Ramiro Mallia

“Kieku Ramiro għadu magħna, illum qed jiċċelebra għeluq sninu”

Kieku Ramiro għadu magħna, illum qed jiċċelebra għeluq sninu.

Permezz ta’ kitba fuq il-paġna ta’ Facebook ta’ Puttinu Cares tfakkar dan il-jum filwaqt tħabbret is-somma li nġabret matul il-mixja annwali li organizzat il-fondazzjoni li kien waqqaf Ramiro nnifsu, 7 snin ilu, bl-isem ta’ Ramiro & Friends.

Permezz ta’ din il-fondazzjoni, Ramiro kien jorganizza bosta attivitajiet b’risq diversi għaqdiet oħrajn, fosthom Puttinu Cares, li kien tant għal qalbu.

Nemmnu li xorta qed tiċċelebra mill-ġenna tara l-familja tiegħek tkompli x-xewqa tiegħek li tgħin lil Puttinu. Inġabret is-somma sabiħa ta’ €805 minn mixja li organizzat il-fondazzjoni Ramiro & Friends sabiex tfakkar il-memorja tiegħu. Kompli pproteġi l-familja u l-ħbieb tiegħek għażiż Ramiro u minn qalbna nsellmulek. Nimmisjawk.

Waħda mill-attivitajiet hi dik il-mixja annwali ta’ kull sena fejn proprju kienet l-ewwel attività li fetħet l-isem Ramiro & Friends, fejn inġabru l-fondi b’risq Puttinu Cares.

Minkejja li Ramiro m’għadux magħna, aħna l-ħbieb ta’ Ramiro komplejna b’dak li ħalla warajh huwa stess u b’hekk din il-mixja, biex infakkru l-memorja tiegħu, għamilna l-istess rotta li kien ippjana l-ewwel mixja, minn Buġibba sa tas-Sliema, però d-differenza li din id-darba bdejna minn fejn il-monument ta’ Dr. Victor Calvagna u nġabret is-somma ta’ ‘l fuq minn €800.

F’isem it-tim ta’ Skoperta, insellmu l-memorja ta’ Ramiro.

skoperta.net

Filmat: Stenna Li Mhux Tistenna – Kanzunetta ddedikata lil Ramiro

by skoperta.net | 09/May/21 | Arti, Mużika, Varjetà

Stenna Li Mhux Tistenna, huwa t-titlu tal-kanzunetta oriġinali li l-grupp Kapitlu Tlettax f’kollaborazzjoni ma’ Janice Mangion, nedew proprju ftit tal-ħin ilu fuq il-mezzi tal-midja soċjali tagħhom. Din il-kanzunetta li għandha lirika ta’ Joseph Calleja u mużika ta’ Dwardu Ravelle, hija dedikazzjoni liż-żagħżugħ Ramiro Mallia li tilef ħajtu f’inċident mill-aktar traġiku, Marzu li għadda.

“Kien hemm il-ħsieb li naħdem fuq kanzunetta li titkellem dwar il-ġid li jagħmlu nies bħal Ramiro, iżda imbagħad kellmuni ħutu li xtaqu li nagħmlu xi ħaġa aktar speċifika b’dedikazzjoni għalih u kif tista’ tgħid le, meta għandek iċ-ċans tikteb dwar anġlu, persuna li tħares lejn l-interessi ta’ ħaddieħor qabel tagħha”, jgħid Joseph, l-awtur u l-protagonist ewlieni tal-grupp Kapitlu Tlettax dwar il-kanzunetta.

Apparti l-grupp Kapitlu Tlettax li huwa kompost minn Joseph Calleja, Dwardu Ravelle, Maria Cini u Digby, ġiet magħżula l-kantanta Janice Mangion biex tikkollabbora fuq dan il-proġett u dwar din l-għażla, Joseph jgħid li kien “ilni nsegwiha ftit mhux ħażin, għaliex apparti li hija artista brava u kapaċi għall-aħħar, kellna bżonn tip ta’ vuċi partikolari, waħda li tispikka għal ma’ din il-lirika.”

Min-naħa tagħha, Janice Mangion, il-kantawtriċi magħrufa għad-diversi kanzunetti oriġinali bil-Malti, riċentament ukoll finalista f’Mużika Mużika qalet li mill-ewwel aċċettat biex tkun parti minn dan il-proġett, “nemmen li Kapitlu Tlettax għandhom ħafna x’joffru lill-industrija tal-mużika lokali, u apparti minn hekk nemmen li l-messaġġ wara Stenna Li Mhux Tistenna huwa wieħed inkreddibli. Ramiro kien persuna unika ta’ vera, u l-memorja tiegħu tajjeb li nżommuha ħajja.”

skoperta.net