Ilbieraħ daħlet fis-seħħ bidla dwar uffiċjali tal-pulizija Maltin li għandhom it-tattoos.
Kemm uffiċjali li diġà huma fis-servizz kif ukoll dawk li huma mħajra li japplikaw biex jissieħbu fil-Korp tal-Pulizija, issa jista’ jkollhom tattoos viżibbli f’idejhom u f’saqajhom.
Madankollu, wieħed irid iżomm f’moħħu li dawn it-tattoos ma jistgħux ikunu indiċenti, sessisti, razzisti jew iweġġgħu s-sentimenti tal-pubbliku.
Filwaqt li se jiġu aċċettati tattoos fl-idejn u fis-saqajn, se jibqgħu projbiti tattoos fl-għonq, fil-wiċċ u fuq il-pala tal-id sakemm mhux għal raġunijiet mediċi.
Min japplika biex jissieħeb fil-korp huwa mitlub li jibgħat ritratt tat-tattoo u l-qisien tagħha, li mbagħad jgħaddu minn bord li se jkun qed jitwaqqaf apposta biex jara li t-tattoos ikunu skont ir-regoli.
Qabel din il-bidla, persuni b’tattoos setgħu jissieħbu fil-Korp tal-Pulizija sakemm ikunu mgħottija.
Dan qed isir biex, fost oħrajn, iħeġġeġ iktar żgħażagħ jidħlu fil-Korp.
Il-Ministru għall-Intern u s-Sigurtà Nazzjonali Byron Camilleri qal li din il-bidla tirrifletti bidliet kulturali fis-soċjetà.
Hekk kif pajjiżna jinsab fuq l-għatba biex jospita l-iSpecial Olympics Malta Invitational Games 2022, tnediet il-kanzunetta uffiċjali bl-isem ta’ Going for Gold, mill-President tal-iSpecial Olympics Malta, Dr Lydia Abela.
Il-kanzunetta, b’kitba ta’ Ira Losco u ta’ Howard Keith, u kantata minn Ira Losco nnifisha, titkellem dwar id-determinazzjoni ta’ kull atleta biex mhux biss jasal fil-ħajja personali tiegħu iżda anke fix-xena sportiva. Iktar minn hekk, twassal messaġġ favur l-abbiltajiet ta’ kulħadd.
Ritratt: Omar Camilleri
Waqt konferenza tal-aħbarijiet, Dr Lydia Abela qalet li dawn il-logħob huma ċelebrazzjoni tal-ħiliet ta’ kulħadd. Iktar minn kollox, hija ċelebrazzjoni tal-mod kif l-atleti u l-familji tagħhom jirnexxilhom jegħlbu d-diffikultajiet tagħhom ta’ kuljum u jiffukaw fuq l-abbiltajiet tagħhom.
“Il-mużika hija waħda mill-għodod l-iktar effettivi biex messaġġ jasal b’mod pożittiv u effettiv u m’hemmx dubju li din id-diska tilħaq dan l-għan”, saħqet Dr Abela.
Min-naħa tagħha, il-kantanta Ira Losco għaddiet messaġġ ta’ pożittività lill-atleti u saħqet li huma mhumiex biss il-protagonisti ta’ dan il-vidjow mużikali iżda wkoll il-protagonisti waqt l-iSpecial Olympics Malta Invitational Games 2022 li se jsiru f’pajjiżna bejn l-14 u t-18 ta’ Mejju li ġej.
Fil-fatt, f’dawn id-dati se jkun hawn mal-1,000 atleta minn 23 pajjiż differenti li se jikkompetu f’sitt dixxiplini sportivi. Dr Abela ħeġġet lill-poplu Malti biex ikun wara dawn l-atleti u joffri l-appoġġ tiegħu, speċjalment lill-kontinġent Malti. Qalet li l-isport, li huwa mod effettiv li jassigura ħajja sana u b’saħħitha, se jkun qed jgħaqqad lill-atleti kollha f’pajjiżna u joffrilhom esperjenza tad-deheb kif jixirqilhom.
Fi tmiem il-konferenza, il-President tal-iSpecial Olympics Malta, Dr Lydia Abela, ippreżentat midalja tad-deheb lil Ira Losco bħala sinjal ta’ apprezzament lejha u għall-involviment tagħha f’dawn il-logħob.
Ir-Russja żvelat li l-għan tal-invażjoni tagħha tal-Ukrajna huwa li tieħu “kontroll sħiħ” fuq in-Nofsinhar tal-Ukrajna kif ukoll ir-reġjun tal-Lvant ta’ Donbas.
It-tħabbira mill-ogħla uffiċjal militari timmarka l-ewwel darba li r-Russja ammettiet li kienet qed tiġġieled biex tistabbilixxi kuritur tal-art mit-territorju Ukren li jgħaqqad lir-Russja mal-Krimea, il-peniżola li annesset fl-2014.
L-aġent kmandant tad-Distrett Militari Ċentrali tar-Russja qal li l-kontroll fuq in-nofsinhar tal-Ukrajna jagħti lill-forzi Russi aċċess għat-Transnistria, stat separatista fil-Moldova, fejn kontinġent tal-forzi Russi ilu stazzjonat mill-bidu tad-disgħinijiet.
Il-forzi Russi fil-preżent għandhom kontroll parzjali biss tan-Nofsinhar tal-Ukrajna, bil-gvern tal-Ukrajna għadu jikkontrolla l-ibliet ewlenin ta’ Mykolaiv u Odesa u xi forzi Ukreni maqbuda fil-port imdawwar ta’ Mariupol.
Ir-Russja fl-aħħar ġimgħat irtirat il-forzi tagħha fit-Tramuntana tal-Ukrajna wara li falliet milli tieħu l-kontroll ta’ Kyiv, b’uffiċjali militari Russi jsostnu li l-miri strateġiċi tagħhom kienu nbidlu biex jieħdu r-reġjun kollu ta’ Donbas tal-Lvant.
Mistoqsi mill-ġurnalisti biex jelabora dwar liema territorji kienu qed ifissru bin-Nofsinhar tal-Ukrajna, il-kelliem tal-Kremlin Dmitry Peskov irrifjuta milli jikkummenta u rrefera l-mistoqsijiet lill-Ministeru tad-Difiża.
Fl-aħħar jiem, l-awtoritajiet Ukreni wissew li l-forzi Russi li jokkupaw il-belt ta’ Kherson fin-Nofsinhar tal-Ukrajna kienu qed jippjanaw li jorganizzaw referendum fittizju li jiddikjara l-hekk imsejħa “Repubblika tal-Poplu ta’ Kherson” fil-jiem li ġejjin, li jirrifletti l-ħolqien ta’ repubbliki separatisti appoġġjati mir-Russja f’Donbas fl-2014 li wittew it-triq għall-invażjoni tar-Russja fl-24 ta’ Frar.
Il-bandiera tar-rebħa Sovjetika mit-Tieni Gwerra Dinjija qed tibda tidher f’partijiet tal-Ukrajna okkupati mir-Russi qabel iċ-ċelebrazzjoni tar-Russja fid-9 ta’ Mejju ta’ Jum il-Vitorja tat-Tieni Gwerra Dinjija.
Il-bandiera l-ħamra, imtajra fuq ir-Reichstag ta’ Berlin fid-9 ta’ Mejju tal-1945, meta s-Sovjetiċi rebħu lin-Nażisti, iġġorr l-insinja tal-martell u l-minġel Sovjetiċi bl-iskrizzjoni, “150th Rifle, Order of Kutuzov Second Class, Idritz Division, 79th Rifle Corps, 3rd Shock Army, 1st Belorussian Front.”
Minn dak iż-żmien id-9 ta’ Mejju saret festa meqjuma fir-Russja u l-bandiera ikona importanti.
Għalkemm din il-bandiera ma kinitx l-unika waħda li ttellgħet fuq ir-Reichstag, kienet l-ewwel u l-unika waħda li baqgħet sal-lum mill-bnadar uffiċjali kollha ppreparati apposta biex jittellgħu hemmhekk.
Filmati li xxandru mill-midja barranija nhar it-Tlieta juru t-truppi Russi jtellgħu bandiera kbira f’Kherson. Aktar tard, truppi Russi dehru wkoll ipoġġu l-bandiera ma’ bini tal-gvern Ukren.
Il-bandiera tpoġġiet ukoll fuq il-bini tal-Kunsill reġjonali fil-belt ta’ Henichesk, li hija okkupata mir-Russi, fil-provinċja ta’ Kherson.
Skont is-CNN, statwa tal-eks mexxej Sovjetiku Vladimir Lenin reġgħet ġiet installata quddiem il-bini tal-kunsill aktar kmieni din il-ġimgħa.
Qed jingħad ukoll li l-forzi Russi qed iħossu pressjoni biex jiksbu xi forma ta’ rebħa qabel iċ-ċelebrazzjoni tar-Russja ta’ jum ir-rebħa fid-9 ta’ Mejju. Ir-Russja ġeneralment timmarka l-festa b’parata militari mill-Pjazza l-Ħamra u diskors mill-President Vladimir Putin.
Uffiċjal għoli Russu hedded li jaqta’ l-provvista tal-gass naturali tal-Ewropa b’reazzjoni għall-possibilità ta’ projbizzjonijiet ta’ importazzjoni taż-żejt li Moska tista’ tiffaċċja dalwaqt minħabba l-invażjoni tagħha fl-Ukrajna.
Ir-Russja tipprovdi madwar 40% tal-gass tal-Ewropa. Il-Ġermanja, l-akbar ekonomija fl-Unjoni Ewropea, tiddependi fuq ir-Russja għal kważi 50% tal-gass naturali tagħha.
Nhar il-Ħadd, is-Segretarju tal-Istat tal-Istati Uniti Antony Blinken, qal li l-Istati Uniti u l-alleati kienu qed jesploraw modi biex jipprojbixxu l-importazzjonijiet taż-żejt Russu, li jagħmlu ħsara lill-ekonomija tar-Russja saħansitra aktar hekk kif din tipprova tlaħħaq ma’ sanzjonijiet ekonomiċi li jfixklu.
Il-Punent s’issa kien rilutanti li jimponi sanzjonijiet fuq is-settur tal-enerġija tar-Russja minħabba li dan jista’ jkollu impatt fuq l-ekonomija globali, iżda issa hemm il-possibbiltà li jittieħed pass simili hekk kif l-Ewropa qed taħdem biex tiddiversifika s-sorsi tal-enerġija tagħha.
We use cookies on our website to give you the most relevant experience by remembering your preferences and repeat visits. By clicking “Accept”, you consent to the use of ALL the cookies.
This website uses cookies to improve your experience while you navigate through the website. Out of these cookies, the cookies that are categorized as necessary are stored on your browser as they are essential for the working of basic functionalities of the website. We also use third-party cookies that help us analyze and understand how you use this website. These cookies will be stored in your browser only with your consent. You also have the option to opt-out of these cookies. But opting out of some of these cookies may have an effect on your browsing experience.
Necessary cookies are absolutely essential for the website to function properly. This category only includes cookies that ensures basic functionalities and security features of the website. These cookies do not store any personal information.
Any cookies that may not be particularly necessary for the website to function and is used specifically to collect user personal data via analytics, ads, other embedded contents are termed as non-necessary cookies. It is mandatory to procure user consent prior to running these cookies on your website.
