Select Page
Riċetta: Tagliatelli bil-Gambli u l-Krema

Riċetta: Tagliatelli bil-Gambli u l-Krema

Ingredjenti (għal 4 porzjonijiet):

350g tagliatelli

Żewġ imgħaref butir, separati

300g gambli mqaxxra

Tliet sinniet tat-tewm, ikkapuljat

65ml inbid abjad niexef

250ml krema

125ml stokk tat-tiġieġ (jew stokk tal-ħut jew tal-ħaxix)

50g ġobon parmiġġan maħkuk fin

Żewġ imgħaref tursin imqatta’ fin

Bżar għat-togħma

Metodu:

  • Għalli borma kbira ilma. Żid l-għaġin u sajjar minuta inqas minn kemm hemm miktub fuq il-pakkett.
  • Eżatt qabel issaffi l-għaġin, tella’ tazza ilma tat-tisjir tal-għaġin u warrab.
  • Saffi l-għaġin.
  • Sadanittant, dewweb mgħarfa butir fuq nar medju f’taġen kbir li ma jwaħħalx.
  • Żid il-gambli u sajjar għal żewġ minuti fuq kull naħa. Neħħi l-gambli u warrabhom.
  • Fl-istess taġen, żid l-imgħarfa l-oħra tal-butir. Kif idub, żid it-tewm u ħawwad għal 20 sekonda sakemm jibda jfuħ.
  • Żid l-inbid u ħawwad. Tektek għal żewġ minuti sakemm l-inbid jonqos ftit.
  • Żid krema, l-istokk u l-parmiġġan. Ħawwad sakemm idub il-parmiġġan, imbagħad ħallih itektek għal żewġ minuti sakemm jagħqad ftit (se jagħqad aktar fil-pass li jmiss).
  • Żid il-gambli, ħawwad, imbagħad żid l-għaġin flimkien ma’ madwar kwart ta’ tazza ilma tal-għaġin li kont warrabt. Ħalli t-taġen fuq nar baxx u itfa’ l-għaġin u ħawwad. Se tinnota li z-zalza teħxien f’madwar 40 sekonda u tibda teħel mal-għaġin.
  • Neħħiha minn fuq in-nar qabel ma z-zalza tkun għaqdet wisq.
  • Roxx il-biċċa l-kbira tat-tursin u l-bżar iswed.
  • Erġa’ ħawwad sakemm il-konsistenza taz-zalza tkun għall-gosti tiegħek.
  • Jekk tara li għaqdet wisq, tista’ żżid ftit ieħor mill-ilma tal-għaġin li kont warrabt.
  • Servi immedjatament, imżejjen bit-tursin u l-parmiġġan li fadallek.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibagħtilna fuq info@skoperta.net

Riċetta: Creamy Mushroom Spaghetti with a Crunchy Beef Topping

Riċetta: Creamy Mushroom Spaghetti with a Crunchy Beef Topping

Ingredjenti (għal 4 porzjonijiet):

400g spagetti

200g laħam taċ-ċanga, imqatta’ f’biċċiet żgħar

Żewġ imgħaref dqiq

Kuċċarina kari

Nofs kuċċarina melħ

Nofs kuċċarina bżar

Kwart ta’ kuċċarrina mixed spice

Kwart ta’ kuċċarina ħabaq niexef

Niskata salvja niexfa

Mgħarfa butir

300g faqqiegħ imqatta’

4 tewmiet mit-twil, imqatta’ rqiq

4 spring onions, imqatta’ rqaq

Niskata melħ u niskata bżar

Żewġt imgħaref inbid aħmar

Mgħarfa HP sauce

Kuċċarina żejt

200ml krema friska

100g ġobon maħkuk

Ftit kosbora friska mqatta’ biex iżejjen.

Metodu:

  • Ibda billi tħallat flimkien id-dqiq, il-kari, is-salvja, il-mixed spice, il-ħabaq u l-bżar u l-melħ ġo skutella.
  • Żid il-biċċiet tal-laħam imqatta’ żgħar u ħallat sew sakemm tara li l-laħam ikun miksi sew bit-taħlita tad-dqiq.
  • Għatti l-iskutella u poġġiha fil-friġġ għal mill-anqas nofsiegħa.
  • Itfa’ borma bl-ilma fuq in-nar biex tgħalli l-ispagetti.
  • Ġo taġen poġġi ż-żejt, l-HP sauce, l-inbid, u l-bżar u l-melħ.
  • Poġġi t-taġen fuq nar medju u ħallih jisħon ftit sakemm itir l-alkoħol tal-inbid.
  • Żid il-faqqiegħ, il-basal, u t-tewm. Ħawwad u ħallih fuq in-nar sakemm il-faqqiegħ isir artab. Kultant tih taħwida.
  • Kif tara li sar, warrab it-taħlita tal-faqqiegħ ġo platt.
  • Fl-istess taġen saħħan il-butir, u kif jisħon sew, żid il-laħam u aqlih fuq nar medju waqt li tħawwad spiss sakemm il-biċċiet tal-laħam isiru iqarmċu. Madwar 15 u 20 minuta.
  • Sadanittant il-misħun ikun għala. Itfa’ l-ispagetti biex isir, għal 12-il minuta.
  • Kif isir l-ispagetti, saffih u erġa’ itfgħu mill-ewwel ġol-borma.
  • Żidlu l-ġobon maħluk, il-krema friska, u t-taħlita tal-faqqiegħ.
  • Poġġi l-borma fuq nar baxx kemm jista’ jkun u ħawwad kontinwament għal 3 minuti sakemm jitħallat kollox.
  • Qassam fuq platti immedjatament. Żid ftit mil-laħam iqarmeċ fuq kull platt u żejjen il-wiċċ bil-kosbora mqatta’.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibagħtilna fuq info@skoperta.net

Riċetta: Risotto bit-Tiġieġ u z-Zalzett

Riċetta: Risotto bit-Tiġieġ u z-Zalzett

Għandek bżonn – għal 4 porzjonijiet):

50g butir

100g zalzett tal-għażla tiegħek, maqtugħ fi slajsis (Jien użajt zalzett Grieg bil-ħxejjex aromatiċi)

Basla kbira, mqatta’ b’mod fin

250g faqqiegħ, imfellel oħxon

400g ross tat-tip arborio

150ml inbid abjad

1.4L stokk tat-tiġieġ, sħun

150g tiġieġ mixwi jew mgħolli, imqatta’

50g ġobon parmesan maħkuk

Madwar 12-il cherry tomato, maqsuma min-nofs

Kuċċarina sweet paprika

Bżar u melħ skont il-gosti tiegħek

Għat-tiżjin:

Ġobon Parmesan maħkuk

Żewġ imgħaref tursin frisk imqatta’

Żewġ imgħaref cashew nuts imqatta’

Żewġ basal aħdar, imfellel

Metodu:

  • Saħħan il-butir f’taġen kbir u fond.
  • Żid iz-zalzett u aqli għal 5 minuti fuq nar medju.
  • Żid il-basla u kompli aqli għal 10 minuti sakemm il-basla tkun ratba iżda mhux ikkulurita.
  • Żid il-faqqiegħ u kompli sajjar, waqt li tħawwad, għal 5 minuti.
  • Żid it-tadam, l-isweet paprika, il-bżar u l-melħ.
  • Ħawwad għal żewġ minuti u mbagħad żid ir-ross u sajjar fuq nar medju għal 3 minuti.
  • Ferra’ l-inbid u ħallih żewġ minuti fuq in-nar.
  • Ferra’ kwart tal-istokk tat-tiġieġ u kompli sajjar, ħawwad ta’ spiss ħafna.
  • Kif tara li l-likwidu ġie assorbit, erġa’ żid nofs l-istokk sħun li baqagħlek. Normalment se żżid l-istokk tlett darbiet sakemm ir-ross ikun sar, u jista’ jkun li ma jkollokx bżonn l-istokk kollu.
  • Bejn wieħed u ieħor ir-ross se jdum xi 20 minuta biex isir.
  • Dejjem ħawwad spiss u l-konsistenza trid tkun li meta r-ross ikun sar, ikollok taħlita niexfa u kremuża.
  • Kif tara li sar, żid il-biċċiet tat-tiġieg u l-ġobon parmesan. Ħawwad malajr għal żewġ minuti.
  • Neħħi t-taġen minn fuq in-nar, għattih, u ħallih joqgħod għal 5 minuti.
  • Sadanittant, ħallat it-tursin, il-basal l-aħdar u l-cashew nuts flimkien fi skutella żghira.
  • Eqleb ir-risotto fi platti u żejjen il-wiċċ bit-taħlita tat-tursin.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net

Riċetta: Spagetti fil-Forn

Riċetta: Spagetti fil-Forn

Għandek bżonn (għal dixx kbir):

Kilo spagetti

Kuċċarina żejt

400g kapuljat taċ-ċanga

400g corned beef, imqatta’ fi cubes żgħar ħafna

400g kunserva (bott kbir)

400g Sugu tat-tadam (bott kbir)

1200ml ilma

Basla kbira mqatta’ rqiqa

Bżar u melħ skont il-gosti tiegħek

200g ġobon maħkuk (jien nuża ġobon Kefalotieri)

200g ġobon cheddar maħkuk

Mgħarfa butir unsalted

500ml Beschamel

Kikkra ħalib

Metodu:

  • Saħħan iż-żejt f’kazzola kbira u qalli l-basal sakemm jirtab.
  • Żid il-kapuljat u qalli sakemm jieħu kulur kannella. Ħawwad spiss biex ma jibqalekx biċċiet kbar.
  • Żid il-corned beef, ħawwad u ħallih isir għal żewġ minuti.
  • Issa żid il-kunserva, is-sugu, il-melħ, il-bżar u l-ilma.
  • Ħawwad sewwa u ħallih fuq nar għoli sakemm tara li se jibda jagħli.
  • Baxxi n-nar u ħalli z-zalza t-tektek għal madwar 30 jew 40 minuta. Kultant tiha taħwida.
  • Sadanittant itfa’ borma bl-ilma u ftit melħ fuq in-nar biex tgħalli l-ispagetti.
  • Ħallat il-beschamel u l-ħalib ġo buqar u warrab fil-friġġ.
  • Saħħan il-forn għal 180 degrees.
  • Kif jagħli l-misħun itfa’ l-ispagetti u ħallih isir għal 10 minuti. Tħallihx jirtab wisq.
  • Saffi l-għaġin u erġa’ itfgħu mal-ewwel fil-borma. Żidlu l-butir u l-ġobon maħkuk (mhux iċ-cheddar).
  • Ħawwad malajr u ferra z-zalza fuq l-ispagetti ġewwa l-borma.
  • Ħallat kollox sew u itfa t-taħlita kollha ġo dixx tal-forn.
  • Ferra t-taħlita kiesħa tal-beschamel fil-wiċċ u ferrex iċ-cheddar ukoll fil-wiċċ.
  • Aħmi f’forn sħun għal 30 minuta.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net

Riċetta: Spaghetti alla Carbonara

Riċetta: Spaghetti alla Carbonara

Kważi l-platti kollha tal-għaġin Taljani jeħtieġu vera ftit ingredjenti … u l-Carbonara mhix eċċezzjoni! Tjubija fis-sempliċità!

Għandek bżonn – (għal 4 porzjonijiet):

400g spagetti
200g guanciale, maqtugħ f’biċċiet żgħar irqaq
4 bajdiet
100g ġobon pecorino romano maħkuk
Bżar skont il-gosti tiegħek

Metodu:

  • Imla borma kbira bl-ilma, żid ftit melħ, u poġġiha fuq in-nar waqt li tipprepara l-ingredjenti l-oħra.
  • Imbagħad saħħan taġen fond nonstick u aqli l-guanciale fix-xaħam tiegħu stess sakemm isir iqarmeċ.
  • Ħallih fit-taġen u warrbu għal issa.
  • Ġo buqar ħawwad il-bajd, il-ġobon, u ftit bżar sakemm ikollok zalza qisha krema. Warrabha.
  • Agħlli l-ispagetti għal madwar 12-il minuta sakemm isir ‘al dente’.
  • Ħames minuti qabel ma l-ispagetti jkun sar, poġġi t-taġen bil-pancetta fuq nar medju u żid miegħu żewġ imgħaref mill-ilma tal-għaġin. Ħawwad u ħalliha ttektek.
  • Warrab tazza mill-ilma tal-għaġin fil-każ li jkollok bżonn tuża ftit aktar tard.
  • Saffi l-għaġin u immedjatament żidu ġot-taġen mal-pancetta u x-xaħam tagħha.
  • Ħawwadhom sew għal madwar 2 minuti fuq nar qawwi.

Issa għall-parti delikata – trid tgħaġġel!

  • Meta l-guanciale u l-ispagetti jitħalltu sew u jkunu sħan sew, itfi n-nar imma ħalli t-taġen fuq l-istess burner, biex jibqgħu fuq is-sħana.
  • Jekk tħalli n-nar mixgħul, il-bajd se jissajjar wisq u jiġi qisu scrambled eggs.
  • Kif titfi n-nar, mejjel it-taġen biex l-ispagetti jaqa’ għal naħa waħda, u ferra s-sauce tal-bajd u l-pecorino fuq l-ispazju vojt.
  • Issa ħawwad malajr kemm tista’ sabiex il-bajd ikun totalment inkorporat fl-ispagetti mingħajr ċapep.
  • Il-konsistenza hija importanti ħafna. Jekk tara li huwa niexef wisq meta tkun qed tħallat, żid ftit imgħaref mill-ilma li warrabt tal-għaġin.
  • Jew, jekk hemm wisq likwidu, żid mgħarfa ġobon.
  • Servi immedjatament.
  • Żejjen bi ftit biċċiet ta’ guanciale mqarmċin, pecorino maħkuk u bżar.

L-ikla t-tajba!

Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net

Enable Notifications    OK No thanks