by skoperta.net | 03/Jan/22 | Ġrajjiet, Kurrenti
Il-moviment kontroversjali River of Love, li huwa mmexxi minn Gordon Manché iddiżassoċja ruħu mis-suspettat tal-qtil li seħħ Tas-Sliema.
Dan wara li fuq il-midja soċjali beda jiċċirkola filmat miġbud lejlet l-Ewwel tas-Sena tas-suspettat ma’ membru tal-moviment River of Love, li ddeskrivieh bħala “ħuh”.
Il-vittma ta’ 29 sena ġiet imsawta u maqtula brutalment fis-sigħat bikrin tal-Ħadd filgħodu.
Mill-awtopsja li saret fuq il-kadavru tal-mara rriżulta li ġiet stuprata u kellha wkoll marki li ġiet fgata mill-allegat qattiel tagħha.
Hija kienet qed tgħix f’Malta bħala studenta.
Is-suspettat ta’ 20 sena, ġie arrestat barra l-Knisja tal-Madonna tal-Karmnu fil-Balluta, wara li kien daħal fil-knisja, tela’ fuq l-artal u qajjem kommossjoni.
Manché qal li s-suspettat ma kienx parti minn River of Love u qatt ma kien, u li m’għandhom x’jaqsmu miegħu bl-ebda mod.
Aktar kmieni llum ġie rrappurtat li l-Pulizija kellha tissospendi l-interrogazzjonijiet minħabba li s-suspettat ittieħed l-isptar Mater Dei biex jiġi invistat mit-tobba fejn ġie riferut għall-isptar Monte Karmeli.
by skoperta.net | 23/Nov/21 | Ġrajjiet, Kurrenti
Mavys Alvarez, Kubana ta’ 37 sena, li kellha relazzjoni mal-istilla tal-futbol Diego Maradona madwar 20 sena, qed tallega li l-eks plejer tal-Arġentina kien stupraha meta kellha 16-il sena u tgħid li serqilha t-tfulija.
Hija xehdet il-ġimgħa l-oħra quddiem il-qorti tal-Ministeru tal-Ġustizzja Arġentin li qed tinvestiga l-allegazzjonijiet tagħha.
Maradona, meqjus bħala wieħed mill-akbar stilel tal-futbol li qatt kien hawn, miet sena ilu fil-25 ta’ Novembru.
L-allegazzjoni tirrigwarda vjaġġ li Alvarez għamlet lejn l-Arġentina ma’ Maradona fl-2001 meta hu kellu madwar 40 sena u hi kellha 16-il sena.
Alvarez qalet li ltaqgħet mal-istilla tal-futbol għall-ewwel darba ftit qabel il-vjaġġ, meta kien Kuba biex jieħu trattament għall-vizzju tad-droga.
F’konferenza tal-aħbarijiet f’Buenos Aires, Alvarez qalet li Maradona kien stupraha fil-klinika ta’ fejn kien qed joqgħod, filwaqt li ommha kienet tinsab fil-kamra ta’ ħdejhom..
Hija qalet li Maradona għattielha ħalqha u abbużaha, u li dak il-mument serqilha t-tfulija tagħha.
Filwaqt li f’diversi drabi hija ddeskriviet ir-relazzjoni tagħhom bħala kunsenswali, iżda qalet ukoll li Maradona tal-inqas f’okkażjoni waħda sforza lilu nnifsu fuqha.
Alvarez qalet li l-familja tagħha ppermettiet biss ir-relazzjoni tagħha ma’ Maradona, minkejja d-differenza kbira fl-età, minħabba l-ħbiberija ta’ Maradona mal-eks President Kuban Fidel Castro.
Filwaqt li stqarret li ma kinitx faċli għaliha li tiżvela dak li ġara lilha f’pajjiż fejn Maradona hu meqjus bħala idolu, hija ssostni li ddeċidiet li tagħmel dan sabiex tgħin lil vittmi oħrajn b’kull mod li tista’.
by skoperta.net | 22/May/21 | Ġrajjiet, Kurrenti
Oprah Winfrey emozzjonat ruħha waqt li tkellmet aktar fil-miftuħ dwar l-esperjenza orribbli ta’ meta kienet tiġi stuprata ripetutament mill-kuġin tagħha stess minn meta kellha 9 snin.
Waqt li kienet qed titkellem fis-serje l-ġdida tagħha dwar is-saħħa mentali, The Me You Can’t See, li ħolqot flimkien mal-Prinċep Harry, il-preżentatriċi ta’ 67 sena, fakkret it-trawma tat-tfulija tagħha kkawżata minn abbuż sesswali.
Matul l-ewwel episodju, Oprah spjegat li lanqas biss kienet taf x’inhuma sess u stupru meta l-kuġin tagħha beda jistupraha.
Hija qalet li minn meta kellha 9 snin sa 12-il sena kienet tiġi stuprata ripetutament mill-kuġin tagħha.
“Ma kontx naf x’inhu stupru, ma kelli l-ebda idea ta’ x’inhu sess u minn fejn jiġu t-trabi, lanqas biss kont naf x’kien qed jiġri. U dak żammejtu sigriet.
“U kienet xi ħaġa li aċċettajt. Li tifla mhix sigura f’dinja mimlija rġiel.”
Din ma kinitx l-ewwel darba li Oprah iddiskutiet id-dettalji tal-istorja trawmatika tagħha ta’ abbuż sesswali.
Waqt li tkellmet fis-serje l-ġdida tagħha, Oprah saħqet għaliex huwa daqshekk importanti li taqsam dak li ġara lilha.
“Il-fatt li tgħid l-istorja, li tkun kapaċi tgħid “Dan hu dak li ġara lili” huwa kruċjali,” qalet.
Oprah kienet ukoll soġġetta għal forom oħra ta’ abbuż waqt it-tfulija tagħha inklużi dwar min-nanna tagħha u negliġenza minn ommha.
Hija emozzjonat ruħha hekk kif fakkret kif kienet imġiegħla titlaq mill-unika dar li qatt kienet taf u tmur tgħix m’ommha, li għaliha kienet mara barranija.
“L-unika ħaġa li għadha tbikkini sal-lum, minkejja li għaddew ħafna snin, hija l-mument meta mort ngħix f’Milkwaukee minn Attala County, Mississippi. Qatt ma kont għext ‘il bogħod minn nannti qabel u f’daqqa waħda kont qiegħda f’karozza li kienet se teħodni ‘l bogħod u qaluli li m’iniex se nerġa’ mara lin-nanna u se nkun qed ngħixu ma’ ommi” qalet Oprah.
“Omm li lanqas biss kont naf minħabba li ommi kienet parti minn dik il-migrazzjoni kbira li kienet telgħet fit-tramuntana u ħallew lil uliedhom man-nanniet.”
