Select Page
Riċetta: Moussaka

Riċetta: Moussaka

Għandek bżonn: (għal 6 porzjonijiet)

Kilo brunġiel
Żejt taż-żebbuġa

Għaz-zalza ħamra:
600g kapuljat taċ-ċanga
Żewġ basliet, imqattgħin irqaq
Erba sinniet tewm imqatta’ rqaq
Tliet imgħaref pejst tat-tadam
Nofs tazza nbid aħmar
Niskata zokkor, melħ u bżar
Mgħarfa rignu
Nofs kuċċarina kannella
300ml stokk taċ-ċanga
Bott tadam imqatta
Żewġ weraq tar-rand

Għall-bechamel:
Erba’ mgħaref butir
Ħames imgħaref dqiq plain
500ml ħalib
100g ġobon Parmesan maħkuk
1/4 ta’ kuċċarina noċemuskata
Żewġ bajdiet imħabbtin

Frak tal-ħobż u żejt taż-żebbuġa għall-wiċċ

Metodu:

Neħħi z-zokk mill-brunġiel. Imbagħad qattagħhom slices mit-tul, ħxuna tas-slices madwar 0.5cm.

Poġġi s-slices fuq karta tal-forn, għati l-wiċċ tal-brunġiel dilka ħafifa biż-żejt taż-żebbuġa u aħmihom fil-forn għal madwar 15-il minuta, jew sakemm jibdew jirtabu ftit.
Oħroġ il-brunġiel mill-forn u ħallih jibred.

Iz-zalza ħamra:
Ġo kazzola non-stick aqli l-basal u t-tewm sakemm jibdew jirtabu.
Imbagħad żid l-inbid u ħalliha ttektek għal ħames minuti.

Żid il-pejst tat-tadam, iz-zokkor, il-melħ, il-bżar, ir-rignu, u l-kannella.
Ħawwad sewwa u mbagħad żid il-kapuljat.
Ħawwad sakemm il-kapuljat jibda jieħu kulur kannella.

Imbagħad żid l-istokk taċ-ċanga, it-tadam imqatta’ bil-likwidu tagħhom, u l-weraq tar-rand.
Ħawwad sew sakemm tara li zzalza ħa tibda tagħli.
Imbagħad baxxi n-nar u ħalliha ttektek għal 20 minuta sakemm tara li z-zalza qed issir magħquda.
Ma jridx jibqagħlek ħafna likwidu għal din ir-ricetta.

Sakemm iz-zalza l-ħamra ttektek, tista’ tlesti l-bechamel:

Dewweb il-butir f’kazzola non-stick żid id-dqiq u ħawwad għal madwar minuta.

Imbagħad żid il-ħalib bil-mod u ħawwad għal madwar ħames minuti sakemm ikollok taħlita qisha krema.

Neħħi l-kazzola minn fuq in-nar, żid il-ġobon u n-noċemuskata, ħawwad sew, u ħalliha tibred għal 5 minuti.

Imbagħad żid il-bajd u ħawwadhom sew mal-kumplament tal-bechamel.

Issa tista’ tibda tpoġġi s-saffi tal-Moussaka:

Ferra ftit iz-zalza ħamra fil-qiegħ ta’ dixx tal-forn.

Imbagħad irranġa saff brunġiel sabiex il-qiegħ tad-dixx ikun kollu mgħotti.

Ferra l-bqija taz-zalza ħamra kollha fuq il-brunġiel, u mbagħad irranġa saff ieħor ta’ brunġiel fuq iz-zalza.

Ferra l-bechamel fil-wiċċ u ara li l-brunġiel kollu jkun mgħotti.

Ferrex il breadcrumbs fil-wiċċ, u żid raxxa ħafifa żejt taż-żebbuġa.

Sajjar fil-forn għal 40 minuta jew sakemm tara li l-wiċċ ikun qed jiħmar.

L-ikla t-tajba 🙂

Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net

Riċetta: Stuffat tal-Ħaruf u l-Fażola

Riċetta: Stuffat tal-Ħaruf u l-Fażola

Għandek bżonn: Għal 4 porzjonijiet

4 shanks (xikel) tal-ħaruf

2 basliet imdaqsa mqatta’ rqaq

4 sinniet tewm imqatta’ rqaq

2 bżar aħmar milli jaħraq, imqatta’ rqaq ħafna

Landa kunserva kbira

Nofs kuċċarina zokkor

Daqs kikkra kosbor frisk imqatta’, uża z-zkuk ukoll

Kilo fażola bajda mill-kbira

(Nota: Jien nuża tlett bottijijet tal-butter beans mill-kbar u nlaħlaħhom qabel nitfagħhom fil-borma. Tista’ wkoll tuża Canellini beans, jew fażola bajda min-niexfa li tkun għallejt min qabel.)

800ml ilma

Mgħarfa żejt taż-żebbuġa

Mgħarfa kemmun

Mgħarfa kosbor niexef

Mgħarfa ħrarat (Baharat)

Mgħarfa chilli powder

Mgħarfa turmeric

Kuċċarina melħ

Kuċċarina bżar

Metodu:

Ħawwad l-ilma u l-kunserva f’borma u poġġiha fuq in-nar ħalli tisħon.

Kif tiftaħ tagħli, żid iz-zokkor, ħawwad, u żid ix-shanks tal-ħaruf.

Agħttih u ħallih itektek fuq nar baxx ħafna sakemm tlesti l-pass li ġej.

Saħħan iż-żejt f’taġen. Żid il-basal u t-tewm u l-ħwawar in-nixfin kollha. Ibqa’ ħawwad sakemm tara li l-basal irtab.

Żid il-kosbor il-frisk u ħawwad għal xi żewġ minuti.

Żid din it-taħlita tal-basal u ħwawar mal-ħaruf fil-borma. Ħawwad sew u ħallih itektek fuq nar baxx għal 45 minuta.

Żid il-fażola li tkun saffejt u laħlaħt, ħawwad u ħalli kollox itektek għal kwarta oħra.

L-ikla t-tajba 🙂

Jekk għandek xi mistoqsijiet dwar din ir-riċetta u oħrajn, ibgħatilna fuq info@skoperta.net

Riċetta: Isdra tat-Tiġieġ Caprese

Riċetta: Isdra tat-Tiġieġ Caprese

Għandek bżonn: (għal 2 jew 4 porzjonijiet) 

Żewġ isdra tat-tiġieġ, mingħajr għadam u ġilda, u aqsam kull sider f’żewġ biċċiet

Mgħarfa żejt taż-żebbuġa 

Mgħarfa balsamic vinegar 

Mgħarfa dqiq 

Kuċċarina melħ 

Kuċċarina bżar 

2 mgħaref ħabaq frisk, imqatta’ 

2 sinniet tewm imqatta’ rqiq ħafna 

4 slices mozzarella 

250g cherry tomatoes 

Metodu: 

Ħallat id-dqiq, bżar u melħ fi platt. 

Agħddi l-biċċiet tat-tiġieġ mit-taħlita tad-dqiq sakemm jinksew sew. 

Saħħan iż-żejt ġo taġen u aqli l-biċċiet tat-tiġieġ għal 6 minuti minn kull naħa. Kif tara li saru, neħħihom mit-taġen u warrabhom f’post sħun.

Fl-istess taġen żid il-ħall, bżar, melħ, tewm, u t-tadam. Ħawwadhom sew u ħallihom itektku għal xi 10 minuti.

Irranġa l-isdra tat-tiġieġ fit-taġen fuq iz-zalza, u ħallihom jerġgħu jisħnu sew għal xi żewġ minuti.

Poġġi slice mozzarella fuq kull biċċa tiġieġa u kif tara li l-ġobon qed jibda jdub, uża mgħarfa biex tibda ttella’ z-zalza tat-tadam fuq it-tiġieġ sakemm jixxarbu sew.

Agħtti t-taġen u sajjar fuq nar baxx għal 5 minuti.

Ikxef it-taġen u roxx il-ħabaq fuq it-tiġieġ. 

L-ikla t-tajba 🙂 

Enable Notifications OK No thanks