġu esposti għal din it-tip ta’ ħajja.

Xi wħud mit-tfal se jesperjenzaw dak li bl-Ingliż ngħidulu neglect. Dan se jkun kemm fiżiku jiġifieri pereżempju nuqqas ta’ ikel jew mhux ikel bnin jew il-ġenituri rari jiltaqgħu għax meta jiltaqgħu jiġġieldu. Anke nuqqas emozzjonali jekk it-tifel jew tifla jħossu n-nuqqas ta’ wieħed mill-ġenituri, anke jekk dawn ikunu għadhom jgħixu taħt l-istess saqaf imma jħossu li l-ġenituri qed jaħsbu għal rashom.

Jekk il-ġenituri jindunaw li ma jistgħux jibqgħu jgħixu flimkien minħabba ġlied, pika kontinwa u anke forsi jkunu attendew couple’s therapy u rrealizzaw li mhux tajbin biex jgħixu flimkien, din tista’ tkun indikazzjoni aktar ċara li wieħed irid jimxi għad-divorzju jew separazzjoni.

Il-valur li wieħed jibqa’ flimkien.

Ir-riċerka wkoll tgħidilna li jekk il-ġenituri għalkemm mhux iħossuhom tajjeb flimkien iżda jirnexxilhom iżommu l-paċi u kooperazzjoni bejniethom dan ikun ta’ ġid għall-ulied. Jekk il-ġenituri jirnexxilhom iżommu l-paċi u mingħajr ma jesponu lil ulied għal ħafna ġlied u pika jkun allura aħjar li jibqgħu jgħixu taħt l-istess saqaf anke jekk mhux kuntenti flimkien.

Allura, kif se niddeċiedi għandix immur għad-divorzju jew le?

Din mhix deċiżjoni faċli iżda mhix impossibbli ..

Wieħed irid jistaqsi dan li ġej:

  • Jeżisti abbuż? – ikun ta’ ħsara kbira jekk l-ulied qed jiġu esposti għal abbuż sesswali, fiżiku jew psikoloġiku. Jekk il-ġenitur li jabbuża ma jurix lok għal bidla allura f’dan il-każ wieħed jista’ forsi jiddeċiedi li jsir il-pass…
  • Il-ġenituri kapaċi jikkoperaw ma’ xulxin anke jekk ma jaqblux? – jekk il-ġenituri huma maturi biżżejjed li għalkemm ma jaqblux bejniethom u li kieku m’hemmx it-tfal kienu jisseparaw iżda minħabba t-tfal iħallu ħajjithom on hold, din tista’ taħdem, jekk Il-ġenituri mhumiex jirnexxilhom jikkoperaw allura wieħed jista’ forsi jiddeċiedi li jsir il-pass
  • Nistgħu nsewwu ż-żwieġ b’xi mod? – Qabel ma wieħed imur għas-separazzjoni irid jara jekk sarx xogħol biex wieħed isalva ż-żwieġ, jekk wieħed ikun għamel ċertu xogħol bħal pereżempju marru couple’s therapy imma l-ħsara li saret hija rreparabbli, allura wieħed jista’ jiddeċiedi li forsi jagħmel il-pass.
  • Is-seperazzjoni hija inevitabbli? – jekk wieħed jirrealizza li forsi jkun aħjar għal kulħadd li jsir il-pass u jsir qbil dwar kif wieħed se jissepara jista’ jkun li l-ulied fl-aħħar mill-aħħar ikunu kalmi u kuntenti anke jekk isir il-pass għax għalkemm il-ġenituri mhux qed jgħixu taħt l-istess saqaf xorta jkunu committed għal uliedhom u xorta jikkoperaw ma’ xulxin għall-ġid tal-ulied.

Din mhix deċiżjoni faċli u kif għidt fil-bidu m’hemmx tweġiba perfetta u preċiża għax kull każ hu differenti..

F’dawn iċ-ċirkostanzi li nfittxu sapport professjonali hu importanti ħafna biex innaqqsu t-tbatija għal kulħadd u d-deċiżjoni li nkunu ħadna tkun aktar infurmata u mhux waħda mgħaġġla..

Dan jista’ jgħinna nħossuna aħjar anke f’mumenti diffiċli..

Awguri u tislijiet..

Jekk għandek xi suġġett partikolari li tixtieq li nitkellmu dwaru, ibgħatilna fuq info@skoperta.net

Enable Notifications OK No thanks