Fuq il-midja soċjali qed jiċċirkola filmat li juri raġel li tela’ fuq is-saqaf ta’ karozza tal-linja, waqt li x-xufier kien qed isuq fi triq prinċipali.
Bosta kkummentaw dwar il-periklu li dan seta’ kkawża mhux biss lilu nnifsu iżda wkoll li x-xufier u vetturi oħra li kienu għaddejjin mill-istess triq.
L-Aġenzija Kulturali għall-Belt Valletta (VCA) għandha l-pjaċir tippreżenta wirja b’xogħolijiet riċenti tal-artist figurattiv magħruf Patrick Dalli, bħala parti mill-Programm Kulturali tagħha. Il-wirja bit-titlu The Journey ser titellà fil-Gran Salon tal-Mużew tal-Arkeoloġija, fi Triq ir-Repubblika il-Belt Valletta, mill-4 ta’ Diċembru 2021 sad-9 ta’ Jannar 2022. Din tinkludi xejn inqas minn 34 pittura fosthom bozzetto u hija bbażata fuq l-esplorazzjoni tal-figura umana.
Spiss deskritt bħala ‘Imgħallem tal-Arti Figurattiva’, l-għan ta’ Dalli mhux li jevoka is-senswalità u s-sesswalità bil-pitturi tiegħu, izda li jikkonċentra fuq is-sbuħija u s-sensittività tal-figura umana nuda. L-istil Barokk tal-Gran Salon, fejn ser tkun qed titella’ l-wirja, jinkludi affreski rikki, ċikli arabeski spettakolari, gallerija tal-mużiċisti u saqaf bi travi tal-injam li se jservi bħala sfond għal din il-wirja.
Patrick Dalli jikkonferma li n-nudiżmu għadu detonatur rivoluzzjonarju anke jekk minn dejjem kien parti min-natura artistika.
Imwieled Malta fl-1955, Dalli kien interessat primarjament l-aktar fil-pajsaġġ, still life, u s-sengħa tal-pittura. Fl-1995, beda t-taħriġ formali ma’ Anton Calleja (t.1955-) fejn eżerċita l-aktar l-istudju tal-figura umana. Huwa f’dawn is-snin li Dalli kkonċentra l-prattika tiegħu fuq in-nud. Fis-snin ta’ wara, flimkien ma’ artisti oħra, Dalli pprattika b’mod intens f’sessjonijiet live u pparteċipa f’wirjiet kollettivi f’Malta u barra, fejn esebixxa nudi, pajsaġġi, u pitturi still life.
Ix-xogħlijiet tiegħu ġew esebiti fil-Kavallier ta’ San Ġakbu (2010), fil-Mużew tal-Arti (2010) f’Palazzo Collicola, Spoleto, l-Italja (2015) u fil-Kamra ta’ Fuq (2021).
Dalli ħareġ diversi publikazzjonijiet fosthom Demografie, Gutenburg Press 2015; the human figure, Gutenburg Press 2010; Nudes, Midesea Books 2008 u 2004 u The Human Figure 2002.
Il-katalgu tal-wirja, b’introduzzjoni mil-pinna tal-Profs Vittorio Sgarbi, u essay kritika ta Dr. Charlene Vella, ġie ppubblikat minn La Nave di Teseo, bi drittijet tal-Copyright tal-Agenzija Kulturali għall-Belt Valletta. Il-katalgu huwa taħt il-kurazija ta’ Elisabetta Sgarbi, pubblikatriċi ta’ La Nave di Teseo. Il-wirja hija kkordinata minn Valerio Ballotta (GBK Malta Ltd), flimkien ma’ Stefano Losani u Elisabetta Sgarbi.
Ibbażata fuq il-legat tal-Fondazzjoni Valletta 2018, l-Aġenzija Kulturali għall-Belt Valletta tippromwovi l-kultura u l-wirt artistiku tal-Belt Kapitali permezz tal-ħolqien ta’ programm ta’ avvenimenti li huma aċċessibbli għal kulħadd.
Nitkellmu ma’ Rita Camilleri
Rita, bħalissa qed tinterpreta l-karattru ta’ Anġela fuq Sorelle. Liema kienet l-aktar xena li ħadt gost tagħmel? U x’sibt l-aktar ta’ sfida b’dan il-karattru?
L-aktar xena li ħadt pjaċir nagħmel kienet meta mort infittex lil Steve u fl-aħħar arrestajnieh. Bħala sfida huwa l-fatt li Anġela ma tibża’ minn xejn mhux bħali!!
Hemm similaritajiet bejn il-karattru ta’ Anġela u tiegħek personali? F’liema sitwazzjonijiet taħseb li kont taġixxi differenti minnha?
Naħseb l-unika ħaġa simili li għandi ma’ Anġela hija l-imħabba li għandha hi lejn bintha u jien lejn ibni. Li kont naġixxi differenti naħseb dwar il-fatt li hi ma tridx li tmur tfittex lil missierha għat-trapjant.
Kif intlaqa’ min-nies dan il-karattru?
Milli jgħiduli intgħoġob ħafna u jammirawha.
Meqjusa bħala waħda mill-atturi veterani ta’ pajjiżna. Kemm ilek attriċi?
L-ewwel darba li tlajt fuq il-palk imma m’għidt xejn!! Kelli 4 snin, id-DePorres.
Kif nibtet l-imħabba tiegħek għar-reċtar?
Naħseb minn dakinhar, kull meta nitla’ fuq il-palk inkun f’dinja oħra.
Kif bdiet il-karriera tiegħek ta’ attriċi?
Konna nkunu d-DePorres għax iż-zijiet li trabbejt magħhom kienu jgħinu hemm u kien hemm kumpanija li ttella’ l-plays li kellha bżonn tifla għall-aħħar xena u z-ziju qallu bija!
Liema kienet l-ewwel produzzjoni teatrali li ħadt sehem fiha?
Ta’ 6 snin Fr Bjorn kien kiteb buzette għall-konkors li kellu jsir għat-tfal u dan kien jismu “Taqtigħ il-Qalb” u konna ġejna t-tielet.
Teatru jew televiżjoni? U għaliex?
Teatru, is-sensazzjoni li tħoss meta titla’ fuq il-palk, l-eċitament u l-feedback tan-nies, ma ssibhomx fil-filming.
Mill-karattri kollha li ħdimt s’issa, liema minnhom taħseb li ħalla l-aktar impatt fuq in-nies?
Għalija l-aktar karattru li ħalla impatt kien il-karattru ta’ Filumena. Permezz ta’ dan il-karattru tara l-imħabba tal-omm xi twassalha tagħmel.
U liem minnhom ħalla l-aktar impatt fuqek personali?
Ikolli nammetti li l-karattru ta’ Filumena huwa l-aktar karattru li ħalla impatt fuqi personali wkoll. L-omm ma tieqaf qatt taħseb fuq uliedha, anki meta jikbru.
X’tiftakar dwar preparamenti ta’ produzzjonijiet li ħadt sehem fihom fil-bidu tal-karriera tiegħek? U x’differenzi tara minn dak iż-żmien għal-lum?
Ilum ħafna aħjar għax għandek ir-riklamar jgħin ħafna u l-production houses qed jinvestu f’aktar equipment pereżempju f’produzzjoni minnhom ħdimna b’erba’ kameras allura ħadna take waħda mhux xi 6 jew 7 takes. Issa ħafna aktar faċli, l-ewwel darba li ħadt sehem fuq it-TV kelli 10 snin, dak iż-żmien jekk tagħmel żball terġa’ tibda x-xena mill-ġdid!! Illum ovvja bit-teknoloġija ġdida nagħmel dik il-biċċa biss. Illum ħafna aħjar!!
Semmilna wħud mill-memorji l-aktar li tgħożż ma’ atturi veterani li m’għadhomx magħna..
Naħseb l-aktar għal qalbi huma l-memorji ta’ Lino Grech. Niftakar konna nkunu qed nagħmlu play l-institute u tarah waqt il-provi jagħmel il-karattri kollha, litteralment jinbidel quddiem għajnejk.
Irrakkuntalna praspura li għamilt jew ġratlek relatata mar-reċtar..
Nifftakar konna qed nagħmlu kummiedja l-Manoel meta wieħed mill atturi kien ħa joħroġ fuq il-palk marritlu l-buttuna tax-shorts, irid joħroġ u ma jistax għax ħa jaqalu ix-shorts u dak il-ħin qbadt hairpin u rnexxili nżommlu x-shorts milli jaqalu u mbuttajtu ‘l barra għal fuq il-palk. Dawk is-sekondi rajnihom sigħat.
‘Il bogħod mir-reċtar, min hi Rita Camilleri? Kif tiddeskrivi lilek innifsek?
Issa jien irtirata u nieħu pjaċir insib il-ħin għall-passatempi li qabel ma tantx kelli ċans għalihom. Jien omm u minn sena u tlett xhur ilu sirt nanna ta’ baby Alex. Nipprova nkun pożittiva kemm nista’ avolja l-ħajja mhux dejjem tħallini.
Qattajt parti kbira minn ħajtek mas-Salesjani. X’impatt ħalla fuq ħajtek dan?
Impatt qawwi, għalija s-Salesjani huma t-tieni familja tiegħi, qattajt parti kbira minn ħajti hemm u bil-ħila tagħhom wasalt fejn wasalt fit-teatru.
X’jagħtik l-aktar sodisfazzjon f’ħajtek?
Meta nkun mal-familja, ma’ huti u l-familji tagħhom, hemm inkun fil-ġenna tal-art.
Persuni li jispirawk kemm fil-karriera tiegħek ta’ attriċi kif ukoll personali…
Bħala attur jew direttur, kif semmejt fuq Lino Grech, u kelli tutor id-drama school li llum sfortunatament m’għadhiex magħna Ethel Farrugia. U personalment iz-ziju li kien rabbieni, dejjem bil-kelma t-tajba, u dejjem għallimni nipprova nara t-tajjeb f’kulħadd.
L-isbaħ u l-agħar mumenti ta’ ħajtek s’issa..
Bla dubju l-isbaħ mument kien meta sirt omm u wara meta sirt nanna. L-agħar mument f’ħajti li ħalla impatt ikrah kien meta sena u nofs ilu konna miseries ma’ oħti u waqgħet u mietet quddiemi. Xena li tmur qatt minn quddiem għajnejja.
X’inhi l-akbar lezzjoni li tgħallimt mill-ħajja s’issa?
Li għandek tgħix il-mument u tgħid lil dak li jkun li tħobb għax meta jiġri kif ġara lilna mbagħad wara jkun tard wisq.
Liema kwistjonijiet int l-aktar sensittiva dwarhom? U għaliex?
Fejn jidħol l-abort, suġġett naqra delikat imma jweġġagħni ħafna u meta naf li hawn tant koppji li jixtiequ t-tfal u ma jistgħux, u qtil ta’ kreaturi innoċenti ma niflaħiex. It-tfal barka jġibu.
Hemm xi ħaġa li dejjem xtaqt tagħmel u għad ma kellekx l-opportunità li tagħmilha?
Nixtieq nitgħallem aktar crafts u meta kont iżgħar dejjem xtaqt nidħol pulizija imma d-daddy ma ħallinix għax hu kien pulizija u ma ridnix!
Kif jirnexxilek tagħraf il-pożittività tal-ħajja?
Meta nara l-kuraġġ tan-nies li huma inqas ixxurtjati minni ngħid jien għandi saħħti, il-familja b’saħħitha u għandi saqaf fuq rasi, hemm tiġini s-saħħa li nkun pożittiva.
X’messaġġ tixtieq tgħaddi?
Nixtieq ngħid grazzi lil kull min jibgħatli l-messaġġi, u kliem li jinkoraġġuni u grazzi kbira lil dawk kollha li kienu hemm għalija fl-agħar mumenti ta’ ħajti.
Direttriċi u Editriċi
